දුම්බර කඳුවැටියේ සොඳුරු නවාතැන 'සෙම්බුවත්ත'
නිවාඩුවක් වගේම විවේකී සතිඅන්තයක් පැමිණෙන විට ඒකාකාරී පරිසරයෙන් මිදී, අවිවේකී ජීවිතවලින් ඔබ්බට ගොස් නිදහසේ සිටින්නට බොහෝ දෙනෙක් ඇලුම් කරති. එසේ නිදහසේ සිටින්නට කැමති අයට පවුල පිටින්ම ගොස් විනෝදයෙන් සිටීමට හැකි සොඳුරු ඉසව්වක් සොයාගෙන අපි මෙවර මාතලේ නගරයේ සංචාරයක නිරත වූවෙමු.
දුම්බර කඳුවැටියෙන් වටවූ මාතලේ නගරය ශීත දේශගුණයකට උරුමකම් කියන නිසත්, එහි තිබෙන ගැමි සුවඳ නිසත් සංචාරකයෝ මෙම ප්‍ර‘දේශයේ සංචාරය කිරීමට වඩාත් කැමැත්තක් දක්වති. මෙතෙක් එම ප්‍ර‘දේශයේ සංචාරක ආකර්ෂණය වැඩි වශයෙන් යොමු වී තිබුණේ නකල්ස්, පිටවල යන කඳුපන්ති වෙතය. නමුත් මෙවර අපගේ සංචාරය සිදු කළේ එම ප්‍ර‘දේශයෙන්ම සැඟවී තිබෙන, සංචාරකයන් වැඩි දෙනෙක් නොදන්නා "සෙබ්වුවත්ත" නම් සොඳුරු ඉසව්වේ මං සලකුණු සොයාගෙනය.
ඇල්කඩුව වැවිලි සමාගමට අයත්, ඇල්කඩුව වතුයායේ සරු තේ යායකට සහ ෆයිනස් යායකට මැදිව මෙම "සෙම්බුවත්ත වැව" පිහිටා තිබේ. මාතලේ සිට පැමිණෙන අයෙකුට මාතලේ නගරයේ සිට උකුවෙල හරහා ඇල්කඩුව නගරයට පිවිස, එතැන් සිට ඇල්කඩුව වතුයාය හරහා වැටී තිබෙන මාර්ගය ඔස්සේ මෙම ස්ථානයට පිවිසිය හැක. එමෙන්ම කොළඹ සිට වාහනයකින් පැමිණෙන සංචාරකයන්ට මහනුවර නගරයට පැමිණ උකුවෙල හන්දියෙන් හැරී ඇල්කඩුවට පැමිණ හුණුගල මාර්ගය ඔස්සේ ගමන් කිරීමෙන් සහ බසයෙන් පැමිණෙන මගීන්ට කොළඹ- මහනුවර බසයකින් මහනුවරට පැමිණ, එතැන් සිට මහනුවර සිට වත්තේගම නගරයටද, වත්තේගම සිට ඇල්කඩුව නගරයටද පිවිස, ඇල්කඩුව සිට සෙම්බුවත්ත දක්වා ගමන් කරන බසයෙන් මෙම ස්ථානයට ළඟාවිය හැකිය. ඇල්කඩුවේ සිට කිලෝමීටර් 6ක් පමණ දුරකින් මෙම ස්ථානය පිහිටා තිබෙන හෙයින් ත්‍රීරෝද රථයකින් වුවද පහසුවෙන් ගමන් කිරීමට හැකියාව ලැබේ. ඇල්කඩුවේ සිට කඳුකර ප්‍රදේශයකට දිවෙන පටු මාර්ගයක් ඔස්සේ ගමන් කිරීමට සිදුවන බැවින් වාහනවලින් සංචාරය කරන සංචාරකයන් ඒ සඳහා යෝග්‍ය වාහන සහ පළපුරුදු රියදුරන් යෝදාගැනීමටද වගබලා ගත යුතුය.
මාතලේ නගරයේ සිට කිලෝමීටර් 21ක් දුරින් සහ මහනුවර නගරයේ සිට කිලෝමීටර් 32ක් පමණ දුරින් පිහිටි මෙම ඉසව්ව යටත් විජිත සමයේදී ඉංග්‍රීසින් විසින් තේ වගාකර තිබේ. ඔවුන් එම සමයේ විනෝදවීම සඳහා වර්තමානයේ වැව තිබෙන භූමිය පෝලෝ ක්‍රීඩාංගණයක් ලෙස භාවිත කර තිබේ. 1949 වර්ෂයේදී මෙම ස්ථානයට යාබදව තේ කර්මාන්ත ශාලාවක් නිර්මාණය කොට තිබෙන අතර, ඒ සඳහා විදුලි බලය ලබාගැනීම සඳහා පෝලෝ ක්‍රීඩාංගණය තුළ වැවක් නිර්මාණය කිරීමට ඔවුන් පියවර ගෙන තිබේ.
මීට අවුරුදු 20කට පමණ පෙර එම කම්හලේ යන්ත්‍රවල ඇති වූ දෝෂයක් නිසා එය වසා දැමීමට තීරණය කළේය. නමුත් ඒ අවට ගොඩනගා තිබෙන නිවෙස්වලට විදුලිය සැපයෙන්නේ මෙම වැවෙනි.
1949 වර්ෂයේ සිට විදුලි බලය ගැනීම සඳහාම පමණක් භාවිත කළ මෙම වැව 2005 වර්ෂයේදී ඇල්කඩුව වතුයායේ සේවයට පැමිණෙන, වර්තමානයෙත් එහි වතු අධිකාරීවරයා ලෙසින් සේවය කරන රැඩ්ලි දිසාගේ මහතාගේ සංකල්පයකට අනුව සංචාරක පුරවරයක් ලෙස නිර්මාණය කර මෙය සංචාරකයන් අතර ප්‍රචලිත කර තිබේ.
දිසාගේ මහතා මෙය සංචාරක පුරවරයක් කිරීමට මත්තෙන් මෙහි අතීතය පිළිබඳව යම් සොයා බැලීමක් කර තිබෙන අතර, එහිදී අතීතයේ තේ කම්හල අසල තිබෙන ජල උල්පතකින් රන් සෙම්බුවක් මතුවූ බවටත්, එය සිහිවීම පිණිස කෝවිලක් ඉදිකර තිබෙන බවටත් ඔහුට දැනගැනීමට හැකිවී තිබේ. එහෙයින් 2005 වර්ෂය දක්වා %හපුවිද ඩිවිෂන්^ ලෙස හැඳින්වූ එම ප්‍රදේශය "සෙම්බුවත්ත" ලෙස නම් කිරීමට ඔහු පියවර ගෙන තිබුණි. ඒ ආකාරයට එම ප්‍ර‘දේශය සෙම්බුවත්ත ලෙස ජනප්‍රිය කරමින්, වැව සෙම්බුවත්ත වැව ලෙස නම් කරමින් අද වනවිට වැව හා ඒ අවට ප්‍රදේශය නිසි ආකාරයෙන් නඩත්තු කර ස්වභාවික පරිසරයට දායාද කොට තිබේ.
වර්තමානය වනවිට වැව අවට ගිම්හාන කුටි 10කට ආසන්න සංඛ්‍යාවක් ඉදිකර තිබේ. එම ගිම්හාව කුටිවල රාත්‍රිය ගත කිරීමටද මේ වනවිට පහසුකම් සලසා දී තිබේ. ඊට අමතරව ළමුන්ට විනෝදවිය හැකි සියලුම පහසුකම්වලින් සමන්විත විනෝද උයනක්ද නිර්මාණය කිරීමට දිසාගේ මහතාගේ ප්‍රධානත්වයෙන් යුත් එහි පාලනාධිකාරිය පියවර ගෙන තිබේ.
අඩි 35ක් පමණ ගැඹුරින් යුත් වැවේ දියනෑමට අවස්ථාව සලසා දී නොමැති වුවත්, උල්පත් ජලයෙන් පෝෂණය වන අඩි 05කින් යුත් නාන තටාකයක් වැව අද්දරින්ම නිර්මාණය කොට තිබෙන හෙයින් සීතල දිය පොදක අස්වාදය විදීමට එමගින් අවස්ථාව සැලසෙයි.
මෙම ස්ථානයේ තිබෙන සුන්දරත්වය නිසාම ටෙලි නාට්‍ය, චිත්‍රපට, ගීත රූප රචනා බොහෝමයක් මේ ස්ථානයේ රූගත කර තිබේ. "උතුම් පැතුම්" ටෙලි නාට්‍ය‘යේ තේමා ගීතය, දමිත් අසංක ගායනා කරන "සිත මගෙ රිදුනා" ගීතයේ රූප රචනා නැරඹීමෙන්ද එහි සුන්දර දසුන්වල සුන්දරත්වය සංචාරක ඔබට දැක බලාගැනීමට හැකිය.
මේ වනවිට "Pre shoot" සඳහා ද මෙම ඉසව්ව වෙන් කර ගැනීමට ද හැකියාව පවතියි. මීට අමරතව 10 දෙනෙකුගෙන් යුත් කණ්ඩායමක් සඳහා මෙහි තිබෙන ගිම්හාන කුටියක් තුළට වී මධුවිත තොලගාමින් විනෝද වීමට (පිරිමි පාර්ශවයට පමණක්) සවස 6.00 පසුව අවස්ථාව සලසා දී තිබේ. එමෙන්ම ඡායාරූපකරණයේ යෙදෙන ඡායාරූප ශිල්පීන්ට මනරම් දර්ශනතලවලින් යුක්ත ඡායාරූප ගැනීමටද මෙහිදී අවස්ථාව උදාවේ.
රාත්‍රියේ නවාතැන් පහසුකම් ලබාගැනීමට සහ "Per shoot" සඳහා අවසර ලබාගැනීමට 066-3682459, 066-4935767, 066-493576 යන ඇමතීමෙන් හැකියාව ලැබෙන අතර, ආරක්ෂාව සහ පරිසරය සුරකීම සඳහා එහි සේවක මණ්ඩලය අසීමිත කැප කිරීමක් කරන හෙයින් එහි සංචාරය කරන ඔබ පා සටහන් පමණක් ඉතිරි කර මතකයන් පමණක් රැගෙන ඒමට වග බලාගත යුතුය.
