චීනයේ ෂින්ජියාන් ස්වායත්තයේ අපුරු වෙළඳ වීදිය
සේද මාවතේ සංචාරයේ යෙදෙන අතරවාරයේ අද මා ඔබට විස්තර කරන්නේ චීනයේ ෂින්ජියාන් ස්වායත්තයේ ඇවිදින වෙළඳ වීදිය ගැනයි. මේ කලාපය හරිම සුන්දර තැනක් ලෙස හඳුන්වන්න පුළුවනි. එකත් අතකට මෙය සැලසුමකට අනුව සකස් කළ නගරයක් ලෙසයි පෙනෙන්නේ. හැමෝම වගේ මෙතෙන්ට එක් රොක් වන්නේ තමුන්ට කැමති විදියට විනෝද වෙලා යන්නයි. මෙතන ඇති ෆුඩ් කෝට් එක (food court) නැත්නම් ආහාර පාන ඇති අවන්හල් හරිම ජනප්‍රියයි. තාරුණ්‍ය වගේම වැඩිහිටි අයත් මෙතනට නිතර එන්නේ කැමති කෑමක් කාලා, රවුමක් ගහලා යන්නයි.
මේ අවට විවිධ වෙළඳ කුටි තනා තිබෙන්නේ හරිම නිර්මානාත්මක විදියටයි. ලීයෙන් නිර්මාණය කර ඇති මෙම වෙළඳ කුටි එහෙට මෙහෙට ගෙන් යා හැකි විදියට රෝද සවි කර තිබෙනවා. රස කැවිලි වර්ග, ධාන්‍ය ආහාර වලටත් මේ තැන හරිම ප්‍රසිද්ධයි. කුරු වල ඇමිණු BBQ වලට තියෙන්නේ ලොකු ඉල්ලුමක් ඒවායෙහි රස මෙම ෂින්ජියාන් ස්වායත්තයටම විතරක් සීමා වූ ඒවා කියලා කියන්නත් පුළුවනි. මේ කලාපය අවට ඇති පාන් සාදන තැන ගැනත් කියන්නම වෙනවා. ඒවා අපේ ලංකාවේ වගේ හදන පාන් ගෙඩි නම් නෙවෙයි. විශාල රොටියක. බනිස් ගෙඩියක හැඩයට තමයි පාන් හදන්නේ. ඒ පාන් නම් ඇත්තටම හරිම රසයි. පාන් කන්න ඔලිව් තෙල් වගේම රසවත් බටර් වර්ගත් දෙනවා. ඒ විතරක් නෙවෙයි පාන් හදන හැටිත් බලාගන්න පුළුවනි.
ඇත්තම කිව්වොත් මෙතන හැම දෙයක්ම තනා තිබෙන්නේ පිළිවෙලකටයි. මේ කලාපයේ වෙසෙන්නේ බහු ජාතීන් ඒ නිසා සියලු දේ වෙතින් වෙනසක් දකින්න පුළුවනි ,නගර වැසියනුත් හරිම සාමකාමියි , හවසට මෙතන එළිමහනේ සිට සංගීතය රස විඳින්නත් පුළුවනි. මේ ෂින්ජියාන් ස්වායත්තයට විශේෂ වූ සංගීතයේ ආස්වාදය ලබන්න පුළුවනි. නගරයක් කලාත්මකව හදලා තියෙන විදිය ගැන දැනගන්න නම් මේ තැන ඇත්තටම ඊට හොඳ තැනක් කියලා නම් කරන්නත් පුළුවනි. හොඳයි එහෙනම් මා කියූ මේ දේවල් මේ ජායාරුප බලලාම දැකගන්නකෝ.
සටහන /ජායාරුප - සඳුන් ගමගේ
