කරුණාකරල මේ තැනට ගිහින් බලමුද?
කරුණාකරල ඔබට අප යමක් කියන්නයි මේ සූදානම් වෙන්නෙ. කරුණාකරල ඊට සවන් දෙන්න පුළුවන් නම් හොඳයි. ඇත්තටම කරුණාකරල අපි මේ කියන්නෙ හදන්නේ හෝටලයක් ගැනයි. මේ හෝටලයේ නම තමයි කරුණාකරල කියන එක. එය සාමාන්‍යයෙන් හෝටලයකට යොදන නමක් නෙවෙයි. ඒ වගේ නමක් හෝටලයකට යෙදු පළවැනි අවස්ථාව මෙය වෙන්න පුළුවනි. ඒ වුණත් අමුතු විදියට හිතලා ඕනෑ දෙයක් වෙද්දෙන් කියලා දාපු නමක් නම් නොවෙයි. හොඳට හිතලා බළලා දාපු නමක්. සමන් ප‍්‍රියංකර නමැති සොඳුරු මිනිසා තමයි ඒ විදියට මේ හෝටලයට කරුණාකරලා කියන නම යෙදුවෙ. නාමයෙහි වෙනස වගේම හෝටලයත් වෙනස් කියලා තමයි ඔහු කියන්නෙ. ඒ නිසාම Centra Paradise park Jesu Nasarenu Mawatha තෝප්පු තොට, වයික්කාල යන ලිපිනයෙහි ස්ථාපිත වූ මේ කරුණාකරල හෝටලයට ගිහින් එහි ඇති වෙනස්කම් මොනවද කියලා බලන්න අපටත් හිතුණා.
මේ සංකල්පය වගේම නිර්මාණය බිහිකළ සමන් ප‍්‍රියංකර කවුදැයි කියා පළමුව අපි දැන ගනිමු. දශක තුනකට ආසන්න කාලයක සිට සමන් ජීවත් වන්නේ ජපානයේ. බිංදුවෙන් පටන්ගෙන අද වන විට වඩාත් සාර්ථකවූ ජපානයේ වෙසෙන මුල් පෙළේ ශ්‍රී ලාංකීය ව්‍යවසායකයෙකි. ජපානයේ ජීවිතය ගෙවා දැමුවද ඔහුගේ අධ්‍යාත්මය ඇත්තේ ශ්‍රී ලාංකීය භූමියේය. ඒ වගේම සිංහලකමටද ඔහු හරි ලෙංගතුය.
තාක්ෂණික ලෝකයේ පෙර ගමන්කරුවකු වන ජපානය වෙතින් බොහෝ හොඳදේ උකහා ගත් සමන් කරුණාකරල බිහි කළේ විශාල මුදලක් වැය කොටය. ඒ මගින් ජපානය සහ ශ්‍රී ලංකාව අතර සංචාරක පාලමක් තනා රටට විදේශ විනිමය ගෙන දීම ඔහුගේ ඉලක්කයයි. මේ කරුණාකරල ආරම්භ කොට තවමත් වසර ගණනාවක් නොවුවද අද වන විට එය වඩාත් සාර්ථක වී තිබෙන බවද කියන්න පුළුවනි.
ශරීරයට හිත සුව පිණිස වු ජපාන ආකෘතියේ ගෘහනිර්මාණ ශිල්පයට අයත් ක‍්‍රමද භාවිත කරමින් නිර්මාණය වූ කරුණාකරල සංචාරක පාරාදීසය නිමවී ඇත්තේ කබානා ක‍්‍රමයටය. එනම් වෙන් වෙන් වශයෙන් වු නිකේතන සමූහයක් ලෙසිනි. මේ එක කබානා එකක් පුංචි පවුලකට වුවද ප‍්‍රමාණවත් බව කිව හැකිය. ආයුර්වේද පංචකර්ම සහ ස්පා ප‍්‍රතිකාර අනර්ඝ මට්ටමින් ලබාදීම මෙහි ප‍්‍රධාන තේමාවවේ. මෙහි සේවයේ නියුතු දේශීය වෛද්‍යවරු දෙදෙනා ගෙන් අවශ්‍ය උපදෙස් ලබා ගත හැකිය. මා ඔයට සමීපව තනා ඇති කරුණාකරල පරිශ‍්‍රයෙහි ඇති නිදහස නිසාම අද මධු සමය සඳහා පැමිණෙන යුවළ අතරද බෙහෙවින් ජනප‍්‍රිය වී තිබේ.
ආයුර්වේද ප‍්‍රතිකර්ම සඳහා පැමිණෙන සංචාරකයන්ට සැපයෙන විශේෂිත ආහාර වට්ටෝරුවකි. ඊට අමතරව සාමාන්‍ය සංචාරකයන් සඳහා අන්තර්ජාතික ආහාර වට්ටෝරුවලට අනුව තමුන් කැමැති ආහාරයක් ඇණවුම් කළ හැකිය. නිදහස රිසියේ බුක්ති විඳගත හැකි කරුණාකරල වෙත පැමිණෙන සංචාරකයින් හට ඕනෑ නම් මීගමුව ශාන්ත මරියා දේවස්ථානය, අගුරුකාරමුල්ල පංසල, ලන්දේසි ඇළ, ලන්දේසි මුවදොර ආදී ස්ථාන දැක බලා ගැනීමට යාම සඳහා මෙන්ම මා ඔයේ බෝට්ටු සවාරියක් යාම සඳහා ද කළමනාකාරිත්වය අවකාශය සපයා ඇත. කරුණාකරල ඇවිත් මෙහි දිනක් ගතකර බලන්න. මේ පරිසරයේ ඇති කොහොඹ, බෙලි දිවුල් ඇතුළු තවත් ඖෂධීය ගස් වර්ග බොහෝමයකි. ‘‘අපි පංසලකුත් හදලා තියෙන්නෙ.’’
සාමාන්‍යාධිකාරී හේෂාන් කියන්නේ එහෙමය. අමල් මෙහි අධ්‍යක්ෂවරයෙකි. අපි මේ පළාතට ආලෝකයක් ගෙන දෙමින් මේ වගේ විදේශ විනිමය උපද්දවන තැනක් නිර්මාණය කළාට තවම අපට නිශ්චිතව විදුලි සබඳතා දීමට බලධාරීන් කටයුතු යොදා නැහැ. ඒ ගැන නම් අපි සිටින්නේ කනගාටුවෙන්.
ජපානය ජයගත් සමන් ප‍්‍රියංකර සහ අමල් පවසන්නේ එහෙමය.
ඒ කොයි හැටි වෙතත් කරුණාකරලා සංචාරක හෝටල භූමිය වෙත පැමිණෙන සංචාරකයන්ට මෙතැන දී අපූරු අත්දැකීමක් ලබාගත හැකි බව නම් කිව යුතුමය. බාහිර වටපිටාවේ දී මුහුණ දෙන බොහෝ සිදුවීම් නිසා ද්වේශය ඇති වී තිබේ නම් කරුණාව ඇති කර ගෙන ගත සිත සැහැල්ලූ කරගෙන යාමට මේ කරුණාකරලා හොඳම තැනකි. කොළඹට නුදුරුව මෙවැනි තැනක් තිබීම සංචාරක පිපාසයෙන් පෙළෙන එහි විවිධ රස සොයා යන සංචාරකයන්ට වඩාත් හිතකර අගනා නිම්නයකි. කරුණාකරල ඇවිත් යන්න එන්න කෑමක් කන්න. ඔය ආදී වචන අපේ ලෙංගතුකමට හුරුවූ අපේ ශ්‍රී ලාංකීය ආගන්තුක සත්කාරයට පමණක් උරුම වූ වදන්ය. මේ නාමය යෙදීමේ අරුමය ද එයමය. කරුණාකරල මෙතැනට ගියොත් ඔබට එය හෝටලයකට එහා ගිය අත්දැකීමක්ම වේවි.
සඳුන් ගමගේ
