අලි බබාලාගේ හොඳ හොඳ සෙල්ලම
අලි බැලිල්ලයි බලි බැලිල්ලයි එපා වෙන්නේ නෑලු. අපි අද යමු එහෙනම් අලි බලන්න. ලංකාවේ රක්ෂිතයන් හා අභය භූමී ඇරැණම පහසුවෙන් අලියෙක් බලාගන්න පුළුවන් තැන් කිහිපක්ම තියෙනවා. කොළඹ ඉන්න අය නම් අලි බලන්න ඉක්මණටම යන්නේ දෙහිවල සත්ත්වෝද්‍යානයට. ඒ වගේම අලි බලන්න අනිත් ප්‍රසිද්ධම තැන තමයි පින්නවල අලි ගෙදර. හැබැයි ඒ ඔක්කොටම වඩා වෙනස් විදියට අලි වගේම ඇත්තු බලන්න තියෙන තැනක් තමයි උඩවලව ඇත් අතුරැ සෙවණ කියන්නේ. මොකද්ද මේ වෙනස..
උඩවලවේ ඇත් වගේම අලි පැටව් කොහේවත් හිරකරලා නෑ. සත්ත්වෝද්‍යානයක රඳවලත් නෑ. එයාලා ඉන්නේ උඩවලව කැලේ. උඩවලව ජලාශය අවට තිබෙන උඩවලව රක්ෂිතය ගැන අපි කාලෙකට කලින් Walk 121 හරහා කිව්වා. අන්න ඒ රක්ෂිතයට මායිම් වෙලා තමයි උඩවලව ඇත් අතුරැ සෙවණ තියෙන්නේ. ඔය කියන රක්ෂිතයේ ඉන්න අම්මාගේ කිරි පොදක් අහිමි වුණ පුංචි අලි බබාලට අවශ්‍ය කිරි දීලා ඔවුන්ගේ ලෙඩට දුකට බෙහෙත් එහෙම දීලා බලාගන්න එක තමයි උඩවලව ඇත් අතුරැ සෙවණේ මූලික රාජකාරිය. ඉතින් අර වනාන්තරේ ඉන්න අලි පැටවු පුරැදු වෙලා ඉන්නවා කිරි බඩගිනි හැදුනාම ඇත් අතුරැ සෙවණට ඇවිල්ලා බඩ පිරෙන්න කිරි බීලා යන්න. එයාලට කිරි දෙන්න පුරැදු කරපු වෙලාවල්වලට ඔබටත් එහි ගියොත් හරිම අපූරැ අලි බබාලා රොත්තක්ම දැකගන්න පුළුවන්. උදේ 9ට, දවල් 12ට, හවස 3ට වගේම දවසේ අවසාන වතාවට හැන්දෑවේ 6ට තමයි අලි පැටවුන්ට කිරි දෙන වෙලාවන්. මේ කියන වෙලාවල්වලට විතරයි එහි යන කෙනෙක්ට ඇතුළට යන්න ඉඩ දෙන්නේ. එහෙම නැතිව පින්නවල වගේ ඔබ යන ඕනෑම වෙලාවක ඇත් අතුරැ සෙවණට යන්න අවසරයක් ලැබෙන්නේ නැහැ. ඒ වගේම අලි බබාලට ආදරය කරන ඔබට ඒ අලි බබාලට බොන්න කිරි අරන් දෙන්න දායක වෙන්නත් අවස්ථාව තිබෙනවා.
අලි බබාලා බලනවාට අමතරව ඇත් අතුරැ සෙවණේ හරිම වැදගත් කෞතුකාගාරයකුත් තියෙනවා. අලි ගැන බොහෝමයක් දේවල් එතැනින් ඉගෙන ගන්නත් පුළුවන්. එතෙන්ට වෙන දවසක යමු. අද අලි බලලා විතරක් එමු.
ප්‍රසාද්
