වී.වී.අයි.පී සැලකිල්ල
හිටපු ලොකු තැනයි තවත් මන්ත්‍රී පිරිසකුයි පසුගියදා කොරියාවට ගියේ එහෙන් ලැබුණ ආරාධනාවක් අනුවයි. ඉතින් උන්නැහේලට යන්න තිබුණ දවසෙ සුපුරැදු විදිහට කටුනායක ගුවන් තොටුපොළේ විශේෂ අමුත්තන්ගෙ මැදිරියට ගියේ පාස්පෝට් සීල් කරලා අනුමත වෙලා එනකම්..
දැන් මේ මන්ත්‍රී පිරිසයි හිටපු ලොකුතැනයි අමුත්තන්ගෙ මැදිරියෙ වාඩිවෙලා ඉන්නකොට එතන සේවය කරන කෙනෙක් ඇවිත් ඇහුවා තේ එකක් කාරිය බොනවද කියලා. ඊට පස්සෙ කිව්වා කෝපි ගේන්න කියලා..
ඒ අනුව ගුවන් තොටුපොළ සේවකය කෝපි බඳුනක් ගෙනාවා... ඊට පස්සෙ හිටපු ලොකුතැන කෝපි පානය කළා.. ඊළඟට මෙයාලගෙ පාස් පෝට් ගෙනාවා.. කට්ටියම ගුවන් යානයට ගොඩ වෙන්න යන්න සූදානම් වුණා.
මෙන්න එතකොටම ගුවන් තොටුපොළ අමුත්තන්ගෙ මැදිරියෙ සේවකයෙක් දුවගෙන ඇවිත් කට්ටියට කොළයක් දුන්නා... ඒක බැලුවම පෙනුණෙ ඒක රැපියල් 4500/=ක බිලක් බවයි. බිලේ සඳහන් කරලා තිබුණා විශේෂ අමුත්තන්ගේ මැදිරියෙන් කෝපි පානය කළාට මේ මුදල ගෙවන්න කියලා..
කවදාවත් සිද්ධ නොවුණ මේ වැඩේ නිසා හිටපු ලොකු තැන පුදුමයට පත්වුණාලු.. ඒත් ඉතින් බිල ගෙවන්න එපායැ.. ඒ අනුව උන්නැහේගෙ කාර්යය මණ්ඩලේ කෙනෙක් වහාම රැපියල් පන්දාහෙ කොළයක් ගුවන් තොටුපොළ සේවකයට දුන්නෙ බිල පියවන්නයි..
ඒක අතට ගත්ත සේවකයො බොහොම කාරැණිකව කිව්වා සර් දැන් කෝපි දෙනවට සල්ලි ගන්නවනේ.. ඉන්න මම බිල ගෙවලා ඉතුරැ සල්ලි ගේනකම් කියලා... ඒ කතාව කිව්වම හයියෙන් හිනාවුණ කෙනෙක් ගුවන් තොටුපොළ සේවකයට මෙහෙම කිව්වලු..
"එපා.. එපා.. ඉතුරැ සල්ලි එපා.. ඒක අපේ කෝපි වලට බිල දාන්න කියපු මහත්තයට "ටිප්"එකක් හැටියට තියාගන්න කියන්න...
එහෙම කියලා ගුවන් තොටුපොළ සේවකයාගෙ පිටට තට්ටුවක් දාපු උන්නැහේලා ගුවන් යානයට ගියා..
