ලැප්ටොප් එක ෆ්‍රිජ් එකේ
කොළඹ අවට ගංවතුර උවදුරෙන් පීඩාවට පත්වුණු බොහෝ පවුල් ඔවුන්ගේ නිවෙස් කරා පසුගියදා යළි පදිංචියට ගියත්, ජීවිත කාලය පුරාවට ඔවුන් හරි හම්බ කළ බොහෝ දේවල් ඔවුන්ට නැතිවෙලා ගියා. වලං පිඟන් විතරක් නෙවෙයි කොට්ට මෙට්ට පවා ඔවුන්ට නැතිවෙලා ගියා. රූපවාහිනී යන්ත්‍ර, ශීතකරණත් ඇලවල් දිගේ ගහගෙන ගියත්, බොහෝ අය ඔවුන්ගේ ජීවිත ආරක්‍ෂා වීම ගැන සතුටු වුණේ, දුක හංගාගෙනයි.
යළි පදිංචියට ගිය අය අතර අපේ කලා ශිල්පීන් කීප පොලකුත් හිටියා. දවස් ගාණක් තිස්සෙ ගෙවල් දොරවල් සුද්ධ පවිත්‍ර කරන්න, ගංවතුරට හසුවී විනාශවුණු බඩු මුට්ටු ඉවත් කරන්න ඔවුන්ට ලොකු සටනක් දෙන්න වුණා, ගෙවල් දොරවල් පිළිවෙළකට තියාගන්න ටික කාලයක් යයි. ඔන්න විපතට පත්වුණු කාලාකරුවෙකුගේ නිවසකටත් ඔහුගේ මිතුරන් පිරිසක ආවලු සුවදුක් විමසන්නට. ටික වේලාවක් කතාබහ කර කර ඉඳලා යන්න ලෑස්ති වෙනකොට තමයි අර ශිල්පියාට මතක් වුණේ ගංවතුර ගලපු දවස්වල ගත්තු පින්තූර ටික යාළුවන්ට පෙන්නන්න.
"ඔහොම පොඩ්ඩක් ඉන්නකො. මම ෆොටෝ ටික සේරම ලැප්ටොප් එකට දාගත්තා," කියමින් ඔහු ශීතකරණය ඇරියලු. ලැප්ටොප් එක තිබු‍ණේ ඒක ඇතුළෙ. යාළුවන්ගෙ ඇස් උඩ ගියාලු.
"ෆ්‍රිජ් එක සති දෙකක් විතර යනකං ඕෆ් කරලම තියන්න කිව්වා ටිකක් වේලෙනකම්. ඉතිං මේ දවස්වල පරිස්සමට ලැප්ටොප් එක තියන්නෙ ඒකෙ ඇතුළෙ. අවුලක් නෑනෙ?* ඔහු ඇහුවලු.
ඔහුගෙන් සමු අරන් එන අතරතුර ඔහුගේ මිත්‍රයෙක් කිව්වලු "සපත්තු ජෝඩුව තියන්නෙ අවන් එකේද දන්නෙ නෑ නේද" කියලා.
