මරු ස්කාර්ෆ් එක
අද සංගීත ප්‍රසංග පවත්වනවනෙ නොයෙක් විදිහට. එළිමහන්, ගෘහස්ථ, සෝලෝ ඔය වගේ විවිධාකාර නම්වලින් ප්‍රසංග කරනවා. ඕවට සහභාගි වෙන්නෙත් විවිධාකාර පිරිස්.
ප්‍රවීණයෝ අතර ඊයෙ පෙරේදා ක්ෂේත්‍රයට ඇවිත් ප්‍රවීණවුණු අයත් සින්දු කියන්න එනවා. දන්න හැම විලාසිතාවක්ම ප්‍රදර්ශනය කරන්නත් ඒගොල්ලො ඒක අවස්ථාවක් කරගන්නවා.
ඔන්න ඔය වගේ සංගීත ප්‍රසංගයක් තිබුණලු වාරියපොළ පැත්තෙ.
අලුත්, පරණ අය ගොඩාක් ඒකෙ සින්දු කිව්වා. ඒ අතර හිටියලු අමුතුම ස්කාර්ෆ් එකක් ඔළුවෙ ගහගෙන සින්දු කියපු කෙල්ලෙක්. එයාගෙ සින්දු
ටික කිව්වට පස්සෙ එතන හිටිය ප්‍රවීණ ශිල්පියෙක් ඇහුවලු ඒ ස්කාර්ෆ් එක ගැන.
"ඔයා ෆැෂන්වලට හරි කැමති වගේ නේද? කොහෙන්ද ඔය ස්කාර්ෆ් එක නංගි?"
"ආ මේක මම ළඟදි මැදපෙරදිග ටුවර් එකක් ගිය වෙලාවෙ මගේ රසිකාවියක් දීපු තෑග්ගක්..."
"ඇත්තද? හැබැයි නංගි ඔයා ඕක ප්‍රසංගවලට එහෙම අඳින්න එපා", ඔහු කිව්වලු.
"ඇයි අවුල්ද? මට ඒක කැතයිද?"
"නෑ නෑ ඕක ස්කාර්ෆ් එකක් නෙවෙයි. මැදපෙරදිග රටවල්වල වැඩ කරන ගෘහ සේවිකාවො කුස්සියෙ වැඩ කරන වෙලාවට හිස් ආවරණයක් හැටියට පාවිච්චි කරන දෙයක්..."
