පූජා එක්ක සෙල්ෆියක්...
මේ දිනවල "පත්තිනි" චිත්‍රපටය පෙන්නන සිනමා ශාලා පසුකරගෙන යනකොට හිතට දැනෙන්නෙ අමුතුම ප්‍රබෝධයක්. සිංහල චිත්‍රපට බලන්නත් මේ වගේ සෙනඟක් මේ රටේ ඉන්නවනෙ කියලා හිතෙන කොට මාර ෆිට් එකක් එන්නෙ.
ඔන්න ඒ ෆිට් එක වැඩි වෙනවත් එක්ක පත්තිනි චිත්‍රපටයට දවස් 50ත් පැනලා. රටේ ඔය තරම් ගංවතුර උවදුරක් තිබියදීත් දවස් 44ක් වෙද්දි ලක්ෂ 1,000ක ආදායමක් උපයන්නත් "පත්තිනි"ට පුළුවන් වෙලා කියලා ආරංචියි. හොඳ චිත්‍රපට හැදුවොත් හොඳ ප්‍රතිචාර ලැබෙනවා. ඒක මේ රටේ ප්‍රේක්ෂකයො බුද්ධිමත්ව ඔප්පු කරලා තියෙනවා.
චිත්‍රපටයේ ප්‍රචාරණ වැඩ කටයුතු ඉතාම ක්‍රමානුකූලව කරගෙන යන්නෙ ඊට රංගනයෙන් දායක වුණු පූජා උමාශංකර් හා උද්දික ප්‍රේමරත්නගේ උද්යෝගිමත් සහභාගීත්වයෙන්.
පූජා, උද්දික "පත්තිනි" පෙන්නන ශාලාවලට ගිහිං ප්‍රේක්ෂකයොත් එක්ක පින්තූර අරගෙන, කතාබහ කරලා, සින්දු කියලා හොඳ ෆන් එකක් දෙනවා. ඔන්න ඔය වගේ වෙලාවක ප්‍රේක්ෂකයො මේ දෙන්නව තියාගෙන පින්තූර ගන්නවා ඉවරයක් නැතුව.
මේ ළඟදි වැලිගම පැත්තෙ සිනමා ශාලාවකට පූජා, උද්දික ගිය වෙලාවක ඒ දෙන්නා මැදිකර ගෙන කට්ටිය ෆොටෝ ගන්නවලු, සෙල්ෆි ගන්නවලු. එකපාරටම එතනට පැන්න මැදිවියේ කාන්තාවක් පූජාගේ අතින් ඇදගෙන වෙන පැත්තකට ගිහිං එයත් එක්ක සෙල්ෆි එකක් ගත්තලු. හැමෝම තක්බීර් වෙලා බලං ඉන්නවලු. මේ ගෑනු කෙනා කට්ටියට මෙහෙම කිව්වලු: "මාත් මෙච්චර වෙලා බලං හිටියෙ පූජයි, උද්දිකයි එකටම ඉඳලා ෆොටෝ ගන්නවා, ගන්නවා ඉවරයක් නෑ. ඒ දෙන්නා ෆිල්ම් එකෙත් ඉන්නෙ එකට, මෙතනත් ඉන්නෙ එකට. අපිට පූජා එක්ක තනියෙන් සෙල්ෆියක් ගන්න චාන්ස් එකක් ලැබෙන්නෙම නෑ. ඒකයි මම පූජා නංගිව ඇදගෙන ගිහිං සෙල්ෆියක් ගත්තෙ. හැබැයි අපි මේ හැමදෙයක්ම කරන්නෙ ආදරේට හොඳේ."
අපිත් මේවා ලියන්නේ ආදරේට හොඳේ!
