පස්දෙනාම සූරයෝ
දියවන්නා කවුන්සිලේ අධීක්ෂණ සයිස් මන්තිරිවරැන්ට වාහනයක් කුලියට ගන්න පහුගිය කාලෙ මාසෙකට ලස්ස දෙක බැගින් ආණ්ඩුවෙන් දුන්න කියමුකො... ඒ මුදල ලබාදීමට එක කොන්දේසියක් පනවලත් තිබුණා. ඒ අනුව කිසිම අමාත්‍යංශයකින් තමන්ට වාහනයක් නොලැබුණ මන්තිරිවරැන්ටයි මේ ලස්ස දෙක මාසිකව දුන්නෙ...
ඒත් අමාත්‍යංශවලින් වාහනත් අරන් පාර්ලිමේන්තු කටයුතු අමාත්‍යංශයෙන් මාසෙකට ලස්ස දෙක බැගිනුත් ගන්න පස්දෙනෙක් කරපු ජරමරයක් ගැන දියවන්නා කවුන්සිලේ ලොකු හා හූවක් යනවා...
මේ පස්දෙනා මේ විදිහට සල්ලිත් අරන් වාහනත් ගත්ත කියන ආරංචිය ආණ්ඩුවෙ ඉහළ තැන්වලට ලැබුණෙ පහුගිය දවසෙලු... ඊටපස්සෙ වහාම ලස්ස දෙක ගෙවීම නතර කරන්න නියෝග ලැබිල. තමන්ට මාසිකව ලැබුණ මුදල නොලැබීම නිසා පරලවුණ මන්ත්‍රී මහත්තුරැ පස්දෙනා ඒකට හේතුව දැනගන්න පාර්ලිමේන්තු අමාත්‍යංශයට එකපාරටම කඩා පාත්වෙලා ලොකු ඝෝෂාවක් කළාලු... ඒ ඝෝෂාවට සවන් දීපු අමාත්‍යංශයෙ ලොක්කො මෙයාල සල්ලිත් අරන් වාහනත් ගත්ත කතාව ගැන ලැබුණ පැමිණිලිත් නියෝගත් කියල දුන්නලු...
දෙකෙන් එකක් අතෑරල ආවොත් ප්‍රශ්නය විසඳන්නම් කියලත් කීවලු...
මේ මන්තිරි ගොල්ල කටින් ගහල සල්ලි වාහනයි අත්පත් කරගන්න ගහපු ගේමට ඒ හින්ද ලොකු පොල්ලක් වැටිලලු...
මේ කතාව ආණ්ඩුවෙ ඉහළම කස්ටියත් දන්නව කියලයි ආරංචි...
දැන් හැමෝම බලන්නෙ කව්ද මේ ජරමරේ කරපු පස්දෙනා කියලයි...
මෙයින් එක්කෙනෙක් දොම්පෙට යන පාර දන්න කෙනෙක්ලු: ඊළඟට හාමි.. කෙනෙකුයි රත්න කෙනෙකුයි ඉන්නව. බූරැවන් ගැන ප්‍රසිද්ධ දිස්තිරික්කෙ කේතලෙන් මල්ලක් ගේන පැත්තෙ ජ්‍යෙෂ්ඨ මන්තිරි කෙනෙක්ලු අනික. බදුලු බණ්ඩාරවෙල පැත්තෙ මහත්තයෙකුත් මේ පස්දෙනා අතරේ ඉන්නවා කියනවා...
මුන්නැහේල පස්දෙනාම අලිපාටියෙ කියලත් තතු දත් අය දන්නවා...
