කොකා පෙන්නිල්ල
මතට තිත සංකල්පෙ තදින්ම ක්‍රියාත්මක කරන්න රටේ ලොකු මහත්තයා එහෙම හැබෑවටම කැපවෙලා වැඩකරනවා.
ඒත් ආණ්ඩුවෙ ඉන්න වැදගත් පට්ටම් දරන "පොඩි මහත්තුරැ" තවමත් යන්නෙ පරණ පාරෙමලු.
ඉතින් මේත් ඒ වගේ පරණ පාරෙ යන දේසපාලුතුමෙක් කළ වැඩක්. මේක ඇහෙන්නෙ "රේගුව"පැත්තෙන්. පසුගියදාක මේ රටේ ඉන්න උතුරන්න සල්ලි බාගෙ තියෙන තමන්ගෙ කොම්පැණිය ජයටම වර්ධනය කරපු මහත්තයෙක්ගෙ සමාගමකට එතනෝල් තොගයක් ආවලු... මේවයින් නිත්‍යනුකූල මත්පැන් වගේම "බොකුදිරාස්" හදනවනේ...
කොහොම හරි වරායෙ ගුදමට ආපු මේ බලපත්තර නැති එතනෝල් තොගේ කස්ටම් එකට මාට්ටු වුණා කියමුකො... ඉතින් එතන කස්ටිය මේක හොඳට බලල ගණන් මිනුම් හැදුවම මේ බඩුතොගේ රැපියල් කෝටි පනහක් කිට්ටුව වටිනවලු...
මේක මාර ජාවාරමක් නිසා කස්ටම් කස්ටිය බඩු අල්ලලා දඩ නියම කරන්න ගියාලු... දඩේ ගැහුවනම් මේක ගෙන්නපු උන්නැහේට කෝටි ගණනක් නියම වෙන්නලු තිබුණෙ... ඒත් ඉතින් අන්තිමට කස්ටම් කස්ටියට වඩා ධනවතා වාසනාවන්ත වුණා. උන්නැහේ "හිරැ"පායන උදෑසනින්ම ගිහිල්ලා තමන් මේ වළෙන් ගොඩගන්න කියල කොළඹ පැත්තෙ එක්තරා දේසපාලන ලොක්කෙකුට කිව්ව. ඒක කළොත් මෙහෙම කරන්නම් කියලත් ලොකු පොරොන්දුවක් දුන්නලු...
ඔන්න ඊට පස්සෙයි "මතට තිත" හරියටම ක්‍රියාත්මක වුණේ. අද "හිරැ" බහින්න කලින් පොඩි ගණනක දඩයක් ගහලා බඩු නිදහස් කළ යුතුය කියලා නියෝගයක් ආවා.
ඒ අනුව එදාම ධනවතා ගොඩ ගියේ කස්ටම් කස්ටියට කොකා පෙන්නගෙනලු.
