ඒ නම කියන්නකෝ
මේ දවස්වල නිතර නම කියැවෙන සුප්‍රකට කොමිසමක ඉහළම තනතුරක් දරන නෝන කෙනෙක් පසුගියදාක අලුත් කඩේ පැත්තෙදි කළුකෝට්කාර යාළුවො කස්ටියක් හම්බ වුණා.
මේ නෝන යහපාලන කස්ටිය අතරේ ජනප්‍රිය කෙනෙක් වුණාට විපක්‍ෂ කස්ටිය එයා ගැන මනාපයක් නැති නිසා නෝන විපක්‍ෂයෙ හිතවත්තු වන කළුකෝට්කර යාළුවන් එක්ක කතා කරද්දි විහිළුවෙන් වගේ අපූරැ ප්‍රශ්නයක් ඇහුවලු...
"ඔයාලගෙ කස්ටිය මට ලස්සන විහිළු නමක් දාලය කියල ආරංචියි" නෝන කිව්වා...
"මොකද්ද අනේ ඒ නම. අපි නම් දන්නෙ නැහැ..." එයා කළුකෝට්කාර මිත්‍රයෙක් කිව්ව.
ඊළඟට කොමිසමේ නෝන අකුරැ තුනක නමක් කියලා ඒක නේද මට දාපු නම කියල මිත්‍රයගෙන් ඇහුව.
ඒත් මිත්‍රය උත්තර දෙන්න ගියේ නැහැ. හිනාව තද කරගෙන නිකම් හිටියා...
ඊළඟට ආයෙත් නෝන කතා කළා "කමක් නැහැ... කෝකටත් නම දාපු අයට කියන්න මම ඒ නමට හුඟක් කැමැතියි... ආසයි කියලා..." එහෙම කියපු නෝන යන්න ගියා...
එතුමිය ගියා. හිනාව තදකරන් හිටපු කළුකෝට් මිත්‍රයට හයියෙන්ම හිනා ගියාලු... හිනාවෙලා ඉවරවෙලා මෙහෙම කිව්වලු...
"එයා දන්නෙ නැහැ ඇත්තටම දාපු නම මොකද්ද කියල.. ඕක නෙවෙයි එයා ඔය නමේ අකුරැ මාරැ කරගෙන..." කළුකෝට් උන්නැහේ කිව්ව... එතකොට එතන හිටපු එයාගෙ තවත් මිතුරෙක් කිව්ව ඉතින් තෙපර බාන්නෙ නැතුව හරි නම කියපන් කියල..
"අපෝ මට පුළුවන්ද මෙතන කැත වචන කියන්න" කියපු කළුකෝට් යාළුවත් මාරැ වෙලා ගියා.
