ඉතිං මම කතෝලිකනෙ ළමයෝ
දැනට රෑගතවෙමින් පවතින ටෙලිනාට්‍ය දර්ශන තලයක අපූරු කතාවක් අහන්නට ලැබුණා. ප්‍රවීණ නළු නිළියන් මෙන්ම නව පරපුරේ නළු නිළියනුත් මේකෙ රඟපානවා. මේ කතාබහ ඇතිවෙන්නෙ නව පරපුරේ නළුවෙක් හා නිළියක් අතර. මේ නළුවා නිතරම අර නිළියගේ අඩුපාඩු හොයනවලු.
කෙල්ලත් අරින්නෙ නැහැයිලු. කෙල්ල මොනව හරි අඩුවක් හොයාගෙන එයාව බයිට් එකට ගන්නවලු. ඔන්න දවසක් දෙන්නා අතර ලොකු ඡන්දයක්ලු, දෙන්නගෙන් කාටද හොඳට රඟපාන්න පුළුවන් කියලා. කොල්ලා කියනවලු ඔහු රඟපාලා තියෙන ඩිරෙක්ටර්ලගෙ නම්, ප්‍රවීණ නළු නිළියන්ගෙ නම්. කෙල්ලත් දෙවෙනි වෙන්නෙ නැහැලු. එයා වැඩ කරපු නමගිය ශිල්පිනියන්ගෙ නම් කියාගෙන කියාගෙන යනවලු. අර නළුවා එක පාරටම කියනවලු, හරි ඔයා රංගනය ගැන ඔච්චර දන්නවනම් කියනවා බලන්න "සතර අභිනය" කියන්නෙ මොකක්ද කියලා?"
කෙල්ල මෙහෙම උත්තර දුන්නලු, "අයියෝ ඉතිං ඇයි ඔයා ඕක මගෙන් අහන්නෙ. මම බුඩිස්ට් නෙවෙයි නෙ. මම කතෝලිකනෙ. ඔය දෙබසට ඇහුම්කම්දීපු හැමෝටම හිනාලු. රංගන ශිල්පියකු හෝ ශිල්පිනියක අනිවාර්යයෙන්ම දැනගත යුතු කාරණයක්නෙ "සතර අභිනය" කියන්නෙ. ආංගික අභිනය, වාචික අභිනය, ආහාර්ය අභිනය හා සාත්වික අභිනය ගැන රංගන ශිල්පීන් අනිවාර්යයෙන් දැනගෙන ඉන්න එපායැ.
