අහවලාගෙ ෆේස්බුක් සෙල්ලමක්
මහජන සේවයයි ආරක්‍ෂාවයි දෙකම කලවම් වෙච්ච එක්තරා දෙපාර්තමේන්තුවක ප්‍රධානියෙක් ලංකාවෙ ප්‍රධානම පෙළේ සමාගම් ලොක්කෙකුගෙ නෝන මහත්තයත් එක්ක ෆේස්බුක් සම්බන්ධතාවක් පටන් ගත්තලු... හැබැයි මේ තැනැත්ත ඒ කාන්තාවට කියල තිබෙන්නෙ ඇත්ත නමවත් තනතුරවත් නෙවෙයි.
තමන් තරමක් ජූනියර් තනතුරක ඉන්න ඔපිසර් කෙනෙක් හැටියට හඳුන්වා තිබුණෙ...
ඉතින් මේ ෆේස්බුක් කතාව ටික කලක් යනකොට ඉඳහිට දුරකථනයෙන් කතාකරන මට්ටමටත් පත්වුණාලු... ඔය කතාබහ සිද්ධවෙන අතරතුර ස්වර්ණාභරණ ව්‍යාපාරෙ ඉහළම අත්තක ඉන්න අර නෝන මේ ෆේස්බුක් මිත්‍රයගෙ දෙපාර්තමේන්තුවෙන් පොඩි උදව්වක් ඉල්ලල...
උදව්ව කරන්න නම් පුළුවන්... හැබැයි ඊට කලින් තමන් කියන තැනකදි හමුවෙන්න කියල උන්නැහේ ආරාධනා කළාලු... මේ ආරාධනාව ගැන සැක හිතපු ව්‍යාපාරික නෝනා එයා හමුනොවී තමන්ගෙ වැඩේ කරගන්න උත්සාහ කළා... ඒත් හරි ගියේ නැහැ.
ඒ අතර ෆේස් බුක් ලොක්කගෙන් නිතර නිතර ඇමතුම් ලැබෙන්න ගත්ත. ඒ ඇමතුම් කරදරයක් වෙන මට්ටමට ආවම ඒ නෝන මේ ගැන පැමිණිල්ලක් දාන්න ගියාලු... ඒත් චූදිතයගෙ නම අහපු පොලිසිය පැමිණිල්ල ලියාගන්න බයවෙලා... එයින් පස්සෙ මේ නෝන තමන්ගෙ කතාව ආණ්ඩුවෙ වගකිවයුතු තැන් ගණනාවකටම කිව්වලු... ඒ අතර දුරකතන අමතුම් දුන්න අංකය කාගෙද කියලත් දැනගෙනලු...
කොහොම කොහොම හරි දැන් මේ වැඩේ වෙනින් පැත්තකින් පත්තු වෙන්න යනව කියලා ලොකු ආරංචියක් යනව... එහෙම වුණොත් ළඟදි පට්ටම ලබාපු මුන්නැහේට එච්චර හොඳ නැතිවෙන්න පුළුවන් කියල සමහරැ කියනව.
