පටිභාන දැන් පෙන්වනවා
මීට දශක තුනකට පෙර වසන්ත ඔබේසේකර අධ්‍යක්ෂණය කළ "දඩයම" චිත්‍රපටය නිෂ්පාදනය කිරීමෙන් දිගු නිහැඬියාවකට පසු "පටිභාන" සිංහල චිත්‍රපටයේ අධ්‍යක්ෂකණය සමගින් අප හමුවට එන රබීන් චන්ද්‍රසිරි මහතා සමග කළ සංවාදයකි මේ.
ඔබගේ චිත්‍රපටය ප්‍රදර්ශන වරම් ලබාගන්නේ කොහොමද?
රැඟුම් පාලක මණ්ඩලයෙන් අනුමත වුණාට පස්සේ දැන් තියෙන ක්‍රමය තමයි ප්‍රදර්ශක මණ්ඩලවල වගකිව යුතු නිලධාරීන් හා නිලධාරිනියන් ගෙනැල්ලා චිත්‍රපටය පෙන්වන එක. ඒක බලපු MPC හා LFD මණ්ඩලවල නිලධාරීන් මේ චිත්‍රපටය පෙන්වන්න කැමති වුණා. කැමති වුණේ 2014 වසරේ මුල පෙන්වන්න ලැබුණේ 2016 මුල.
මෙපමණ කල් MPC ප්‍රදර්ශන මණ්ඩලයයි LFD ප්‍රදර්ශන මණ්ඩලයයි තිබුණු සිනමා ශාලා සතුටුදායක තත්ත්වයක තිබුණේ නැහැ. නව චිත්‍රපට සංස්ථා සභාපති නීතීඥ දීපාල් චන්ද්‍රරත්න මහතා වත්මන් රජය විසින් පත්කළාට පස්සේ වෙනස් කෙරුණු චිත්‍රපට ප්‍රදර්ශන මණ්ඩල තුනෙන් එක්කළා. මේ MPC හා LFD මණ්ඩල එකතු කරලා එක් අලුත් ප්‍රදර්ශන මණ්ඩලයක් බවට පත්කළා. ඒ විතරක් නෙවේ දීපාල් චන්ද්‍රරත්න සභාපතිතුමා එම මණ්ඩලයටත් චිත්‍රපට බලන්න ජනතාව පැමිණෙන්න කැමති පහසුකම් ඇති සිනමා ශාලා ගණනාවකුත් එකතු කළා. සංස්ථාවෙනුත් සිනමා ශාලා දුන්නා. සිලෝන් තියටර් එකෙන් සිනමා ශාලා දුන්නා. ඒක ඉතා හොඳ දෙයක්.
"පටිභාන" ප්‍රදර්ශනයේදී දැනෙන ප්‍රධාන බාධකය ලෙස ඔබ දකින්නේ කුමක්ද?
චිත්‍රපට පෙන්වීමේ බාධකය ලෙස මම දකින්නේ චිත්‍රපට සංස්ථාවෙන් දෙන නියෝග හරියටම ක්‍රියාත්මක වෙන්නේ නැති වීමයි.
බුද්ධ ධර්මය පිළිබඳව යම් විවරණයක් කරන "පටිභාන" බලන්න වත්මන් ප්‍රේක්ෂකයා පෙළඹේවිද?
චිත්‍රපට කියන්නේ විනෝද මාධ්‍යයක්. ඒත් එම විනෝද මාධ්‍ය භාවිතා කළ හැකි පසුබිමක අද ජනතාව නැහැ. මෙතෙක් කල් පැවැති ආණ්ඩු තුළ ඒවාට සැලැස්මවල් හැදුණේ නැහැ. සෞඛ්‍ය සේවය බලන්න. රජය සෞඛ්‍ය සේවා සඳහා කෝටි ගණන් වියදම් කළත් ඒවායේ ප්‍රතිලාභ අවශ්‍ය මහජනයා වෙත නිසියාකාරව එන්නේ නැහැ. ලෙඩක් හැදුණොත් ආණ්ඩුවෙ රෝහලේදී බෙහෙත් දෙනවට වඩා එම වෛද්‍යවරයා පෞද්ගලිකව හමුවෙලා %චැනල්^ කරලා බෙහෙත් ගත යුතු අන්දමට සමාජය සකස් කරලා තියෙනවා. ඊට පස්සේ ඒ චැනල් කිරීම මාසෙන් මාසෙට කරන්න ඕන කියන අදහස දීලා මුළු පවුලටම පෞද්ගලිකව එම වෛද්‍යවරයාට මුදල් ගෙවල බෙහෙත් ගන්න හෝ පරීක්ෂණවලට භාජනය වෙන්න හෝ වන විදියේ ක්‍රමයක් තමයි අද ඇතිවෙලා තියෙන්නේ.
ඊළඟට පාසලට අමතරව පවුලකට ටියුෂන් අනිවාර්ය අංගයක් බවට පත්වෙලා. මේවටත් ජනතාවට වියදම් වෙනවා. මේ දේවල් ඇතුළු එදිනෙදා අවශ්‍යතාවලට තමන්ගේ පඩිය වියදම් කළාට පස්සේ ජනතාවට චිත්‍රපටයක් බලන්න වියදම් කරන්නේ හොඳට හිතල බලලායි. ව්‍යවස්ථා වෙනස්කම් අවශේෂ සංශෝධන කිරීමට පෙර ජනතාවගේ බදු හා වියදම් ජීවන බර අඩු කරන ක්‍රමයක් රජය විසින් ඇති කළ යුතුයි. ජනතාවගේ අතේ මුදල් ඉතිරි වුණාම චිත්‍රපට බලන්න පෙලඹෙනවා.
මෙවැනි තත්ත්වයක් තුළ "පටිභාන" තුළින් ලාභයක් උපයාගත හැකි අන්දම සිතුවේ නැද්ද?
නෑ. මම ලාභයක් බලාගෙන මේ චිත්‍රපටය කළේ නැහැ. මට වියදම් වුණ මුදල විතරක් ලැබුණාම ඇති කියන තැනයි මම ඉන්නේ.
මෙවැනි විෂයකට ප්‍රේක්ෂක අවධානය ලැබේ යැයි ඔබ විශ්වාස කරනවාද?
මෙවැනි බර මාතෘකාවක් ගැන තමන්ගේ දරුවන්ටත් පෙන්වන්න ඕන කියලා හිතන තෝරාගත් ප්‍රේක්ෂක පිරිසක් මේ "පටිභාන" චිත්‍රපටය බලාවි කියන විශ්වාසය මට තියෙනවා. බාල දේට අකැමැති චිත්‍රපට නොබලා නිද්‍රාජනකව ඉන්න ප්‍රේක්ෂකයන් මෙය බලාවි.
නිසි පරිදි ආදායම් නොමැති වුවහොත් සිනමාහල් ඔබට සහයෝගය නොදේවිද?
සිනමා ශාලාවල සහයෝගය මට තියෙනවා. චිත්‍රපට සංස්ථාවේ සහයෝගය මට ලැබෙනවා. මංගල දර්ශනය බලපු වෙලාවේ ඒ ප්‍රේක්ෂකයන් එය අගේ කළා. මට ලබාදී ඇති ප්‍රදර්ශන මණ්ඩලයේ සිනමා ශාලාවල සියලුම දර්ශන මගේ "පටිභාන" චිත්‍රපටයට ලබාදෙනවා නම් කටින් කට ප්‍රචාරය වෙලා මෙම චිත්‍රපටය ප්‍රේක්ෂක අවධානයට ලක්වේවි කියලා මම විශ්වාස කරනවා. මහා සංඝරත්නයට ප්‍රදර්ශනය කිරීමේ වැඩපිළිවෙළක් දැන් අපි ආරම්භ කළා.
පද්මකුමා පී. මෙත්තසේන
