'සුදු හාමිනේ' කෙළිලොල් චරිතයක්
සඳුන් රාජකරුණාගේ "ආදරේ ගින්දරක්" ටෙලි නාට්‍යයේ "දිල්කි" ලෙස ඔබ හමුවන ගීතිකා රාජපක්ෂ නව පරපුරේ ජනප්‍රිය ටෙලිනාට්‍යය නිළියකි. "ආදරේ ගින්දරක්" ටෙලිනාට්‍යයට අමතරව සිරස රූපවාහිනි නාළිකාවේ විකාශය වන "උතුම් පැතුම්" ටෙලි නාට්‍යයේ "සුදු හාමිනේ" ලෙසත්, දෙරණ රූපවාහිනි නාළිකාවේ විකාශය වන "අංකල් සෑම්" ටෙලි නාට්‍යයේ "විශ්මි" ලෙසත් ඇයි වර්තමානයේ ඔබ හමුවට පැමිණෙයි. මෙවර "සාරවිට" අපේ තරු කතාබහ හැඩකිරීමට ඇය එක්කර ගත්තෙමු.
"මේ දවස්වල වැඩිපුරම රසික ප්‍රතිචාර ලැබෙන්නේ සඳුන් රාජකරුණා මහත්මයාගේ "ආදරේ ගින්දරක්" ටෙලිනාට්‍යයේ "දිල්කි" කියන චරිතයට. මේක ටිකක් දුෂ්ට චරිතයක්. නමුත්, ගොඩ දෙනෙක් ඒ නිසාම මේ චරිතය ගැන කතා කරනවා. ඒ වගේම ආදරය කරනවා. පළමු වතාවට තමයි මෙහෙම චරිතයකට මම දායක වෙන්නේ. මේක බොහෝ පිරිසක් කළු චරිතයක් විදිහ හැඳුන්වුවත් මම හිතන්නේ මේ "දිල්කි" කියන චරිතය සාධාරණ හේතුවක් මත තමයි කළු චරිතයක් වෙලා තියෙන්නේ කියලා. එයා ආදරය කරන පෙම්වතා වෙන කෙනෙක්ගේ බවට පත්වෙනවා. ඉතින් ඒ ගැන කනගාටු වෙලා මානසිකව වැටිලා තමයි ඇය සිය පෙම්වතාටත්, පෙම්වතාගේ හිතගත්තු කෙනාටත් විරුද්ධකම් පාන්නේ. "ආදරය ගින්දරක්" ටෙලි නාට්‍යයේ "දිල්කි" කියන චරිතය වගේම "උතුම් පැතුම්" ටෙලි නාට්‍යයේ "සුදු හාමිනේ" චරිතය ගත්තොත් ඒක ටිකක් කෙළිලොල් දඟකාර චරිතයක්. ඒ වගේම "අංකල් සෑම්" ටෙලිනාට්‍යයේ %විශ්මි^ කියන්නෙ ආදරබර චරිතයක්. ඇත්තටම, එකිනෙකට වෙනස් චරිත මට රඟපාන්න ලැබුණ එක වාසනාවක් විදිහටයි මම දකින්නෙ. මම ක්ෂේත්‍රයට අලුත්. බොහෝ දුරට ක්ෂේත්‍රයට අලුතින් එකතු වෙන අය එකම රාමුවකට කොටු වෙන අවස්ථා මම දකිනවා. නමුත්, මට එහෙම වුණේ නැහැ. මේ චරිත තුනටම ලැබුණ රසික ප්‍රතිචාරත් එක්ක මම හිතනවා මේ හැම චරිතයකටම මම සාධාරණයක් ඉටුකරලා තියෙනවා කියලා."
බුද්ධික සේනාධීර
