'සිරස කුමරිය' හරහා පැමිණ 'Miss International World' තරගයට යන 'හර්ෂි'
2012 වසරේදී නිරූපිකාවක ලෙස ක්ෂේත්‍රයට පැමිණි හර්ෂි එළැඹෙන ඔක්තෝබර් මාසයේදී ඇමෙරිකාවේ මියාම් නගරයට පිටත්ව යාමට නියමිතව ඇත. ඒ "මිස් ඉන්ටර්නැෂනල් වර්ල්ඩ්" රූපරාජිනි තරගය සඳහාය. රටවල් රැසක තරගකාරියන් බොහෝ ප්‍රමාණයක් ඉදිරිපත් වන මෙම තරගය පිළිබඳව "සාරවිට" අපට හර්ෂි මෙලෙස පැවසුවාය.
මෙම තරගය ගැන මුලින්ම අපි කතාකරමු?
ඔක්තෝබර් මාසයෙ ඇමෙරිකාවේ මියාම් නගරයේ තමයි මේ තරගය පැවැත්වෙන්නෙ. ලැබෙන ආරංචිවලට අනුව මේ තරගයට ශ්‍රී ලංකාව සමගින් රටවල් බොහෝ ප්‍රමාණයක තරගකාරියන් සහභාගි වෙනවා. මේක මගේ පළමු ජාත්‍යන්තර රූපරාජිනි තරගාවලිය. ඉතින් මේ වගේ ලෝක මට්ටමින් පැවැත්වෙන තරගාවලියකට මගේ මවුරට නියෝජනය කරමින් ඉදිරිපත් වෙන්න ලැබුණ එක මට ලොකු සතුටක්. ඉතින් මගේ බලාපොරොත්තුව තමයි මේ තරගයෙන් යම් ජයග්‍රහණයක් ශ්‍රී ලංකාවට ලබාදීම. ඔක්තෝබර් මාසයේ මේ තරගය පැවැත්වුණත් ඒ සඳහා මම ලබන අගෝස්තුවේදී පිටත් වෙනවා.
නිරූපිකාවක් විදිහට ක්ෂේත්‍රයට ආවේ?
2012 අවුරුද්දේ. නිරූපිකාවක් විදිහට වැඩකරන අතරේ "චැනල් සී" නාළිකාවට සම්බන්ධ වෙලා වැඩසටහන් ඉදිරිපත් කරන්නියක් විදිහට කටයුතු කළා. ඒ හරහා විවිධ ක්ෂේත්‍රවල සිටින බොහෝ පිරිසක් හඳුනාගන්න ලැබුණා. ඊට පස්සෙ ගීත රූප රචනා, වෙළෙඳ දැන්වීම් වගේම ටෙලිනාට්‍යයවලටත් සම්බන්ධ වෙන්න අවස්ථාව ලැබුණා. නිරූපිකාවක් විදිහට ක්ෂේත්‍රයට එන්න කලින් මම "සිරස කුමරිය" තරගයට ඉදිරිපත් වුණා. එහි අවසන් තරගකාරියන් හය දෙනා අතරට එන්නට මට පුළුවන් වුණා.
හර්ෂි දැනට දායක වෙලා තියෙන ගීත රූප රචනා, වෙළෙඳ දැන්වීම් හා ටෙලිනාට්‍යය මොනවද?
දැනට මියුසික් වීඩියෝ 5ක විතර වැඩ කරලා තියෙනවා. ඒ අතර ගොඩක්ම ජනප්‍රිය වුණේ "සිරස සුපර් ස්ටාර්" තරගයෙන් ගායන ක්ෂේත්‍රයට ආපු ගාමිණී සුසිරිවර්ධනගේ "දන්නවාද මං දුකින්" කියන රූප රචනාව. හිරු රූපවාහිනි නාළිකාවේ විකාශය වෙන "ආටක නාටක" හාස්‍යමය ටෙලිනාට්‍යයටත්, රූපවාහිනි නාළිකාවේ විකාශය වෙන "සබ්බ සකලා මනා" ටෙලිනාට්‍යයටත්, TVC හා මැලිබන් වගේ ජනප්‍රිය වෙළෙඳ දැන්වීම්වලටත් මම දැනට සහභාගි වෙලා තියෙනවා.
දැන් ඔබ නිරූපිකාවක්ද, රංගන ශිල්පිනියක්ද? නැත්නම් නිවේදිකාවක්ද?
නිරූපිකාවක් හා වැඩසටහන් ඉදිරිපත් කරන්නියක්. විනෝදයට වගේ තමයි රංගනය පැත්තට යොමු වෙන්නෙ. ඉදිරියෙදී රූපලාවණ්‍ය ශිල්පිනියක විදිහටත් මගේම කියලා ව්‍යාපාරයකට යොමුවෙන්න බලාපොරොත්තුවෙන් ඉන්නවා.
නිරූපිකාවක් විදිහට මොනවද හර්ෂිගේ තියෙන ඉලක්ක?
නිරූපිකාවක් විදිහට ලොකු ගමනක් යන්න බලාපොරොත්තු වෙනවා. "මිස් ඉන්ටර්නැෂනල් වර්ල්ඩ්" වැනි ජාත්‍යන්තර තරගයක් නියෝජනය කරන්න ලැබීම මගේ තිබුණ ලොකු ඉලක්කයක්. දැන් නම් ඒ ඉලක්කය මට සපුරාගන්න ලැබිලා තියෙනවා. ඉදිරියෙදි වැඩසටහන් ඉදිරිපත් කරන්නියක් හා රූපලාවණ්‍ය ශිල්පිනියක් විදිහටත් නමක් හදාගෙන ඉදිරියට යන්නත් බලාපොරොත්තු වෙනවා. තවත් මාසයකින් දෙකකින් විතර කොළඹ ප්‍රදේශයේ මගේම කියලා රූපලාවණ්‍යාගාරයක් පවත්වන්නත් මම සැලසුම් කරමින් ඉන්නවා.
බුද්ධික සේනාධීර / ඡායාරූප - ඉසුරු පෙරේරා
