වෙළෙඳ දැන්වීම්වලට පෙනී සිටියත් අපිට හැමදාම ඒ දේවල් ලැබෙන්නෙ නැහැනේ
කලා පසුබිමක් ඔස්සේ ක්ෂේත්‍රය තුළ ඉදිරියට යමින් සිටින ඇය, 2014 වර්ෂයේ රාජ්‍ය සම්මාන උලෙළේ හොඳම නිවේදිකාව ලෙසද සම්මාන හිමිකර ගත්තාය. සිතුවිලා සිතාරා නම් වූ ඇය නිවේදිකාවක්, නිරූපිකාවක් සහ හඬකැවීම් ශිල්පිනියක් වශයෙන් ක්ෂේත්‍ර කිහිපයක්ම නියෝජනය කරයි. ඇයගේ කලාකටයුතු පිළිබඳව කතාබහ කිරීමට "අද" සමග මෙලෙස එක්වුණි.
ඔබ ගැන හඳුන්වා දුන්නොත්?
මගේ නම සිතුවිලි සිතාරා. වැඩසටහන්වලට යන්නේ ඒ නමින්. මගේ වාසගම භාවිත වෙන්නේ නැහැ. මම දැනට ජාතික රූපවාහිනියේ නිවේදිකාවක් සහ ජාතික ලොතරැයි මණ්ඩලයේ නිවේදිකාවක්. උසස් පෙළ නම් කළේ විද්‍යා අංශයෙන්. නමුත් හිතුවෙ නැහැ මේ පැත්තට එයි කියලා. පාසල් කාලයේ විවිධ දේවල්වලට සහභාගී වුණා.
මේ ක්ෂේත්‍රයට එයි කියල හිතුවද?
මේ වගේ ක්ෂේත්‍රයකට එයි කියල හිතුවෙ නැහැ. අහම්බෙන් එන්න සිද්ධ වුණා. පොඩි කාලෙ ඉඳන්ම ක්ෂේත්‍රයට එන්න විවිධ දේවල් කළා. ඉස්සර හිටපු ප්‍රවීණ නිවේදක නිවේදිකාවන් යටතේ විවිධ අවස්ථාවන් හම්බවුණා. පෞද්ගලික රූපවාහිනී නාළිකාවල විවිධ ළමා වැඩසටහන් සඳහා පුංචි කාලෙදීම අවස්ථාව ලැබුණා.
කුඩා කාලයේ තිබුණු හීනයක්ද නිවේදිකාවක් වීම?
කාලෙන් කාලෙට හීන වෙනස් වුණා. පොඩිම කාලෙ හීනයක් තිබුණා වෛද්‍යවරයෙක් වෙන්න. ඊට පස්සෙ ටික කාලයක් යද්දි ගුවන් සේවිකාවක් වෙන්න හීනයක් හිතට ආවා. අම්මයි, තාත්තයි දෙන්නම විදේශගතවෙලා හිටියෙ. ඒ නිසා නිතරම එයාර්පෝට් යනකොට හිතුණා එයාලා ලස්සනට අඳින නිසා ගුවන් සේවිකාවක් වෙන්න. අන්තිමේදී ඒ කිසිවක් නැතිව මේ වෘත්තියට එන්න සිද්ධවුණා.
නිවේදනයේ මූලික අඩිතාලම ගැන කතා කළොත්?
මට අවුරුදු 13දී විතර මට ඇසුරු කරන්න හැකිවුණා රත්නා පුෂ්පකුමාරි කියල ඉස්සර හිටියා ලංකාවේ ප්‍රවීණතම නිවේදිකාවක්. ඇය ඒ දවස්වල විවිධ වැඩමුළු තිබ්බා. අපි ඇයගේ පන්ති සඳහා දායක වුණා. ඉස්සර ගොඩක් නාළිකා තිබුණෙ නැහැනේ. ඒ නිසා ඉස්සර පොඩි ළමුන්ගේ වැඩසටහන්වලට අපි එක්කන් යනවා. අපිව ගෙනියන්නේ නිවේදනයට නෙවෙයි. සමූහ අත්වැල් ගායනයටයි. ඉතිං ඔහොම පියවරින් පියවර ඉගෙනගෙන උසස් පෙළ කළාට පස්සෙ, තරුණ සේවා සභාවේ ජනසන්නිවේදනය පාඨමාලාව කළා. ඒ පිළිබඳව හදාරමින් ප්‍රවීණයන්ව හොඳට අනුගමනය කරලා ඔවුන්ගෙන් දේවල් අරගෙන, දේවල් හදාරගෙන ඉස්සරහට ආපු ගමනක් තමයි තියෙන්නේ.
නිවේදිකාවක් වෙන්න කලින් නිරූපණ ශිල්පිනියක් නේද?
ඔව්, නිවේදිකාවක් වෙන්න කලින් මම වෙළෙඳ දැන්වීම්වලට පෙනී සිටියා. ඊට පස්සෙ සැටලයිට් නාළිකාවල සහ පෞද්ගලික නාළිකාවල ප්‍රවෘත්ති නිවේදිකාවක් විදිහට හිටියා. ප්‍රවෘත්ති පරිවර්තකයෙක් විදිහටත් කටයුතු කළා. මොකද මට හොඳට දෙමළ පුළුවන්. දැනට මම සිංහල සහ දෙමළ දෙකෙන්ම නිවේදනය කරනවා. ඒ දේ හින්දා අනිත් අයට වඩා මට පොඩ්ඩක් ඉස්මතු වෙන්න අවස්ථාවක් ලැබුණා. විවිධ සැටලයිට් නාළිකාවල යුද්ධ කාලයේදී ප්‍රවෘත්ති පරිවර්තිකාවක් විදිහට හිටියා. යාපනේ ඉන්න ප්‍රාදේශීය වාර්තාකරුවන් එවන පුවත් දමිළ මාධ්‍යයෙන් ඉදිරිපත් කරන්න අවස්ථාවක් ලැබුණා. ඒ විතරක් නෙවෙයි වෙළෙඳ දැන්වීම්වල හඬකවන්නත් අවස්ථා ලැබිලා තියෙනවා. අද වෙනකොට නිවේදන වෘත්තියෙනුත් ගමනක් යනවා.
ක්ෂේත්‍රයන් තුනක් තුළ කටයුතු කිරීමේදී යම්කිසි පැටලිලි ස්වභාවයක් තිබුණෙ නැද්ද?
එහෙම නැහැ. වෙළෙඳ දැන්වීම්වලට පෙනී සිටියත්, අපිට හැමදාම ඒ දේවල් ලැබෙන්නෙ නැහැනේ. හැබැයි ස්ථිර වෘත්තියක් විදිහට කළේ නිවේදන වෘත්තියයි. ප්‍රවෘත්ති නිවේදිකාවක් විදිහට ඒ දවස්වල හිටියා. නමුත් දැන් වැඩසටහන් නිවේදිකාවක්, ප්‍රවෘත්ති නිවේදිකාවක් විදිහට පරිවර්තන කටයුතු, ප්‍රවෘත්ති ලියන ඒවා සහ සංස්කරණ කටයුතු වැනි දේවල් තමයි වැඩිපුර කළේ. ඒක ලොකු පන්නරයක් වුණා වැඩසටහන් ඉදිරිපත් කරන්න. ගෙදරිනුත් ලොකු සහයෝගයක් ලැබෙනවා සහ මගේ සැමියත් වැඩකරන්නේ මේ ක්ෂේත්‍රයේ නිසා කිසිදු පැටලිලි සහගත තත්ත්වයක් නැහැ.
නිවේදනයෙන් කටයුතු කරන වැඩසටහන් කිව්වොත්?
විශේෂයෙන් ජාතික රූපවාහිනියේ නුගසෙවණ ඉදිරිපත් කළා. ඊට පස්සේ %මාලිමාව^ කියලා නව සොයාගැනීම් පිළිබඳව කරන වැඩසටහනක් කළා. "ඉරිදා ආයුබෝවන්" වැඩසටහන් සහ දෙමළ වැඩසටහනකුත් ඉදිරිපත් කළා. චැනල් අයි නාළිකාවේ ගිය %රිට්ස්බරි ජර්නිඩේ^ කියන වැඩසටහනත් ඉදිරිපත් කළා. ලොතරැයි දිනුම් ඇදීමේ කටයුතු සිදුකරනවා. ඊට අමතරව වෙළෙඳ දැන්වීම් සඳහා හඬකවනවා. Outdoor Events කරනවා. එවැනි කටයුතු තමා සිදුවන්නේ.
ඔබට රාජ්‍ය සම්මානයක් ලැබිල තියෙනවා නේද? ඒ පිළිබඳව කිව්වොත්?
ගිය අවුරුද්දේ, ඒ කියන්නේ 2014 වර්ෂයේ නිර්මාණවලට තමා ඒ සම්මානය ලැබෙන්නේ. 2014 වර්ෂයේ රාජ්‍ය සම්මාන උලෙළේ හොඳම නිවේදිකාව විදිහට සම්මාන ලැබුණා. ඒ සිංහල මාධ්‍යයෙන්. ඒකත් මම ඉදිරිපත් කරපු "මාලිමා" වැඩසටහනටයි.
පවුලේ සහයෝගය ගැන කතා කළොත්?
මම විවාහකයි. මගේ සැමියත් මේ ක්ෂේත්‍රයේ තමයි වැඩකටයුතු කරන්නේ. එයා බෞද්ධයා ගුවන් විදුලියේ වැඩසටහන් අධ්‍යක්ෂවරයා විදිහට කටයුතු කරනවා වගේම, ඔහුත් හොඳ නිවේදකයෙක්. ඒ හින්දා මට ඉන්න හොඳම විචාරකයා සහ ප්‍රේක්ෂකයා මගේ සැමියා. එයා තමයි මගේ අඩුපාඩු අඳින පලඳින විදිහේ ඉඳන්, භාවිත කරන වචනේ පවා හැමදෙයක්ම හරි ගස්සන්නේ. මගේ අම්මගෙනුත් හොඳ සහයෝගයක් හම්බවෙනවා. විශේෂයෙන් මතක් කරන්න ඕන, මගේ සැමියාගේ අම්මා තාත්තාත් ක්ෂේත්‍රයේ ඉන්න දෙන්නෙක්. ඔහුගේ තාත්තා ස්ටැන්ලි ලියනගේ හොඳ සංගීත අධ්‍යක්ෂක කෙනෙක්. ඔහුගේ මව කාංචනමාලා මහවිතාන. ඇය අප රටේ ඉන්න ප්‍රවීණ කලාකාරිනියක්. ඒ දෙන්නත් මගේ අඩුපාඩු පෙන්නලා දෙනවා.
Dilan Chryshantha / Pix - Chamara Lakruwan
