විදෙස් ක්‍රිකට් ක්‍රීඩකයෝ ගැන නම් දන්නේ නැහැ
වර්තමානයේ විකාශය වෙන "මෙගා" ටෙලි නාට්‍යය අතරේ විශේෂ තැනක් දෙරණ රූපවාහිනියේ විකාශය වන %දෙවෙනි ඉනිම^ට ලැබේ. එහි "සහේලී" චරිතයට පණ පොවන එමාෂා සෙනෙවිරත්න සමගින් "සාරවිට" අපි කතා බහ කළා. වෙනදා අසන ප්‍රශ්නවලට වෙනත් ප්‍රශ්න කිහිපයක් යොමු කළ අපිට එමාෂාගෙන් ලැබුණේ මෙවැනි පිළිතුරුය.
එමාෂා ක්‍රිකට් තරග නරඹනවාද?
ඇත්තම කියනවා නම් ක්‍රිකට්වලට මගේ තියෙන කැමැත්ත බොහෝම අඩුයි. මගේ ඥාති සහෝදරයෝ කිහිප දෙනෙක්ම ක්‍රිකට් ක්‍රීඩා කරනවා. ඉතින් ඒ අය එක්ක එකතු වුණාම මම ක්‍රිකට් තරග නරඹනවා.
කැමති ක්‍රිකට් ක්‍රීඩකයෙක් ඉන්නවාද?
මම කැමතියි කුමාර් සංගක්කාර හා මහේල ජයවර්ධන දෙදෙනාටම. හේතුව තමයි ඔවුන් දෙදෙනා නිතරම දක්ෂතා අතර හිටිය ක්‍රීඩකයෝ දෙනේනෙක්. ඒ වගේම මහේල හා සංගක්කාර කියන දෙන්නම ලංකාවේ ක්‍රිකට් ජාත්‍යන්තරයේ ඉහළටම ගෙනගිය ක්‍රීඩකයෝ දෙදෙනෙක්. මං දන්න විදිහට ඔවුන් දෙදෙනාගේ නමින් බොහෝ ක්‍රිකට් වාර්තා තියෙනවා.
විදෙස් ක්‍රීඩකයෙකුට කැමැත්තක් නැද්ද?
නැහැ. ඇත්තම කියනවා නම් විදෙස් ක්‍රිකට් ක්‍රීඩකයන්ගේ නම් මම දන්නේ නැහැ.
බලපු හොඳම ක්‍රිකට් තරගයක් මතකද?
2011 වසරේ තිබුණ එක්දින ලෝක කුසලාන තරගාවලිය නැරඹුවා. මගේ මතකය හැටියට අපේ ශ්‍රී ලංකා කණ්ඩායම තමයි ඉන්දියාවත් එක්ක අවසන් තරගයට ක්‍රීඩා කළේ. ඒ තරගාවලියේ ශ්‍රී ලංකා කණ්ඩායම ක්‍රීඩා කරපු තරග කිහිපයක්ම මම නැරඹුවා.
වර්තමානයේ ලංකාවේ ක්‍රිකට් ගැන ඔබේ මතය කුමක්ද?
ගොඩක් දක්ෂ ක්‍රීඩකයෝ අපිට ඉන්නවා. නමුත්, ඔවුන් නිසි ක්‍රමවේදයකට අනුව ප්‍රතිපල ගන්නේ නැහැ. හොඳට පුහුණුවිම්වල යොදවලා සුදුස්සාට නියම තැන ලබාදුන්නොත් ලංකාවේ වර්තමානයේ තියෙන ක්‍රිකට්වල තත්ත්වය මීට වඩා වෙනස් වෙන්න පුළුවන් වේවි කියලා මම හිතනවා.
ක්‍රිකට් ක්‍රීඩකයෙකුගෙන් ආදර යෝජනාවක් ලැබුණොත්, එය ඔබ භාර ගන්නවාද?
මෙහෙමයි, ක්‍රිකට් ක්‍රීඩකයෙකු විතරක් නොවෙයි ඕනෑම ක්ෂේත්‍රයක වැඩ කරන කෙනෙකුගේ ආදර යෝජනාවක් ආවොත් මම භාරගන්නවා. නමුත්, මම ඒ යෝජනාව භාරගන්න කළින් කැමතියි ඒ යෝජනාව කරන කෙනා දැන අඳුනගන්න. ඒ වගේම මම ඔහුගේ ගති පැවතුම්, සිරිත් විරිත් වගේ දේවලුත් බලනවා. ඒ දේවල් මගේ සිතුම් පැතුම් එක්ක ගැළපුණොත් මම ඔහුගේ ආදර යෝජනාව භාරගන්නවා.
ක්‍රිකට් ක්‍රීඩකයන් සජිවිව මුණ ගැහිලා තියෙනවාද?
නැහැ. තවමත් එහෙම අවස්ථාවක් මට ලැබිලා නැහැ.
ක්‍රිකට් ක්‍රීඩාව ගැන දැනුමක් ඔබට තියෙනවාද?
මගේ ලොකු කැමැත්තක් නැහැ ක්‍රිකට්වලට. ඒ නිසා ඒ ගැන දැනුමක් මට නැහැ. අඩුම තරමේ කණ්ඩායමකට ක්‍රීඩා කළ යුතු ක්‍රීඩකයන් ප්‍රමාණයවත් මම දන්නේ නැහැ.
