ලෝක මිහිකත කිරුළ සොයා යන අපේ රූ රැජිණ
දෙරණ සහ ෆෝඑවර් මිස් ශ්‍රී ලංකා 2016 කිරුළ හිමිකරගත් ඇය ඩිමන්ති එදිරිරත්නය. එළැඹෙන 2016 ලෝක මිහිකත රූ රැුජින තරගය සඳහා ශ්‍රී ලංකාව නියෝජනය කිරීමට මේ සමගම වරම් ලබා සිටින්නේ ඇයයි. ලෝක මිහිකත කිරුළ සොයා යන ඩිමන්ති ඊට පෙර සඳැල්ලට ආ මොහොතකි මේ.
ඩිමන්ති ඔබ ගැන විස්තර ටිකක් කිව්වොත්.
මට වයස අවුරුදු 20 යි. ඉගෙන ගත්තෙ කොළඹ මියුසියස් විද්‍යාලයෙන්. දැනට කොතලාවල ආරක්ෂක විද්‍යාපීඨයේ උපාධිය හදාරමින් සිටින්නේ.
එයින් ඔබ බලාපොරොත්තු වන්නේ හමුදා සේවයට එක්වීමටද?
නැහැ. මෙහෙයුම් කළමනාකරණය හැදෑරීම කරන්න.
පවුලේ විස්තර කිව්වොත්.
පවුලේ එකම දරුවා මමයි.
තාත්තා ව්‍යාපාරික ක්ෂේත‍්‍රයේ. අම්මා ගෘහණියක්. අපි තුන්දෙනා සතුටින් ජීවිතය ගත කරන්නේ.
ඩිමන්තිට මොන වගේ අරමුණුද තිබුණේ.
කුඩා කාලයේ ඉඳලාම මගේ අරමුණු වුණේ රූ රැජිනක වීමටයි. උසස් පෙළ හමාර කළාට පසුව ඊට එළැඹීමේ අපේක්ෂාව තිබුණා. ඒ නිසා තමයි මේ තරගයට ඉදිරිපත් වුණේ. ඒ ආසාව සඵල වුණා.
අධ්‍යාපන කටයුතු තවදුරටත් කිරීමෙන් බලාපොරොත්තු වන්නේ?
අධ්‍යාපනයෙන් හැකිතාක් ඉහළට යා යුතුමයි. ඒ වගේම අනාගතයේදී ව්‍යාපාරික හෝ කළමනාකරණ අංශයේ වෘත්තියක නියැලේ නම් ඒකටත් වැදගත් වේවි.
ඇයි රූ රැජිනක් වීමට ඔබ සිහින මැව්වේ?
ඒ මගින් රට නියෝජනය කරලා ජාත්‍යන්තරව ලොකු ජයග‍්‍රහණයක් මගේ රටට ගෙනදීම අරමුණ වුණා. ඉන්පසුව සමාජයටත් සේවයක් කළ හැකියි.
කී දෙනෙක් අතරින්ද ඔබ ශ්‍රී ලංකා කිරුළට හිමිකම් දැරුවේ.
පළමුවෙන්ම 500 ක් පමණ දෙනා සහභාගී වුණා. ඒ අතරින් කණ්ඩායම් ලෙස ටිකෙන් ටික තෝරා අවසානය දක්වා ආ ගමනේදී තරගකාරියන් 12 දෙනෙක් අවසන් මහ තරගයට තේරුණා. ඒ දොළොස් දෙනා හට උප කිරුළු ලැබුණා. එනම් මිනි කිරුළු ලැබුණා. ඒ අතරිනුත් මට මිනි කිරුළු හතරක් හිමිවුණා.
දැන් මේ සමගම තවත් මොන වගේ අංශවලට දායක වීමටද බලාපොරොත්තු වන්නේ.
අපට මේ ලැබුණු වටිනා මනුෂ්‍ය ජීවිතයෙන් සමාජයට වැඩදායි යමක් කළ හැකියි. සමාජයේ යහපත උදෙසා සමාජයට බලපෑමක් කළ හැකි චරිතයක් වීම මගින් බොහෝ දේ කළ හැකියි. විශේෂයෙන්ම මේ තරගය පැවැත්වුණේ පරිසරය තේමාකර ගෙනයි. අපේ රටේ පරිසරය බෙහෙවින් දුෂණය වෙන අවස්ථා තිබෙනවා. ඒ වගේම ලස්සන පරිසරයක් අපට තිබෙනවා. දුෂණය වන පරිසරය ලස්සන කරවීමට සහ සොබාදහමේ වටිනාකම රැක ගැනීම උදෙසා යමක් කිරීම මගේ ප‍්‍රධාන අරමුණයි. ඒ පණිවුඩය මගේ රටේ සිට ලෝකයට ගෙන යන අතරේ ආරාධනා ලැබුණොත් නිරූපණයට පැමිණීමටත් රඟපෑමටත් දායක වෙනවා.
ඔබට සමාජයට බලපෑමක් කළ හැකි වේවි කියලා විශ්වාස කරනවද?
අනිවාර්යෙන්ම කළ යුතුයි. සමාජයේ යහපත උදෙසා සමාජයට අවශ්‍ය දේ වෙනුවෙන් අප පෙනී සිටිය යුතුමයි. මේ කිරුළ එනම් ශ්‍රී ලංකාවේ මිහිකත රැුජින වීම ඊට හොඳ පාලමක් වුණා. ලෝක තරගයෙන් ජය ලැබුණොත් මගේ රටට ලොකු දෙයක් කළ හැකි වේවි.
‘‘ඩිමන්ති’’ යන්නෙහි තේරුම
දියමන්තියක් කියන එකයි.
ඒ කියන්නේ ඔබ හරි වටිනවා කියන එක නේද?
මගේ අම්මටයි තාත්තටයි මම වටිනාම වස්තුවක් තමයි.
ඩිමන්ති දියමන්තියක් වගේ වටිනවා කියලද කියන්නේ.
දියමන්තියක් වගේ සමාජයට එළිය දෙන්න කැමතියි.
ඔබගේ ඇතුළාන්තය ගැන කතා කළොත්?
සුහදව කා සමගත් කටයුතු කරන්න පුළුවන් කෙනෙක්. සමහර විට මම කතා කරනවා වැඩි ඇති. හැමෝටම කරුණාවන්තයි. ඒ වගේම නිතරම නායකත්වය අරගෙන කටයුතු කරන්න කැමතියි. නිකම්ම නායකත්වය අරගෙන කටයුතු කරනවාට වඩා නායකත්වයේ වගකීම ඉටුකරන්න පුළුවනි.
ලෝක මිහිකත රූ රැජිණ සඳහා කවදාද පිටත්ව යන්නේ.
ඔක්තෝබර් මාසයේ 6 හෝ 7 පිටත්වීමට නියමිතයි.
එම තරගය කොහේද පැවැත් වෙන්නේ
පිලිපීනයේදීයි.
ඔබ ජය ලබාවී කියල හිතනවද?
අනිවාර්යෙන්ම, එහෙම හිතාගෙන තමයි යන්නේ. කිරුළ බලාපොරොත්තුව ගියොත් කිරුළම නොලැබුණත් මගේ රටේ අභිමානයට යමක් කළ හැකිවේ යැයි කියා විශ්වාස කරනවා.
එහෙම නම් ඔබට ජය. බොහොම ස්තුතියි.
ඒ ආශිර්වාදය හරි වැදගත්.
හැඩගැන්වීම් සැලෝන් කැපලෝ (Capello)
සටහන / ඡායාරූප සඳුන් ගමගේ
