රියැලිටිකරණයෙන් සංගීත ක්‍ෂේත්‍රයට පිවිසි පුබුදු හර්ෂණී
රියැලිටිකරණයෙන් සංගීත ක්‍ෂේත්‍රයට පිවිසි ඇය නමින් පුබුදු හර්ෂණී දේවප්‍රියයි. ගීත කිහිපයක් හරහා රසික ආදරය දිනාගත් ඇය ඇගේ අලුත්ම ගීතයක් එළිදැක්වීමට කටයුතු කරමින් සිටින්නීය. ඒ පිළිබඳව හා ඇගේ අලුත් කලා තොරතුරු සම්බන්ධයෙන් ‘සාරවිටට’ මෙලෙසින් සඳහන් කළාය.
ඔබ ගැන කෙටි හැඳින්වීමක් කළොත්?
මම පුබුදු හර්ෂණී දේවප්‍රිය. මම ඉන්නේ කුරුණෑගල.
රැකියාවක් කරනවාද? ඉගෙන ගන්නවාද? නැත්නම් වෙනත් කාර්යයක් තියෙනවාද?
මේ දවස්වලනම් මම විශාරද විභාගයට ලියන්න සූදානම් වෙනවා. ඊට අමතරව සංගීත ප්‍රසංග සඳහාත් සහභාගී වෙනවා. හඬ කැවීමේ කටයුතුවලත් නිරත වෙනවා.
සංගීතයට එකතු වෙන්නේ කොයි කාලේද?
කුඩා කාලයේ ඉඳලම සංගීතයට යොමුවෙලා තිබුණේ. ඉස්කෝලේ යන කාලේ ඉඳන්ම සංගීත තරගයන් සඳහා සහභාගී වුණා. 2014 සිරස සුපර්ස්ටාර් එකේ 10 වෙනියට මම තේරුණා. ඒකට අයදුම් කළේ මගේ මාමා. ඒ සඳහා මගේ පවුලේ අය තමයි ශක්තියක් වුණේ. ඒ හරහා තමයි ගොඩක් දෙනා අතරට මාව හඳුනා ගත්තේ.
දැනට ගීතයක් නිර්මාණය කරලා තියෙනවාද?
2014 සිරස සුපර්ස්ටාර් සීසන් 06 වැන්නෙන් තරගයෙන් ඉවත් වෙනවා එක්කම සිරසෙන් මට ගීතයක් නිර්මාණය කළා. මම තරගයෙන් ඉවත් වෙලා අවසන් වටය එන්නත් කලින් තමයි මට ගීතයක් නිර්මාණය කළේ. ඒ දවස්වල ඒ ගීතය සිරස නාළිකාව ඔස්සේ ප්‍රචාරය වුණා. ඊට පස්සේ සිරස ඔස්සේ නත්තල් ගීත, අවුරුදු ගීත සඳහා දායක වුණා. මමත් නත්තල් ගීතයක් සහ අවුරුදු ගීතයක් කළා. ඒකත් නාළිකාවේ ගියා. ඊට අමතරව මගේ අලුත්ම විදිහේ නිර්මාණයක් එන්න තියෙනවා. හොඳ නිර්මාණ දෙන්න තමයි මගේ බලාපොරොත්තුව.
අවුරුදු ගීතය සහ නත්තල් ගීතය ගැන කිව්වොත්?
මේ අවුරුද්දේ කරපු අවුරුදු ගීතය කිව්වොත්, ‘පරණ කෝන්තර’ කියලා. ඒක මම, දුමාල්, නදිනි, රුක්මන් අසිත වැනි ගායකන් දායක වුණා.
මම හැම අවුරුද්දකම ගීත කළා.
එළිදක්වන ගීතය ගැන කිව්වොත්?
ඒ ගීතය කවර් ගීතයක්. ඒගැන දැන්මම කියන්න බැහැ. දැන්මම කිව්වොත් එහෙම අගේ නැති වෙනවානේ. ඒක් හින්දි ගීතයක් සහ සිංහල ගීතයක් මික්ස් කරලා යන ගීතයක්. දැනට මම ඕඩියෝවක් කරලා තියෙන්නේ. ඒකේ වීඩියෝව තාම කරලා නැහැ. මගේම තව අලුත් නිර්මාණයක් ජනවාරි මුල එන්න තියෙනවා.
ඉදිරි බලාපොරොත්තු?
ඉදිරියේදී මම ගොඩක් දුරට සංගීත මම හදාරනවා. අලුත් අලුත් දේවල් මම ඉගෙන ගන්නවා. ඉස්සරහට ජනතාවගේ ආදරය දිනාගෙන එයාලට කැමති විදිහට තමයි නිර්මාණය කරන්න තමයි බලාපොරොත්තු වෙන්නේ. ඉක්මනින් ඇවිල්ලා, ඉක්මනින් යන්න නෙමෙයි බලාපොරොත්තු වෙන්නේ.
අතහිත දීපු අය ගැන මතක් කළොත්?
මුලින්ම මගේ අම්මයි, තාත්තයි. මට අවුරුදු 03 තිබුණු හඬ මට තාමත් අහන්න තියෙනවා. අඬන එකේ ඉඳලම තාම අහන්න පුළුවන්කම තියෙනවා. මගේ අක්කා සරල ගීත ගායිකාවක්. ගුවන් විදුලියේ එයා ගීත ගායනා කරනවා. මගේ හැකියාවට එයා ගොඩක් උදවු කළා. ඒකට ගොඩක්ම ශක්තිය වුණේ මගේ මාමා සහ නැන්දයි. එයාලා තමයි මාව මේ තරමට මෙතනට ගෙනල්ලා තියෙන්නේ. විශේෂයෙන් ඒ අයව මතක් කරනවා. මගේ යාළුවෝ සහ මට උදවු කරපු හැමෝමව මතක් කරනවා.
ඩිලාන් ක්‍රිෂාන්ත / ඡායාරූප - කවීත් මිලින්ද
