රඟපාන්න මම කැමති නැහැ
වෙළෙඳ දැන්වීම් හා ගීත රූප රචනාවල නිතර දකින ප්‍රශානි පෙරේරා සමගින් මෙවර 'සාරවිට' තරු කතාබහ අරඹන්නට අපි බලාපොරොත්තු වුණෙමු. ඉතා කෙටි කාලයක් තුළදී නිරූපණ ක්ෂේත්‍රය තුළ ජනප්‍රිය වුණ ප්‍රශානි, වර්තමානය වනවිට බොහෝ පිරිසකගේ අවධානය දිනා සිටින යොවුන් නිරූපිකාවක්ද වේ. අපි ඇයගෙන් මෙසේ ඉදිරි කලා කටයුතු පිළිබඳව තොරතුරු විමසුවෙමු.
ප්‍රශානි මේ දවස්වල ටිකක් කාර්යබහුලයි නේද?
ඔව්, මේ දිනවල 'බ්‍රයිඩ්ල් ෂෝ' කිහිපයකටම දායක වුණා. ඒ නිසා ටිකක් විතර කාර්යබහුල වෙන්න සිදුවුණා. ඊට අමතරව අලුත් ගායකයන් කිහිප දෙනෙකුගේම 'මියුසික් වීඩියෝ' සඳහා රංගනයෙන් දායක වෙන්නත් පසුගිය දවස්වල අවස්ථාව ලැබුණා.
ප්‍රශානි කියන්නේ නිරූපිකාවක්ද? රංගන ශිල්පිනියක්ද?
නැහැ, මම කැමති නැහැ මාව නිරූපිකාවක් හා රංගන ශිල්පිනියක් විදිහට හඳුන්වනවට. මොකද මේ මගේ වෘත්තීය නෙමෙයි. මම නිරූපිකාවක් විදිහට වැඩ කරන්නේ විනෝදයට.
හැබැයි පුංචි කාලේ හීනේ වුණේ වෙන වෘත්තියක් නේද?
ඔව්. මම පුංචි කාලේ හීන මැව්වේ 'ෆැෂන් ඩිසයිනර්' කෙනෙක් වෙන්න. නමුත්, ඒ පැතත්ට යොමු වෙනන් බැරිවුණා. හැබැයි තාමත් මම කැමතියි 'ෆැෂන් ඩිසයිනර්' කෙනෙක් විදිහට වැඩ කරන්න. නමුත්, නිරූපිකාවක් විදිහට තියෙන වැඩ එක්ක ඒ පැත්තට යොමු වෙන්න කාලයක් වෙන්කරන්න අපහසුයි. ඒ එක්කම ඒ අදහස මගේ හිතෙන් ඈත් වුණා.
ප්‍රශානි ගීත රූප රචනා වගේම වෙළෙඳ දැන්වීම්වල නිතර දකිනවා?
මම ඒ වගේ කලා නිර්මාණවලට කැමතියි. මොකද, මට කාලය ඉතිරි කරගන්න ඒ වැඩවලදී පුළුවන්. වැඩත් එක්ක ඒකාකාරී වෙන්න මම කැමති නැහැ. මට නිදහසත් අවශ්‍යයි. මොකද කලින් කිව්වා වගේ මම මේක කරන්නේ විනෝදයට නිසා.
ප්‍රශානි රසිකයන් අතරට ගියේ?
'සිංගර්', 'චන්ද්‍රාලේප', 'සිග්නල්', 'පීසා හට්‘, ‘ජාතික ලොතරැයි මණ්ඩලයේ‘, ‘චවිකාන්ති‘, ‘පෑන් ඒෂියා ඉන්ෂුරන්ස්“, 'වැස්ලින්' වෙළෙඳ දැන්වීම් හරහා. ඊට අමතරව මියුසික් වීඩියෝ බොහොමයක් හරහා මට රසිකයන් අතරට යන්න පුළුවන් වුණා.
නිරූපිකාවක්, රංගන ශිල්පිනියක් විදිහට ඔබේ ඉදිරිය?
එහෙම ලොකු ඉලක්ක මට නැහැ. නිරූපිකාවක් විදිහට සාමාන්‍ය මේ ගෙවන විදිහටම ගෙවෙයි. රඟපාන්න මගේ අදහසක් නැහැ. ඒ හින්දා නිරූපිකාවක් විදිහට පුළුවන් කාලයක් මම වැඩ කරයි.
ක්ෂේත්‍රයේදී උදව් කළ අය මතක් කළොත්?
විශේෂයෙන්ම මගේ අම්මා හා තාත්තා දෙන්නා. තව දිලුම්, තිලංක, බියුමාල්, අශාන්, අජන්ත, සමීර යන අයියලාව මතක් කරන්න ඕන.
බුද්ධික සේනාධීර / ඡායාරූප - කවීත් මිලින්ද
