රඟපාන්න මම කැමති නැහැ
නර්තන ශිල්පිණියක් විදිහට කලා කලා ක්ෂේත්‍රයට එක් වූ දිල්රුක්ෂිකා ප්‍රනාන්දු මේ වනවිට නිරූපිකාවක ලෙස නිරූපණ ක්ෂේත්‍රයටද අවතිර්ණ වී සිටියි. නිරූපිකාවකට අමතරව, වෙළෙඳ දැන්වීම් හා ගීත රූප රචනා සඳහා පෙනී සිටින නිරූපිකාවක ලෙසද කටයුතු කරන ඇය සිය අලුත්ම තොරතුරු මෙසේ "සාරවිට" අපිට පැවසුවෙමු.
දිල්රුක්ෂි දැන් ජනප්‍රිය වෙළෙඳ දැන්වීම් නිරූපිකාවක් වෙලා නේද?
ඔව්. මේ දිනවල විකාශය වෙන රූපවාහිනි වෙළෙඳ දැන්වීම් කිහිපයකම මා පෙනී සිටිනවා. ඒ අතරින් බොහෝදෙනෙකු අතර ජනප්‍රිය වෙලා තියෙන්නේ "සිග්නල්" දත් බෙහෙත් වෙළෙඳ දැන්වීමයි.
දැනට වෙළෙඳ දැන්වීම් කොපමණ ප්‍රමාණයක ඔබ රඟපාලා තියෙනවාද?
වෙළෙඳ දැන්වීම්වලට සම්බන්ධ වුණේ නම් මෑතකදී. දැනට "සිග්නල්" දත් බෙහෙත් වෙළෙඳ දැන්වීමත් එක්ක කිහිපයක් කරලා තියෙනවා. ඉදිරියට එන්නත් තව දෙක තුනක් තියෙනවා.
ගීත රූප රචනා?
ගොඩක් නැහැ. සිරස "ඩාන්සින් ස්ටාර්"තරගය හරහා ආපු නිසා මට ආරාධනාවක් ලැබුණා. සිරස සුපර් ස්ටාර් දසුන් මධුසංකගේ ගීතයකට පෙනී ඉන්න. ඒක තමයි මම මුලින්ම රඟපෑ ගීත රූප රචනාව.
පුංචි කාලේ තිබුණ හීනය?
නර්තන ශිල්පිණියක් හා නර්තන ගුරුවරියක් වෙන්න.
නිරූපිකාවක් විදිහට ක්ෂේත්‍රයට ඇවිල්ලා කොපමණ කල් වෙනවාද?
අවුරුදු 2කට ආසන්න වෙනවා. මේ කාලය තුළ නිරූපිකාවක් විදිහට ක්ෂේත්‍රය තුළ ජනප්‍රිය වෙලා ඉන්නවා. මුලින්ම ක්ෂේත්‍රයට එකතු වුණේ "බ්‍රයිඩ්ල්" ෂෝ වලට. දැන්නම් හැම නිරූපණ ප්‍රසංගයකටම වාගේ සහභාගී වෙනවා. මම බලාපොරොත්තුවෙන් ඉන්නවා නිරූපිකාවක් විදිහට ක්ෂේත්‍රය තුළ දිගු ගමනක් යන්න.
ක්ෂේත්‍රයට ආවේ?
සිරස "ඩාන්සින් ස්ටාර්" දෙවැනි අදියරයට මම සම්බන්ධ වුණා. අන්තිම 12 දෙනා අතරට ආවා. මම නර්තනයට ගොඩක් දක්ෂ කෙනෙක්. සිරස "ඩාන්සින් ස්ටාර්" තරගාවලිය හරහා ගොඩදෙනෙක් අඳුන ගන්න ලැබුණා. ඒ අඳුනාගැනීම මත නිරූපිකාවක් විදිහට ක්ෂේත්‍රයට සම්බන්ධ වුණේ.
නර්තන ශිල්පිණියක් විදිහට දිගටම වැඩ කරන්න කැමති නැද්ද?
නිරූපිකාවක් වුණහම ටිකක් කාර්යබහුල ජීවිතයක් තමයි ගත කරන්න ලැබෙන්නේ. ඉතින් නිරූපණ වැඩයි, ඩාන්සින් වැඩයි දෙකක් කරන්න බැහැ. දෙකෙන් එක ක්ෂේත්‍රයක් තමයි තෝරගන්න පුළුවන් වෙන්නේ. ඉතින් මම නිරූපණය පැත්ත තෝරගත්තා.
රඟපාන්න ආරාධනා ලැබුණෙ නැද්ද?
ගොඩක් ලැබුණා. ඒත් මම රඟපාන්න කැමති නැහැ. මොකද ඒක කාර්යබහුල ක්ෂේත්‍රයක්. අනික මම කැමතියි නිදහස් ජීවිතයක් ගතකරන්න. ඒ නිසා මම රංගනය පැත්ට ඉදිරියටත් යොමු වෙන්න අදහසක් නැහැ.
ඔබ විවාහකයි?
ඔව්.
ක්ෂේත්‍රය තුළ කටයුතු කිරීමේදී ඔබේ සැමියාගෙන් ලැබෙන සහයෝගය?
ඇත්තටම හොඳ සහයෝගයක් ලැබෙනවා. ඔහු වගේ කෙනෙක් මගේ ජීවිතයට සම්බන්ධවීම ගැන මම ගොඩක් සතුටු වෙනවා. මම වැඩ කරන ක්ෂේත්‍රය කාර්ය බහුලයි. ඉතින් ඔහු මාව තේරුම්ගෙන මගේ වැඩවලට උදවු කරනවා. ඊට අමතරව මගේ අම්මා, තාත්තා මේ හැමදෙනාමත් මට ගොඩක් උදවු කරනවා.
කතාබහ - බුද්ධික සේනාධීර / ඡායාරූප - රොමේෂ් ධනුෂ්ක
