'මොඩල්' කියන්නේ වටින වෘත්තියක්
නිරූපිකාවක් ලෙස ඉතා කෙටි කාලයක් තුළදී නිරූපණ ක්ෂේත්‍රය තුළ නමක් දිනාගත් ඉෂු ඉදන්තොට සමගින් මෙවර 'සාරවිට' තරු කතා බහ අපි අරඹන්නට බලාපොරොත්තු වුණෙමු. නිරූපිකාවක් ලෙස දිගු ගමනක් යන්නට අපේක්ෂාවෙන් පසුවන ඉෂු රංගනයට ඉදිරි කාලයේදී එක්වීමටද බලාපොරොත්තුවෙන් සිටියි.
පුංචි කාලේ නිරූපිකාවක් වෙන හීනය ඉෂුට තිබුණද?
පුංචි කාලේ ඉඳලා මම රංගනයට, නර්තනයට දක්ෂ කෙනෙක්. ඉතින් අ.පො.ස උසස් පෙළ විභාගයට පෙනී හිටියාට පස්සේ නිරූපිකාවක් විදිහට වැඩ කරන්න මට අවශ්‍ය වුණා. නමුත්, ඊට කලින් මගේ උනන්දුව තිබුණේ රූපලාවණ්‍ය පැත්තට. ඉතින් ඒ පිළිබඳව හැදෑරීම් කළා. පස්සේ මගේම කියලා රූපලාවණ්‍යාගාරයක් පටන් ගත්තා.
නිරූපිකාවක් වුණේ කොහොමද?
රූපලාවණ්‍යගාරයේ වැඩ කරන කොට මට අවස්ථාව ලැබුණා. තරුණි පුවත්පතේ මුල් කවරය සරසන්න අවස්ථාව ලැබුණා. ඒ හරහා යම් පිරිසක් හඳුනගන්න පුළුවන් වුණා. ඊට පස්සේ තමයි නිලු මොඩල් ඇකඩමි එකට සම්බන්ධ වෙලා එහි සාමාජිකාවක් වුණා. ඔය විදිහට තමයි නිරූපණ ක්ෂේත්‍රයට යොමු වුණේ.
දැන් කොපමණක් කල්ද නිරූපිකාවක් විදිහට වැඩ කරන්න අරගෙන?
ලොකු කාලයක් නැහැ. මම හිතන්නේ මාස 06ක් විතර ඇති දැන් නිරූපණ ක්ෂේත්‍රයට සම්බන්ධ වෙලා.
ඔබ මෑතකදී රූපරාජිනි තරගයකටත් සම්බන්ධ වුණා නේද?
ඔව් 'Revlon miss univers 2016' පැජන්ට් එකට ඉදිරිපත් වුණා. තරගය තිබුණේ අගෝස්තු 16 වැනිදා. අවසන් තරගකාරියන් 12 අතරට ආවා මම. මට හම්බ වුණේ 08 වැනි තැන. ඒ වගේම 'Best Figure' ලෙසත් මම එහිදී සම්මාන දිනාගත්තා.
ගීත රූප රචනා, වෙළෙඳ දැන්වීම්වලට දායක වෙලා නැද්ද?
කඳුරට වෙළෙඳ දැන්වීම්ට දායක වුණා. ඊට අමතරව ගීත රූප රචනා කිහිපයකටත් දැනට සම්බන්ධ වෙන්න ආරාධනා ලැබිලා තියෙනවා. ඒ වගේම මම කෙටි චිත්‍රපටයක රඟපාලා තියෙනවා.
රංගනයට පැත්තට යොමු වෙන්න කැමතිද?
ඔව්, ලොකු කැමැත්තක් තියෙනවා. ආරාධනාවක් ලැබුණොත් අනිවාර්යයෙන්ම රංගනය පැත්තට මම යොමු වෙනවා.
අද ලංකාවේ මොඩල් කෙනෙක්ට තියෙන තැන කොහොමද?
ඇත්තම කිව්වොත් ලංකාවේ සංස්කෘතියත් එක්ක මිනිස්සු නිරූපිකාවක් දිහා බලන විදිහ වෙනස්. එක එක පුද්ගලයක් එක දකින්නේ විවිධ කෝණවලින්. මම හිතන විදිහට නම් 'මොඩල්' කියන්නේ වටිනා වෘත්තියක්.
නිරූපිකාවක් විදිහට ඉලක්ක තියෙනවාද?
මගේ ටාගට් එක තමයි 'ටොප් මොඩල්' කෙනෙක් වෙන එක. එක මගේ පළමුවැනි ටාගට් එක. ඒ වගේම පසුවට 'ඉන්ටර්නැෂනල් මොඩල්' කෙනෙක් වෙන්න බලාපොරොත්තුවෙන් ඉන්නවා. ඒ හැම දේම කරන්නේ මට ගැළපෙන දේවල්වලින් විතරක් කියලත් මතක් කරන්න ඕනා.
උදව් කළ අය ගැනත් සඳහනක් කරමුද?
මගේ අම්මා, තාත්තා දෙන්නව මේ වෙලාවේදී මතක් කරන්න ඕනා. ඒ වගේම මගේ අනෙකුත් පවුලේ සාමාජිකයන් සියලු දෙනාම. නිලු සේනානායක, අර්ජුන් සේනානායක, මට 'මිස් යුනිවර්ස්' පැජන්ට් එකේදී පුහුණු කළ ලෝ චෑන් වොන්ග් හා මගේ ළඟින් ඉන්න හැමෝම අය මට උදව් කළා.
බුද්ධික සේනාධීර / ඡායාරූප - ඉසුගේ ෆේස්බුක් ගිණුම
