මම මූලිකත්වය දීලා තියෙන්නෙ මගේ රැකියාවට
පාසල් යන අවධියේ සිටම කලා කටයුතුවලට සම්බන්ධ වූ සංජු රවිශ්මි වර්තමානය වනවිට නිරූපිකාවක මෙන්ම රංගන ශිල්පිනියක ලෙසද කටයුතු කරන්නීය. විනෝදයට කලා කටයුතුවලට සම්බන්ධ වී සිටින සංජු දැනට පෞද්ගලික ආයතනයක සේවය නිතරව සිටින්නීය.
සංජු ක්ෂේත්‍රයට ආවේ?
මම පාසල් යන අවධියේමයි. 2012 අවුරුද්දේ විතර ඇති. රූපලාවණ්‍ය ශිල්පිනියකගෙන් ආරාධනාවක් ලැබුණා දෙරණ රූපවාහිනි නාළිකාවේ විකාශය වුණ "රූ මායා" කියන වැඩසටහනට නිරූපිකාවක විදිහට වැඩ කරන්න. ඒ තමයි මගේ පළමු නිරූපණ කටයුත්ත.
ඔය අතරේද අවුරුදු කුමරි තරගවලටත් ඉදිරිපත් වුණේ?
2015 අවුරුද්දේ ස්වාධීන රූපවාහිනි නාළිකාව මගින් සංවිධානය කළ "අයි.ටී.එන්" අවුරුදු කුමරිය තරගයේ අවසන් තරගකාරියන් 12 දෙනා අතරට ආවා. මේ අවුරුද්දෙ ස්වර්ණවාහිනි නාළිකාව සංවිධානය කළ "ස්වර්ණ කුමරිය" තරගයේ පළමු තැන දිනාගත්තා.
අවුරුදු කුමරියක් වූ පමණින් බොහෝ දෙනෙකුට රංගන වරම් ලැබෙනවා. ඔබටත් එහෙම අවස්ථා ලැබුණාද?
ඔව්. මම දැනට ටෙලිනාට්‍යය දෙකක රඟපාලා තියෙනවා. ඒ ටෙලිනාට්‍යය දෙකම විකාශය වුණේ ස්වාධීන රූපවාහිනි නාළිකාව තුළ. "ආදර වැස්සක්" හා "මේඝා" කියන ටෙලිනාට්‍යය. "ආදර වැස්ස" ටෙලිනාට්‍යයේ මා රඟපෑවේ රිතු අකාර්ෂාගේ හොඳම යාළුවා විදිහට. චරිතේ නම වුණේ "සංජු" කියලා. "මේඝා" ටෙලි නාට්‍යයේ "චාපා" කියන චරිතේ තමයි මම නිරූපණය කළේ. ඉදිරියේදී තවත් ටෙලිනාට්‍යය කිහිපයකට ආරාධනා ලැබිලා තියෙනවා. නමුත්, මගේ රැකියාවත් එක්ක ඒ වැඩකටයුතුවලට ඉඩක් සොයා ගන්න එක තමයි දැන් අමාරුම වැඩේ වෙලා තියෙන්නේ.
සංජු කියන්නේ නිරූපිකාවක්ද? රංගන ශිල්පිනියක්ද?
නිරූපිකාවක්. රංගනය පැත්තට මම වැඩිපුර යොමු වෙන්න අදහසක් නැහැ.
ගීත රූප රචනා, වෙළෙඳ දැන්වීම් වගේ දේවල්වලට යොමු වෙන්නේ නැද්ද?
ආරාධනා ලැබිලා තියෙනවා. දැනට මම "ඩයලොග්" ආයතනයේ වෙළෙඳ දැන්වීමකට පෙනී ඉඳලත් තියෙනවා.
ඔබේ ඉලක්ක මොනවද?
ලොකු ඉලක්ක මට නැහැ. මගේ රැකියාව හොඳින් කරගෙන යන්න තමයි මගේ ලොකුම ඉලක්කය. ඊට අමතරව ව්‍යාපාර කළමනාකරණය පිළිබඳව උපාධියක් හදාරනවා. ඒ උපාධිය සම්පුර්ණ කරන එක මගේ තව ඉලක්කයක්.
රැකියාවක් කරන අතරවාරයේ කලා කටයුතුවලට ඉඩක් සොයා ගන්න එක අපහසුයි නේද?
මෙහෙමයි. මගේ මූලිකත්වය දීලා තියෙන්නේ රැකියාවට. කලා කටයුතුවලට සම්බන්ධ වෙන්නේ "හොබි" එකක් විදිහට.
උදවු කළ පිරිසකුත් ඇති?
මාව නිරූපණය ක්ෂේත්‍රයට යොමු කළ "සැලෝන් ෂයෝමා". අම්මා, තාත්තා දෙන්නා. මගේ ආච්චි. ඇය තමයි මාව අවුරුදු කුමරිය තරගයට යන්න උනන්දු කළේ. මගේ පාසල් මිතුරු මිතුරියන් වගේම මගේ නැදෑයෝ සියලු දෙනාත් මට ගොඩක් උදවු කරනවා.
