මම ක්ෂේත්‍රයට එන්නේ ගායිකාවක් විදිහට
රංගනයට මෙන්ම ගායනයටද එකසේ දක්ෂ හංසී මනමේන්ද්‍ර සමගින් අද ‘සාරවිට’ තරු කතා බහ අරඹන්නට අපි සූදානම් වුණේමු. මේ වනවිට ටෙලි නාට්‍යය කිහිපයක රඟපෑ ඇති හෂී සිය දෙවැනි ගීතය නිර්මාණය කරන්නටද මේ දිනවල සැලසුම් යොදමින් සිටින බව පවසයි.
හංසී කියන්නේ රංගන ශිල්පිනියක්ද? ගායිකාවක්ද?
දෙකම කිව්වොත් නිවැරදියි. මොකද මම ඒ අංශ දෙකටම ගොඩක් කැමතියි. නමුත්, ක්ෂේත්‍රයට එන්නේ මම නිරූපිකාවක් විදිහට. අකිල ජයසේකර අයියාගේ මඟ පෙන්වීම යටතේ තමයි නිරූපිකාවක් විදිහට ක්ෂේත්‍රයට ආවේ. මුලින්ම දායක වුණේ සත්සර කසුන්ගේ ගීතයකට කරපු විඩියෝවක තමයි මම පෙනී හිටියේ.
දායක වුණ නිර්මාණ ගැන කතා කළොත්?
හිරු නාළිකාවේ විකාශය වෙන සංජය නිර්මාල් මහත්මයාගේ ‘වස්සානේ ප්‍රේමයයි’, ස්වාර්ණවාහිනි නාළිකාවේ විකාශය වුණ සුපුන් රත්නායක මහත්මයාගේ ‘මගේ ආදර අවනඩුව’ නාට්‍යවලට දැනට දායක වෙලා තියෙනවා. ඉදිරියේදී නාලක විතානගේ මහත්මයා විසින් අධ්‍යක්ෂණය කළ ‘රීදි නෝට්ටු’ කියන ටෙලි නාට්‍යයට තුළිනුත් මාව දැක ගන්න පුළුවන්. මේ දවස්වල මගේ දෙවැනි ගීතයේ වැඩ කටයුතු කරගෙන යනවා. බොහෝ විට ලබන වසර මුලදී මගේ දෙවැනි ගීතයේ එළිදක්වන්න පුළුවන් වේවි කියලා හිතනවා.
නිරූපිකාවක් විදිහට ක්ෂේත්‍රයට ආවේ?
ඇත්තටම නිරූපිකාවක් වෙන්න මගේ ලොකු ආසාවක් තිබුණේ නැහැ. මම ගොඩක්ම ආසාවෙන් හිටියේ ගායිකාවක් වෙන්න. මේ හැම දෙයක්ම සිදුවුණේ අහම්බෙන් කිව්වොත් නිවැරදියි. නිරූපිකාවක් වෙන්න කලින් මම ගායිකාවක් වුණා. මම මගේ පළමු ගීතය එළිදක්වලා ඒකට ගීත වීඩියෝවක් කරන්න සැලසුම් කරන අතරවාරයේදී තමයි මට සත්සර කසුන්ගේ මියුසික් වීඩියෝවට පෙනී ඉන්න අවස්ථාව ලැබුණේ. එතැනදී මහේෂ් ජයරත්න අයියා තමයි පොටෝස් කළේ. එයා ඒවා අරගෙන එයාගේ පේජ් එකට දැම්මා. ඒ පොටෝස් දැකලා තමයි මට කතා කළේ පෝටෝ ෂුට්වලට පෙනී ඉන්න. ඊට පස්සේ තමයි නිරූපණයට යොමු වෙන්න ආස හිතුණේ.
පාසල් යන කාලේ කොහොමද කලාව පැත්තට තිබුණ නැඹුරුව?
ඒ කාලේ හැමදේටම යනවා. ඩාන්සින් කළා. මියුසික් කළා. ඒ වැඩවලදී පාසලේ මුල්තැන ගත්තෙත් මම තමයි. මම පාසල් තුනක අධ්‍යාපනය ලැබුවා. ඒ විහාරමහා දේවි, විද්‍යාදීප, යක්කල චන්ද්‍රජෝති විද්‍යාලය. පාසල් තුනටම අදටත් මම ගොඩක් ආදරෙයි. මට පාසල් යන කාලේ කලා කටයුතුවලට තිබුණේ ලොකු උනන්දුවක්.
වැඩිපුර කැමති රඟපාන්නද? ගීත ගයන්නද?
මේ කිසිම දේකට මම අකමැති නැහැ. මගේ දක්ෂතා හඳුන ගෙන මාව සුපුන් රත්නායක මහත්මයා එයාගේ ‘මගේ ආදර අවනඩුව’ ටෙලි නාට්‍යයේ රඟපාන්න අවස්ථාවක් ලබාදුන්න එක ගැන මේ වෙලාවේ මම කතෘවේදීව මතක් කරන්න අවශ්‍යයි. දෙවැනි ගීතය එළිදක්වලා ලැබෙන රසික ප්‍රතිචාර මත ඒකට වීඩියෝවක් කරන්න බලාපොරොත්තුවකුත් තියෙනවා.
කලා ක්ෂේත්‍රය තුළ හංසීගේ ඉලක්ක මොනවද?
එකම ඉලක්කය තමයි මගේ පුංචි කාලේ ඉඳලා තිබුණේ. ඒ කලාවට සම්බන්ධ වෙන එක. ඒ හීනය දැන් සඵල වෙලා තියෙනවා. මගේම ගීතයක් කරලා ඒකට මියුසික් වීඩියෝවක් කරන එක මගේ තියෙන තවත් ඉලක්කයක්. පළමු ගීතයට මම ගොඩක් ආසාවෙන් හිටියා වීඩියෝවක් කරන්න. නමුත්, ඒක මට කරගන්න බැරිවුණා. ඒ හින්දා අලුතින් එළිදක්වන ගීතයට හරි මියුසික් වීඩියෝවක් නිර්මාණය කරන්න බලාපොරොත්තු වෙනවා.
උදවු කළ පිරිස ගැනත් සඳහනක් කරමු?
මගේ පවුලේ අය ගොඩක් ලොකු සපෝර්ට් එකක් මට දෙනවා. අදටත් මගේ අම්මා මම යන හැම තැනකටම මගේ ආරක්ෂාවට එනවා. තාත්තා ලංකාවේ නැති වුණත් නිතරම මට කතා කරලා අවවාද උපදෙස් දෙනවා. ඒ වගේම මං ගැන ගොඩක් හොයලා බලනවා. ගොඩක් අය මේ ක්ෂේත්‍ර තුළදී මට උදවු කළා. නම් කියන්න නම් ගොඩ දෙනෙක් ඉන්නවා. මේ වෙලාවේ ඒ සියලුම දෙනා ආදරයෙන් මතක් කරනවා.
