මට ටෙලි නාට්‍ය කිහිපයකටම ආරාධනා ලැබුණා
නවක නිරූපණ ශිල්පිනියක් වන තරුෂිව මෙවර සාරවිට කතාබහකට අප එකතු කරගන්නට සිතුවා. ඇය බ්‍රයිඩල් නිරූපිකාවක් විදිහට ක්ෂේත්‍රයට සම්බන්ධ වී සිටිනවා. එමෙන්ම තරුෂි තවමත් අධ්‍යාපනය හදාරනවා. ඉතින් සාරවිට සමග තරුෂි මෙලෙස සම්බන්ධ වුණා.
ඔබව හඳුන්වා දුන්නොත්?
මගේ නම තරුෂි ප්‍රනාන්දු. මගේ වයස අවුරුදු 19යි. මගේ ගම පොළොන්නරුවේ. මේ වෙද්දි නිරූපණ ක්ෂේත්‍රයට සම්බන්ධ වෙලා ඉන්නවා.
නිරූපණයට ඇවිත් කොච්චර කාලයක් වනවාද?
ගිය වසරේදී තමයි වැඩ කරන්න පටන් ගත්තේ. මුලින්ම බ්‍රයිඩ්ල් ෂූට් තමයි කළේ. කැෂුවල් ෂූට්වලට ලොකු කැමැත්තක් නම් නැහැ. නිරූපණය කරන්නේ විනෝදාංශයක් විදිහට.
ඔබ තවම අධ්‍යාපනය හදාරනවාද?
ඔව්. මම මේ වසරේදී උසස් පෙළ හැදෑරීමට නියමිතයි.
අධ්‍යාපන කටයුතු සමග නිරූපණ වැඩ කරගන්නේ කොහොමද?
ඉගෙනීමට තමයි මේ කාලයේදී මුල් තැන දීලා තියෙන්නේ. නිවාඩු වෙලාවල් වලට තමයි වැඩ භාර ගන්නේ. මග හැරෙන වැඩ යාළුවන්ගෙන් කවර් කරගන්නවා. ඒ නිසා සමබරව ගෙනයන්න පුළුවන්.
පාසැලෙන් බලපෑමක් ආවේ නැද්ද?
නැහැ.
ගෙදරින් ලැබෙන සහයෝගය කොහොමද?
ඔව්. අම්මා තමයි හැමතැනකටම යන්න එන්නේ. අම්මා මගේ පස්සෙන් ඉන්නවා. එයාගෙන් ලැබෙන සහයෝගය විශාලයි.
පොළොන්නරුව වගේ ගමක ඉඳලා නිරූපණ වැඩ කරන්න පුළුවන්ද?
ටිකක් අමාරුයි. ඉගෙනගන්න තැන් අඩුයි. එක දිගට ෂූට් ලැබෙන්නෙත් නැහැ. කලාතුරකින් තමයි වැඩ ලැබෙන්නේ.
නිරූපණ ක්ෂේත්‍රයේ වැඩ කරද්දි රංගනයට අවස්ථාව ලැබෙනවා. ඔබට එහෙම බලාපොරොත්තුවක් නැද්ද?
මට ටෙලි නාට්‍ය කිහිපයකටම ආරාධනා ලැබුණා. ඒවාගෙන් සමහර ටෙලි නාට්‍ය මේ වනවිට විකාශය වනවා. හැබැයි මේ කාලයේදී මගේ අධ්‍යාපන කටයුතුත් එක්ක ඒ වගේ දේකට සම්බන්ධ වෙන්න අමාරුයි කියලා හිතෙනවා. ඒ නිසා ඒවා බාර ගත්තේ නැහැ. අධ්‍යාපන කටයුතු අවසන් වුණාම ඒවාට සම්බන්ධ වෙන්න බලාපොරොත්තු වෙනවා.
ඔබ අනාගතයේදී වෘත්තීය වශයෙන් කලාවට සම්බන්ධ වෙනවාද?
කලාවම වෘත්තීයක් කරගන්න අදහසක් නැහැ. මම කැමතියි ගුරුවරියක් වෙන්න. ඊට අමතරව නිරූපණයත් කරගෙන යන්න බලාපොරොත්තු වෙනවා. ගුරු වෘත්තීයේ ඉඳලා නිරූපණය කරන අය ඕනෑ තරම් ඉන්නවානේ.
උදව් කළ අය කවුද?
මගේ අම්මා, අක්කා මට ගොඩක් උදව් කරනවා. එතකොට මම වැඩ කරපු ෆොටෝග්‍රැෆර්ස්ලා සහ අනෙක් ශිල්පියෝත් මට ගොඩක් ලොකු සහයෝගයක් ලබා දුන්නා. ඒ හැමෝටම මම ස්තූතියි කරනවා.
කැළුම් දේවින්ද
