මට අවුරුදු 25ක් සපිරෙන කොට රංගනයෙන් සමුගන්නවා
සුසිල නිෂ්පාදනයක් වූ 'සල් සපූ නා' ටෙලිනාට්‍ය හරහා රංගනයට පිවිසි ෂනාලි වීරසිංහ මේ දිනවල කාගෙත් ආදරය දිනාගත් යොවුන් රංගන ශිල්පිණියකි. සතියේ දින පහේම සිරස නාළිකාවේ විකාශය වන 'සල් සපූ නා' ටෙලි නාට්‍යයේ 'ආලියා' ලෙස ඔබ හමුවට එන ඇය වසර කිහිපයක් තිස්සේ වෘත්තියෙන් මෝස්තර නිරූපිකාවක ලෙසද කටයුතු කර ඇත. 'ආලියා' ලෙස සිය පළමු ටෙලිනාට්‍ය රංගනයට පිවිස ඇති ෂනාලි දැනට බොහෝ වෙළෙඳ දැන්වීම් හා ගීත රූප රචනා ප්‍රමාණයකටද දායක වී තිබේ.
ෂනාලි කියන්නද? ආලියා කියන්නද?
ෂනාලි කියන්න. ඒත්, දැන්නම් ෂනාලිට වඩා ජනප්‍රිය ආලියා කියන නම. ගොඩදෙනෙකුට ෂනාලි කියන මගේ නමත් දැන් හුරු නැති වෙලා. ඒ අයත් මට කියන්නේ ආලියා කියලා.
'සල් සපු නා' ටෙලි නාට්‍යයේ 'ආලියා' චරිතය ලැබුණේ කොහොමද?
මම රොසෑන් ඩයස් මහත්මිය ගාව නිරූපණය පිළිබඳව හැදෑරීම් කළා. ඇය තමයි කිව්වේ අලුත් ටෙලි නාට්‍යයකට අලුත් ගැහැනු ළමයෙක් හොයනවා ගිහිල්ලා බලන්න කියලා. ඉතන් මම ස්ක්‍රීන් ටෙස්ට් එකට ගියා. එහිදී මට 'සල් සපූ නා' ටෙලිනාට්‍යයේ තිර පිටපත රචනා කළ තුෂාරි අබේසේකර අක්කාව මුණ ගැහුණා. ඇයගේ අතදීම මත තමයි මම 'ආලියා' වුණේ.
මේ පළමු රංගනයද ෂනාලිගේ?
ඔව්, මීට කලින් මම වෙළෙඳ දැන්වීම්, ගීත රූප රචනාවලට පෙනී සිටියත් රංගන ශිල්පිණියක් විදිහට ටෙලිනාට්‍ය ක්ෂේත්‍රයට අවතීර්ණ වෙන්නේ 'සල් සපු නා' ටෙලිනාට්‍ය හරහායි.
'ආලියා' කියන්නේ නම් අහිසංක චරිතයක්. ෂනාලිත් ඒ වග්ද?
අපෝ නැහැ. 'ආලියා' කියන්නේ අහිංසක, තැන්පත් චාම් ගතිපැවතුම් ඇති කෙනෙක්. නමුත්, ෂනාලි කියන්නේ ඊට හාත්පසින්ම වෙනස් කෙනෙක්. චුට්ටක් ඇත්නම් මට තරහත් යනවා.
'සල් සපු නා' ටෙලි නාට්‍යයට එකතු වුණේ ඔබ නවකයෙක් විදිහට. කොහොමද කට්ටියගේ සැලකුම්?
ප්‍රවීණ හා නවක කියලා භේදයක් අපි කා අතරවත් තිබුණේ නැහැ. ඒ අය මා රංගනය පැත්තෙන් නොදන්න හැමදේම දරුවෙකුට, සහෝදරියකට වගේ කියලා දෙනවා. මේ වෙලාවේ විශේෂයෙන්ම මතක් කරන්න ඕනා රම්‍යා වනිගසේකර, රෝහණ බැද්දගේ, දමිතා අබේරත්න, ගයනි ගිසන්තිකා වගේම ජනක කුඹුකගේ පිරිසව. ඔවුන් මට රංගනය පැත්තෙන් ගොඩක් දේ කියලා දුන්නා.
'සල් සපු නා' නාට්‍යයෙන් පස්සේ?
දැනට ගොඩක් කලා නිර්මාණවලට සම්බන්ධ වෙන්න කියලා ආරාධනා ලැබෙනවා. නමුත්, මම කැමතියි 'සල් සපු නා' නාට්‍ය අවසන් වෙලා තවත් නිර්මාණයකට යන්න. එක දිගට කලා කටයුතු බාර අරගෙන අමාරුවේ වැටෙනවට වඩා ඒක හොඳයි කියලා හිතෙනවා.
ෂනාලිට තාම අවුරුදු 19යි. කලා ක්ෂේත්‍රයේ දිගටම රැඳී ඉන්නද කල්පනාව?
නැහැ මට අවුරුදු 25ක් සපිරෙද්දිම මම කලා ක්ෂේත්‍රයෙන් ඉවත් වෙනවා. ඒක තමයි මගේ ඉලක්කය. දැන් මට අවුරුදු 19යි. තව අවුරුදු 6ක් ක්ෂේත්‍රය තුළ රැඳී ඉන්න පුළුවන්. ඒ කාලය තුළ මා රංගනය පැත්තෙන් යන්න තියෙන සියලු ඉලක්කවලට යන්න බලාපොරොත්තුවෙන් ඉන්නවා.
සිනමා නිර්මාණයකට සම්බන්ධ වෙන්න ඔබට ආරාධනා ලැබුණොත් බාරගන්නවද?
අනිවාර්යෙන්ම බාරගන්නවා. මොකද. සිනමාවට සම්බන්ධ වෙනවා කියන්නේ මගේ තවත් එක් හීනයක් තමයි. හැබැයි ලැබෙන ආරාධනය මට කරන්න පුළුවන් හොඳ චරිතයක් වෙන්න ඕනා.
ෂනාලිට කවුද උදවු කළේ?
අම්මා, තාත්තා, රොසෑන් ඩයස් මහත්මිය, 'සල් සපූ නා' ටෙලි නාට්‍ය කණ්ඩායම. සුසිල නිෂ්පාදන ආයතනය වගේම 'ආලියා' චරිතයට මාව තෝරගත්තු තුෂාරි අබේසේකර අක්කාවත් මේ අවස්ථාවේදී විශේෂයෙන්ම මතක් කරනවා.
බුද්ධික සේනාධීර / ඡායාරූප - ඒෂාන් ප්‍රනාන්දු
