මගේ දෙමවුපියන් මම මොඩලින් කරනවට කැමැත්තක් තිබුණේ නෑ
නිරූපණ ක්ෂේත‍්‍රය තම විනෝදාංශය කරගනිමින් ඉතා කෙටි කලක් තුළ එම ක්ෂේත‍්‍රයට පිවිසෙන ඇය නවමිණී චන්දිමා ද සිල්වා වෙයි. නවමිණී අපිත් සමගින් එකතු වූයේ ඇයගේ ජීවිතාන්දරය "සාරවිට" තරු කතා බහ හා බෙදා හදා ගැනීමටයි. මේ ඇය අප සමගින් දැක්වූ අදහසයි....
ඉතින් නවමිණී මේ දිනවල මොකද කරන්නේ ?
‘‘මේ දවස්වල නම් ටිකක් විතර කාර්ය බහුලයි. නිරූපණ ක්ෂේත‍්‍රයේ වැඩත් එක්ක සුපුරුදු පරිදි ජීවිතය ගෙවෙනවා.
ඔබ ගැන හා පවුලේ විස්තර ගැන කතා කළොත් ?
මම නවමිණී චන්දිමා ද සිල්වා. මගේ වයස 26යි. මම දැනට පදිංචි වෙලා ඉන්නේ මාකොළ ප‍්‍රදේශයේ. මගේ පවුලේ ඉන්නේ මමයි, අම්මයි, තාත්තයි, මල්ලියි
මේ ක්ෂේත‍්‍රයට පිවිසීම ගැන කතා කළොත් ?
ඒක අහම්බෙන් වුණ දෙයක්. මොඩලින් කරන්න මගේ ආශාවක් තිබුණේ නෑ. මගේ එකම හීනය වෙලා තිබුණේ රජයේ හොඳ රැකියාවක් කිරීමයි. යාළුවෙකුගේ මාර්ගයෙන් තමයි මට මොඩලින් කරන්න අවස්ථාව ලැබුණේ.
නිරූපණ ක්ෂේත‍්‍රයේ දැනට කොපමණ කාලයක සිටද වැඩ කටයුතු කරගෙන යන්නේ ?
දැනට මාස 7ක් 8ක් විතර වෙනවා. ඒ මාස කිහිපය තුළ මගේ දියුණුවක් තියනවා කියලා මට හිතෙනවා. මම දැනට අයි.ටී. එන් නාළිකාවේ තිරගතවීමට නියමිත ‘‘සිකුරු භවන’’ ටෙලි නාට්‍යයට හා මේ වන විට එම නාළිකාවේම විකාශය වන ‘‘කෝපි කඩේ’’ ටෙලි නාට්‍යයටත් රංගනයෙන් දායක වෙලා තියෙනවා. ඊට අමතරව මම ටී.වී කොමර්ෂල්වල, මියුසික් වීඩියෝවලට හා ෆොටෝ ෂූට් වලට සම්බන්ධ වෙලා තියනවා.
ගෙදරින් ලැබුණු සහාය ගැන කතා කළොත් ?
ගෙදරින් නම් පොඩි පොඩි ප‍්‍රශ්න මුලින් තිබුණා. මගේ දෙමවුපියන් මම මොඩලින් කරනවට කැමැත්තක් තිබුණේ නෑ. නමුත් දැන් මම මේ යන ගමනට ඔවුන්ගේ සහායත් නිසැකවම ලැබෙනවා. මගේ අම්මත්, තාත්තත් මගේ පස්සෙන්ම ඉඳගෙන මං ගැන හොයලා බලනවා.
ඔබේ අදහස මේ ක්ෂේත‍්‍රයෙන්ම ඉදිරියට යෑමද ?
ඔව් මගේ එකම ආසාව මේ ක්ෂේත‍්‍රයේ හොඳ නමක් ලබාගැනීමයි. ඒ සඳහා මම මගේ උපරිමයෙන් කටයුතු කරනවා.
ඕනෑම ක්ෂේත‍්‍රයක් ගත්තොත් ඉදිරියට යන්න ලොකු කැපකිරීමක් කරන්න ඕනෙ නේද ?
ඔව් මම මේ ක්ෂේත‍්‍රයට ගොඩක් ආදරෙයි. ඒක මම අවංකව කරගෙන යනවා. ඒකට කැපිලි කෙටිලි තියනවා තමයි. ඒවත් මම බිඳගෙන මගේ ගමන මම යනවා. හැබැයි තාම නම් මට මේ ක්ෂේත‍්‍රයේ කාගෙන්වත් කැපිලි කෙටිලි හම්බෙලා නම් නෑ. හැමෝම මාත් එක්ක හොඳින් වැඩ කටයුතු කරගෙන යනවා. ඒ ගැනත් මම සතුටු වෙනවා.
ස්තුති කරන්න පිරිසකුත් ඇති නේද ?
අනිවාර්යයෙන්ම, මුලින්ම මං මගේ දෙමවුපියන් දෙන්නට ගොඩක් ස්තුති කරන්න ඕනේ. ඒ දෙන්නා නැත්තම් අද මම මෙතැන නෑ. ඊට අමතරව ඩිලාන්ට මාව හැමදාව රූපලාවණ්‍ය පැත්තෙන් හැඩ කරන මධුෂානිවත් ආදරෙන් මතක් කරන්න ඕනේ. තව මගේ යාළුවන්ටත් නෑදෑ හිතමිතුරන්ටත් මගේ ස්තුතිය පුද කරනවා.
සටහන සහ ඡායාරූප - චමත් වින්දුල
