පුංචි කාලේ ඉඳලා මගේ ආසාවක් තිබුණේ ගුරුවරියක් වීමට
ඔයා ගැන හැඳින්වීමක් කළොත්?
මගේ නම සදින්සා සමරතුංග. මං ඉන්නේ කොට්ටාවේ. මගේ පාසල කෝට්ටේ, ආනන්ද බාලිකා විද්‍යාලය. මම දැනට රූපලාවණ්‍ය ශිල්පිනියක් විදිහට කටයුතු කරනවා. ඒ පිළිබඳව වැඩිදුර හදාරමින් ඉන්නේ. මේ අතර නිරූපිකාවක් විදිහටත් කටයුතු කරනවා.
රැකියාවකුත් කරනවාද?
දැනට මම මගේ නිවසේ රූපලාවණ්‍යාගාරයක් පවත්වාගෙන යනවා.
නිරූපණයට එකතු වෙන්නේ කොහොමද?
මගේ යාළුවා සජානි නිසා තමයි නිරූපණ ක්ෂේත්‍රයට එකතු වුණේ. මම එයා සමග එයාගේ වැඩකටයුතුවලට සහභාගී වූ අවස්ථාවල මටත් මේ සඳහා යොමුවෙන්න අවස්ථාව උදාවුණා. ඒ වගේම මේ වන විට නිලූ සේනානායක, අර්ජුන් සේනානායක ගුරුවරුන් යටතේ මං නිරූපණය හදාරමින් සිදුකරනවා. ඒ විදිහට තමයි මං නිරූපණ ක්ෂේත්‍රයට එකතු වෙන්නේ. විශේෂයෙන් කියන්න ඕනේ, මම මේ අවුරුද්දේ මිස් ශ්‍රීලංකා ෆෝ(ර්) මිස් යුනිවර්ස් තරගයට සහභාගී වුණා. එහිදී මට මිස් ෆොටෝ ජෙනික් මිනිටයිටල් එක දිනාගැනීමට අවස්ථාව උදාවුණා.
නිරූපණය කියන දේ හීනයක්ද?
පුංචි කාලේ ඉඳලා මගේ ආසාවක් තිබුණේ ගුරුවරියක් වීමට. ඒ වගේම මං ඒ හීනේ සැබෑ කරගත්තා. කලක් ප්‍රාථමික පුහුණු ගුරුවරියක් ලෙස කටයුතු කළා. හැබැයි ලොකු ආසාවක් කැමැත්ත නිරූපණ ක්ෂේත්‍රය කෙරෙහි තිබුණා. නමුත් ඒ ආසාව ඉටුකරගන්න ලැබෙයි කියලනම් කවදාවත් හිතුවෙ නැහැ.
දැන් මොකද හිතෙන්නේ?
නිරූපිකාවක් වීමට හැමෝටම අවස්ථාවක් උදාවෙන්නේ නැහැ. ඒ අවස්ථාව මට ලැබිලා තියෙන එක ගැන ඇත්තටම සතුටුයි. මම මේ ක්ෂේත්‍රයට යොමු වෙලා වැඩි කාලයක් නැහැ. කෙටි කලකදී මේ වගේ ජයග්‍රහණයක් ලැබීම ගැන මට ලොකු සතුටක් තියෙනවා.
නිරූපණය කියනදේ තරුණියට හොඳයිද? අනවශ්‍ය කතා හැදෙන්නේ නැද්ද?
ලංකාව කියන්නේ නිරූපණ ක්ෂේත්‍රය දිහා වපර ඇසකින් බලන්න පුරුදුවෙලා තියෙන රටක්. තාමත් ලංකාවේ නිරූපණ ක්ෂේත්‍රයට නිසි දැක්මක් ලැබිලා නැහැ. ඉතිං ඒ වගේ රටක අනවශ්‍ය කතා හැදීම අනිවාර්යයෙන් සිදුවන දෙයක්. නමුත් තමන් කරන දේ නිසියාකාරව සිදුකරනවා නම් මම නම් හිතන්නේ නිරූපණය කියන දේ තරුණියකට නරක දෙයක් නෙමෙයි කියලා.
එහෙම වුණාම ක්ෂේත්‍රය පිළිබඳ කලකිරීමක් ඇතිවෙන්නේ නැද්ද?
සමහර වෙලාවට ඒ පිළිබඳ ලොකු කලකිරීමක් ඇත්වෙනවා. හැබැයි ඕනෙම වෘත්තියකදී ප්‍රශ්න කියන දේවල් එනවා. ඒ සැමදේටම මුහුණදීලා ඉදිරියට යන එක තමා වැදගත් වෙන්නේ.
අනාගතේ බලාපොරොත්තු එහෙම තියෙනවාද?
මගේ අනාගත බලාපොරොත්තුව තමයි මේ රටේ හොඳ ව්‍යාපාරිකාවක් වීම. මේ ක්ෂේත්‍රයෙන් ඉදිරියට යාමටත් බලාපොරොත්තු වෙනවා.
මෙතෙක් පැමිණි ගමනට උදවු කළ අය එහෙම ඇති?
මගේ මේ සියලුම වැඩ සඳහා මට හැකි සෑමවිටම මගේ අම්මා, තාත්තා උපකාර කළා. මගේ අක්කලා දෙන්නා උදවු කරනවා. වගේම විශේෂයෙන් ධම්මික අයියාව මතක් කරන්න ඕනේ. එයා තමයි මට මේ තැනට එන්න ලොකු සහයෝගයක් ලබාදුන්නේ. මගේ ගුරුවරුන් වෙන අර්ජුන් සේනානායක, නිලූ සේනානායක දෙන්නත්, මගේ යාළුවා සජානි, බියුමාලි මේ වෙලාවේ මතක් කරන්නම ඕනේ. මේ සියලුදෙනාගෙන් මට ලොකු සහයෝගයක් මගේ සෑමදෙයකටම ලැබුණා. ඒ පිළිබඳව මං ස්තුතිවන්ත වෙනවා.
ඩිලාන් ක්‍රිෂාන්ත / ඡායාරූප - සදින්සාගේ ෆේස්බුක් ගිණුමෙනි.
