පාසල් යන කාලේ නම් මම ගොඩක් දක්ෂ ක්‍රීඩාවට
අද "සාරවිට" තරු කතා බහ තුළින් ඔබ හමුවන්නේ මොරින් ගුණතිලකය. මීට වසරකට පෙරදී නිරූපිකාවක ලෙස ක්ෂේත්‍රයට පිවිස ඇති මොරින් මේ වන විට බොහෝපිරිසක් දන්නා අඳුනන මෝස්තර නිරූපිකාවක් බවට පත්ව සිටින්නීය. දැනට විවිධ කලා කටයුතු සඳහා සිය දායකත්වය සපයන ඇය සිය නිරූපණ දිවියේ ඉදිරි ඉලක්ක ගන අපිට මෙසේ පැවසුවෙමු.
නිරූපිකාවක් වෙන්නේ?
පාසල් අධ්‍යාපනය නිමාවත් එක්ක. දැන් අවුරුද්දකට විතර කලින් තමයි නිරූපණ ක්ෂේත්‍රය මම සම්බන්ධ වුණේ. මුලින්ම මනාලියන්ගේ විලාසිතා දැක්මවලට දායක වුණා. අදටත් ගොඩක් කරන්නේ ඒ දේවල් තමයි.
නිරූපිකාවකට අමතරව වෙළෙඳ දැන්වීම්වලටත් පෙනී ඉන්නවා නේද?
ඔව්, දැනට වෙළෙඳ දැන්වීම් කිහිපයකටම මම දායකවෙලා ඉන්නවා. "ඩයලොග්", "හැටන් නැෂනල් බැංකුව" හා "තුර්කි ඔයිල්" කියන දැන්වීම් වල මම පෙනී ඉඳලා තියෙනවා. තව එක වෙළෙඳ දැන්වීමක් ඉදිරියට එන්න තියෙනවා.
ගීත රූප රචනා වලට එහෙම දායකවෙලා නැද්ද?
නැහැ. ඒත්, ආරාධනා නම් ගොඩාක් ලැබුණා. මම භාරගත්තේ නැහැ. මොකද මට අවශ්‍ය කරන්නේ හොඳ ජනප්‍රිය ගායකයෙකුගේ ගීත රූප රචනාවක් හරහා මිනිස්සු අතරට එන්නයි.
මොරින්ගේ පුංචි කාලේ හීනේ වුණේ?
පුංචි කාලේ ඉඳලාම ක්‍රීඩා විෂය තුළින් තමයි මම දක්ෂතා දැක්වූයේ. කුරුණෑගල මලියදේව බාලිකා විද්‍යාලයට තමයි මම පාසල් ගියේ. පාසලේ සියලු ක්‍රීඩා වලට මම දායක වෙලා ජයග්‍රහණ අත්කර ගෙන තියෙනවා. විශේෂයෙන්ම සමස්ත ලංකා මට්ටමින්. වසර 08ක් තිස්සේ දැල්පන්දු ක්‍රීඩාවට යොමු වෙලා හිටියා. 2012 අවුරුද්දේ විද්‍යාලීය ශිෂ්‍යභට කණ්ඩායමේ සැරයන්වරියක ලෙසත් මම කටයුතු කළා.
ඊට අමතරව සමස්ත ලංකා පාසල් නාට්‍ය තරගාවලියේ වසර 3ක් හොඳම නිළියට හිමි සම්මානය දිනාගෙන තියෙනවා. පාසල් අධ්‍යාපනයට ආයුබෝවන් කිවුව මේ අවුරුද්දේ පාසලේ හොඳම රංගන ශිල්පිනියට හිමි සම්මානයත් මට දිනාගන්න පුළුවන් වුණා. පාසල් යන කාලේ මගේ හීනේ වුණේ නාට්‍ය හා රංග කලා ගුරුවරියක් වෙන්න. ඒ හීනය ඉදිරියේදී සැබෑ කරගන්න බලාපොරොත්තුවෙන් ඉන්නවා.
ඔය අතරේ ඔබ අවුරුදු කුමරිය තරගයකටත් ඉදිරිපත් වුණා නේද?
මේ අවුරුද්දේ ස්වාධින රූපවාහිනී නාළිකාව මගින් පවත්වපු "අවුරුදු කුමරිය" තරගයේ අවසන් තරගකාරියන් 15 දෙනා අතරට තේරුණා.
රඟපාන්න කැමති නැද්ද?
දැනටත් මට ආරාධනාවක් ලැබුණා. ඒක වැඩ කටයුතු ඉදිරියට පටන් ගන්නවා. අපි බලමු. ඉදිරියේදී මාව රංගන ක්ෂේත්‍රය තුළ දකින්නට ලැබෙයි. ලැබුණ චරිතය ගැන සඳහනක් කළොත් සෙල්ලක්කාර ගැහැනු ළමයෙකුගේ චරිතයක් ඒක.
මොනවද ඉලක්ක?
මගේ හීනේ ගුරුවරියක් වෙන එක. ඒ හීනය සැබෑ කරගන්න ඒක තමයි මගේ ලොකුම ඉලක්කය. ඊට අමතරව හොඳ බිරිඳක්, ගුණගරුක මවක් වෙන්න තමයි මගේ ඊළඟ ඉලක්කය වෙලා තියෙන්නේ.
උදවු කළ අය?
ගොඩක් ආදරයෙන් මතක් කරන්න ඕනා මගේ අම්මා තාත්තා දෙන්නා. විශේෂයෙන්ම මගේ අම්මා. හැමදේකදීම මා සමග සෙවණැල්ල වගේ මගේ අම්මා ඉන්නවා. මම මේ අවුරුද්දේ තමයි පාසල් අධ්‍යාපනයට සමුදුන්නේ. අපේ පාසලේ විදුහල්පතිනිය ඇතුළු ගුරු මණ්ඩලයේ සියලුමදෙනාව මතක් කරන්න අවශ්‍යයි.
