නිරූපණයටට වගේම රංගනයටත් මම ගොඩක් ආසයි
නිරූපණ ක්ෂේත්රයට නවකයෙකු වන ඊෂි පෙරේරා සමගින් අද ‘සාරවිට' තරු කතා බහ අරඹන්නට අපි බලාපොරොත්තු වුණෙමු. නිරූපිකාවකට අමතරව රංගන ශිල්පිනියක් ලෙසද කටයුතු කරන ඊෂි රංගනයෙන් දායක වූ ටෙලි නාට්‍යය මෙන්ම ගීත රූප රචනා කිහිපයක්ද ඉදිරියේදී විකාශය වීමට නියමිතව ඇත.
ඊෂි නිරූපිකාවක් වෙන්නේ?
මීට වසර දෙකකට කලින්. පුංචි කාලේ ඉඳලා මගේ තිබුණ හීනයක් තමයි මේක. කාලයත් එක්ක ඒ තැනට එන්න ලැබීම ගැන තියෙන්නේ ලොකු සතුටක්.
නමුත්, ඊෂි නිරූපිකාවක් වගේම රංගනය පැත්තටත් දැන් යොමු වෙලා?
ඔව්, ‘ආටක නාටක' හරහා තමයි මම මුලින්ම රංගනය පැත්තට යොමු වුණේ. දැනට ටෙලි නිර්මාණ කිහිපයකටම මම දායක වෙලා තියෙනවා. සමහරක් නිර්මාණ ඉදිරියට එන්නත් තියෙනවා.
නිරූපණයටද රංගනයටද වඩා කැමති?
මේ දේකටම. මොකද මේ දෙකම තියෙන්නේ කලා ක්ෂේත්‍රය තුළ. මේ අංශ දෙක හරහාම මිනිස්සුන්ගේ ආදරය ලබන්න පුළුවන්. මුලින්ම ආසව තිබුණේ නිරූපණය පැත්තට. පස්සේ රංගනය පැත්තටත් යොමු වෙන්න අවස්ථාව ලැබුණා. රඟපෑම් කටයුතු කරන කොට ඒ පිළිබඳව ආසාවක් ඇති වුණා. දැන්නම් නිරූපණයට සමානව රංගනය පැත්තටත් මගේ ලොකු කැමැත්තක් තියෙනවා.
ළඟදී ඔබ දායක වුණ ගීත රූප රචනාවක් එන්න තියෙනවා නේද?
ඔව්, දිනේෂ් හේමන්ත ගායනා කරන ගීතයක රූප රචනාවකට මම පෙනී හිටියා. ඒක ටිකක් විතර දැන් විවේචනයට ලක්වෙලා තියෙනවා. මොකද ඒ රූප රචනාවේ ඇතුළත් වෙලා තියෙන දර්ශන ගොඩක්ම සරාගී පැත්තට බර වෙච්ච ඒවා නිසා.
නිරූපිකාවක් හා රංගන ශිල්පිනියක් විදිහට ඔබගේ ඉදිරි කාලය?
හොඳ නිර්මාණවලට දායක වෙන්න තමයි බලාපොරොත්තුව. නිරූපිකාවක් වුණත් මට ගැළපෙනවා කියලා හිතෙන නිර්මාණවලට තමයි මම පෙනී ඉන්නේ. රංගන ශිල්පිනියක් විදිහට තව ඉගෙන ගන්න බොහෝ දේවල් තියෙනවා. අත්දැකීම් ලබමින් හොඳ දක්ෂ රංගන ශිල්පිනියක් විදිහට මිනිස්සුගේ ආදරය දිනාගන්න තමයි මම බලාපොරොත්තු වෙන්නේ.
උදවු කරපු අය?
නිරූපණ ක්ෂේත්රයට ආවේ මගේ යාළුවෙක් නිසා. එයාට මේ වේලාවේදී ස්තුතී කරන්න ඕනා. මොකද එයාගේ අත දීම නැත්නම් අද මම මේ ක්ෂේත්‍රය නැතිව වෙනත් ක්ෂේත්‍රයකට යොමු වෙන්න තිබුණා. මුලින්ම වැඩ කළේ ඇය තමයි. මේ දවස්වල නම් ඇය නිරූපණ ක්ෂේත්‍රයෙන් තාවකාලිව ඉවත් වෙලා ඉන්නේ. ඇයගේ අධ්‍යාපන කටයුතු නිසා. ඊට අමතරව මගේ ගෙදර අය, මිතුරු මිතුරියන් මේ හැම දෙනාම මට වචනයකින් පවා හැම වේලාවෙම උදවු කරනවා.
බුද්ධික සේනාධීර
ඡායාරූප - රනුක විජේවර්ධන
