දැන්ම රංගනයට එන්න කිසිම අදහසක් නැහැ
මේ දිනවල වෙළෙඳ දැන්වීම හරහා නිතර පෙනෙන්නට සිටින ඇය නිමාෂා සිරිවර්ධනයි. ITN අවුරුදු කුමරිය ඔස්සේ බොහෝදෙනා දැන හැඳිනගත් ඇය "අද" තරු කතාබහට එක් කරගනු ලැබුවේ ඇගේ කලා කටයුතු සහ ඉදිරි බලාපොරොත්තු විමසීමටයි.
මේ දවස්වල වැඩකටයුතු කොහොමද?
දැනට ව්‍යාපාරික කළමනාකරණය පිළිබඳව පෞද්ගලිකව උපාධියක් හදාරනවා.
කොහොමද අවුරුදු කුමාරි තරගයට ඔබ ඉදිරිපත් වුණේ?
කලින් ඉඳලම ITN අවුරුදු කුමරිය මම බලනවා. ඉතිං අම්මට ඒ සඳහා මාව ඉදිරිපත් කරන්න ආසාවක් තිබුණා. ඒත් මම හැමදාම බැහැ කිය කිය ඉන්නවා. මේ පාර අම්මා හොරෙන්ම පෝස්ට් කාඩ් එකක් දාලා තිබ්බා. ඒ අය එන්න කියලා එව්වහම තමයි මම දැනගත්තේ අම්මා මේ සඳහා ඉල්ලුම් කරලා කියලා. අම්මගේ ආසාව නිසා මම ගියා. පළවෙනි දවසේ 300කට වැඩි පිරිසක් ඇවිත් හිටියා. ඊට පස්සෙ එතැනින් 40ක් තෝර ගත්තා. ඊට පස්සෙ තව දවසක 15ක් තේරුවා. එතැනින් අවස්ථාව ලැබුණා අවුරුදු කුමරිය වෙන්න. මාව ගොඩක් දෙනා දැනගත්තේ මෙවර අයි.ටී.එන් අවුරුදු කුමරිය වුණාට පස්සෙ තමයි.
ඒ කියන්නේ ඔබට අවුරුදු කුමරිය වෙන්න අවස්ථාව ලැබුණේ ඔබේ මව නිසාද?
ඔව්, මොකද අම්මා මේ සඳහා ඉල්ලුම් කළේ නැත්නම් මේ අවස්ථාව ලැබෙන්නෙ නැහැනේ. අවුරුදු කුමරිය අවසන් තරගය තිබුණේ හඟුරන්කෙත. ඉතිං 13 වැනිදා අවුරුදු චාරිත්‍ර ඉවර කරලා 14 උදෙන්ම ගියා. අම්මත් එක්ක තමයි මම හැමදේම කරන්නේ. ඉතිං එයත් ආවා හඟුරන්කෙත. ඒ අවස්ථාවේ අම්මත් ගොඩක් සතුටු වුණා මම දැක්කා.
වැඩකටයුතු සඳහා ලැබෙන ආරාධනා කොහොමද?
බොහෝ වැඩවලට ආරාධනා නම් ගෙදර එනකොටම ආවා. චිත්‍රපට දෙකක් සඳහා, ටෙලිනාට්‍ය කිහිපයක් සඳහා ආරාධනා ලැබුණා. මියුසික් වීඩියෝ සඳහාත් ආරාධනා කළා. මියුසික් වීඩියෝ කරන්න කොහොමත් අදහසක් නැහැ. අනිත් කටයුතුත් අතහැරියා ඉගෙන ගන්න නිසා. කලාව කියන්නේ වෙනම ක්ෂේත්‍රයක්නේ. ඒක නිසා ඒ පිළිබඳව දැනගෙනයි එන්න ඕන. නමුත් වෙළෙඳ දැන්වීම සඳහා අවුරුදු 10 කාලෙ ඉඳන්ම දායක වුණා. ඒ නිසා අවුරුදු කුමරිය වුණායින් පස්සෙ වෙළෙඳ දැන්වීම සඳහා වැඩි ඉල්ලුමක් ආවා. වෙළෙඳ දැන්වීම් නම් හොඳ ඒවා ටික ඔක්කෝම බාරගත්තා.
දායක වූ වෙළෙඳ දැන්වීම් ගැන කිව්වොත්?
මේ දවස්වල ප්‍රචාරය වෙනවා, "නේචර් සීක්‍රට්","කොමර්ෂල් බැංකුව", "ක්ලොගාර්ඩ්", "සමපෝෂ", මීට අමතරව තව කිහිපයක් එන්න තියෙනවා.
රංගනයට එන්න බලාපොරොත්තුවක් නැද්ද?
දැනට නම් රංගනය පිළිබඳව අදහස අතහැරලා තියෙන්නේ. මොකද මගේ අධ්‍යාපන කටයුතු සඳහා මුල් තැන දෙන්න ඕන නිසා. රංගනය සඳහා ගොඩක් කාලයක් වැය කරන්න ඕන. වෙළෙඳ දැන්වීම් සඳහා එච්චර කාලයක් කැපකරන්න ඕන නැහැනේ. ඒක නිසා දැන්ම රංගනයට එන්න කිසිම අදහසක් නැහැ.
වෘත්තීමය වශයෙන් කවුරු වෙන්නද බලාපොරොත්තු වෙන්නේ?
මම දැනට අධ්‍යාපනය කරගෙන යනවා. බැංකු ක්ෂේත්‍රයෙන් ඉහළට එන්න බලාපොරොත්තුවක් තියෙනවා.
කලාවෙන් ඈත් වෙන්නවද?
එහෙම නැහැ. මම කැමතියි වෙළෙඳ දැන්වීම් දිගටම ලැබෙනවාට සහ දිගටම කරන්න. නමුත් හැමදාම ඒ දේ වෙන්නෙ නැහැනේ. වයසට ගිහින් ඉන්න කාලේ චිත්‍රපටයක වයසක චරිතයක් ලැබුණොත් රඟපාන්න පුළුවන්. ආසාවක් තියෙනවා කවදා හරි හොඳ චිත්‍රපටයකට දායක වෙන්න.
මවගේ ආසාව ඔබ කවුරු වෙනවටද?
අම්මගෙන් කිසිම බාධාවක් නැහැ. ඕනෑම ක්ෂේත්‍රයක රැකියාවක් කරන්න මට අවස්ථාව දීල තිබෙනවා. අම්මට මාව ඒ තරමට විශ්වාසයි.
පෞද්ගලික සහ පවුලේ තොරතුරු ගැන කිව්වොත්?
මම ඉන්නේ දෙහිවල. මට ඉන්නවා නංගි, මල්ලි, අක්කි. නංගියි, මල්ලියි නිවුන් අය. තාත්තා නම් ඉතාලිවල ඉන්නෙ. අම්මා තමයි අපිව බලාගන්න වැඩ ඔක්කෝම කරන්නේ.
උදව් කරපු පිරිස මතක් කළොත්?
අම්මයි, තාත්තයි තමයි හැමදේටම මට හිටියේ. අපේ නෑදෑයොත් දුර ඉන්නේ. පොඩි කාලෙ ඉඳන්ම අම්මි තමයි මගේ හැමදේටම හිටියෙ. අපි හතරදෙනා තමයි එකට හිටියෙ. අපි රට යනවා තාත්තිව බලන්න. එයා මෙහෙ එනවා අපිව බලන්න. ඒක නිසා පවුලේ උදව්ව තමයි මට නිතරම ලැබුණේ.
ඩිලාන් ක්‍රිෂාන්ත / ඡායාරූප - රොමේෂ් ධනුෂ්ක
