ගායිකාවක් වෙන්න තමයි මුලින්ම හිතුවේ
සිරස රූපවාහිනියේ නිවේදිකාවක වශයෙන් කටයුතු කර ඇය හර්ෂි පද්මරත්නයි. වෙළෙඳ දැන්වීම් හා නිරූපණයෙහි යෙදෙන ඇය මේ වනවිට බොහෝදෙනා අතර ජනප්‍රිය චරිතයක් බවට පත්ව තිබේ. ඇයගේ අලුත් තොරතුරු පිළිබඳව සාරවිට සමග ඇය මෙසේ දොඩමලු වූවා.
ඔබ ගැන හැඳින්වීමක් කළොත්?
මම හර්ෂණී මධුෂානි පද්මරත්න. ගොඩක් අය මාව හඳුනන්නේ හර්ෂි පද්මරත්න කියලයි.
කොහොමද මේ ක්ෂේත්‍රයට ආවේ?
මම ක්ෂේත්‍රයට ආවේ වෙළෙඳ දැන්වීම්වලින්. ඊට පස්සේ මියුසික් වීඩියෝ සඳහා දායක වුණා. "සුජාතා" කියන ටෙලි නාට්‍ය සඳහා දායක වුණා. ඒකෙන් පස්සේ නාට්‍ය සඳහා දායක වුණේ නැහැ. දැනට චිත්‍රපටයක් සඳහා ආරාධනා කරලා තියෙනවා. ඒකේ වැඩකරන්න බලාපොරොත්තු ඉන්නවා.
ක්ෂේත්‍රයට අවතීර්ණ වූ වෙළෙඳ දැන්වීම?
මම මුලින්ම දායක වුණේ මොබිටෙල් කෑෂ් බොනැන්සා වෙළෙඳ දැන්වීම සඳහායි.
කොහොමද ක්ෂේත්‍රයේ ගමන?
මම හිතන විදියට මම ක්ෂේත්‍රයට ඇවිල්ලා අවුරුදු දෙකයි. ඒ ඇතුළත කාලයේදී ටෙලි නාට්‍යයකට දායක වුණා. දැන් චිත්‍රපටයක් සඳහා ආරාධනාවක් ලැබිලා තියෙනවා. ඒ ගැන ගොඩක් සතුටුයි.
ක්ෂේත්‍රයට එන්න මුල ඉඳන්ම අදහසක් තිබුණද?
පොඩි කාලේ එහෙම අදහසක් තිබුණේ නැහැ. මම මුලින්ම හිතුවේ ගායිකාවක් වෙන්නයි. නමුත් උසස් පෙළ කරද්දී ඒ අදහස වෙනස් වුණා. ඊට පස්සේ හිතුණා නාට්‍ය කරන්න ඕනේ කියලා. සාමාන්‍ය පෙළ ඉවර වෙද්දි රංගනය පිළිබඳව ප්‍රියන්ත ලලිත් සර්ගෙන් ඉගෙන ගත්තා. ඊට පස්සේ උසස් පෙළ ඉවරවෙනවාත් එක්කම මහේන්ද්‍ර පෙරේරා සර් ගාවට ගියා.
දැන් වෘත්තිය කුමක්ද?
තාම ඉගෙන ගන්න ගමන් තමයි ඉන්නේ. වෘත්තීය මට්ටමෙන් මේ හරහා ඉදිරියට යන්න බලාපොරොත්තු වෙනවා.
ඩිලාන් ක්‍රිෂාන්ත / ඡායාරූප - කවීත් මිලින්ද
