ආදරය නිසා විඳවන්න නම් කොහෙත්ම කැමති නෑ
ඔබට නදීෂා කියන්නද? රෝසි කියන්නද?
මම නදීෂාණි නිලූෂිකා. මගේ ගෙදර අය, නැදෑයෝ වගේම යාළුවොත් මට ආදරේට කියන්නේ රෝසි කියලා. හැබැයි මගේ කොම්බි නාට්‍ය බලපු අයනම් මට කතා කරන්නේ කොම්බි කියලා.
මුලින්ම යොමුවන්නේ නිරූපණ ක්ෂේත්‍රයටද?
ප්‍රසිද්ධ මාධ්‍ය හරහා මාව මුලින්ම දකින්න ලැබෙන්නේ නිරූපණ ක්ෂේත්රයේ. ටෙලි නාට්‍ය හා චිත්‍රපටවලට සම්බන්ධ වෙන්නේ ඊට පස්සේ. රූපවාහිනි නාලිකා කිහිපයකම නිවේදිකාවක් ලෙසත් වැඩකළා.
කොහොමද නිරූපණයට යොමුවුණේ?
ඇත්තටම මේ ක්ෂේත්‍රය පිළිබඳව මම ලොකු හැදෑරීමක් කරලා තිබුණේ නෑ. සමහර විට මේ දේ මගේ ඇඟේ තියෙන්නත් ඇති. මට ලැබුණ අවස්ථාවත් එක්ක ක්ෂේත්රයේ ඉදිරියට එන්න හැකියාව ලැබුණා.
පොඩි කාලෙ ඉඳලා බලාපොරොත්තුවක් තිබුණද මෙවැනි ක්ෂේත්‍රයකට එනවා කියලා.
පොඩි කාලේ නම් තිබුණේ නැටුම් ගුරුවරියක් වීමේ බලාපොරොත්තුවක්. පස්සෙ ඒක ටිකෙන් ටික වෙනස් වුණා. A/L කරලා ඉස්කෝලෙන් අයින් වුණාට පස්සෙ මම තීරණය කළා මට ගැළපෙන්නෙ මේ ක්ෂේත්‍රය කියලා.
ඔබේ පාසල?
පානදුර ශාන්ත ජෝන් විද්‍යාලය. එක වසරෙ ඉඳලා A/L වෙනකන්ම ඒ පාසලේම තමයි ඉගෙන ගත්තේ.
පාසල් කාලයේදීත් කලා කටයුතුවලට සම්බන්ධ වුණාද?
ඔව්. නර්තනයටයි ක්‍රීඩාවලටයි තමයි වැඩිපුරම යොමුවුණේ .
"කොම්බි" නාට්‍ය ඔබට ගොඩක් විශේෂයි නේද?
කොම්බි නාට්‍යයේ රඟපාන්න ලැබුණ එක ජීවිතයේ ලබපු ලොකු භාග්‍යයක් කියලයි මම නම් හිතන්නේ. ගොඩක්ම ආසාවෙන් රඟපාපු නාට්‍යයක් හා ගොඩක්ම ආදරය කරන චරිතයක්. දැනට වුණත් මගේ කොමර්ෂල්ස් ටීවී එහෙම යද්දී පොඩි ළමයි කියනවා අන්න කොම්බි අක්කා ඉන්නවා TV එකේ කියලා. හරිම ආදරණීය චරිතයක්.
කොහොමද ඔබ මේ චරිතය දකින්නේ?
කොම්බි කියන චරිතය අනෙක් චරිතවලට වඩා ගොඩක් වෙනස් චරිතයක්. කොම්බි කිසිම කෙනෙකුට බය නැති පිරිමියෙක් වගේ චරිතයක්. ගැමි චරිතයක්. සටන් කලාව අංගම්පොර මේ හැමදෙයක්ම චරිතය තුළ ගැබ්වෙලා තියෙනවා. අපිටත් මේ සටන් කලාව ප්‍රගුණ කරන්න අවස්ථාව ලැබුණා. නාට්‍ය අධ්‍යක්ෂණය කළේ ගාමිණී ද සිල්වා මහාතා. අධ්‍යක්ෂකවරයා ඇතුළු නාට්‍ය හා සම්බන්ධ ප්‍රවීණ ශිල්පීන්ගේ සිට ටී බෝයි දක්වා මේ සියලු දෙනාගෙන්ම විශාල සහයක් ලැබුණා.
සටන් කලාවත් ඉගෙන ගත්තනම් රූගත කිරීම් අතරේ අමතක නොවන සිද්ධි එහෙම ගොඩක් ඇති.
අපි අංගම්පොර සටන් කලාව ගැන කිසිම දෙයක් දැනගෙන හිටියෙ නැහැනෙ. ඉතින් මාසයක් විතර සටන් ක්‍රම ඉගෙන ගත්තා. සමහර වෙලාවට වැරදිලා නිලවලට ගැහෙන වෙලාවල් තිබුණා. මම ළඟින් යනකොටත් සමහරැ බයයි කොයි වෙලේ ගුටි කන්න වෙයිද දන්නෑ කියලා. ඔය වගේ දේවල් ගොඩක් තියෙනවා.
චිත්‍රපට ගැන කතා කළොත්
තුෂාර තෙන්නකෝන් මහතාගේ වරිග ජෝර්ජ් චිත්‍රපටයේ රඟපාන්න අවස්ථාව ලැබුණා.වරිග ජෝර්ජ් චිත්‍රපටයේ මම කරන්නේ වැදි චරිතයක්. ඉතින් මේ චරිතය කරන්න කලින් වැදි ජනතාවගේ සියුම් ඉරියව් පවා අධ්‍යනය කරන්න අපට සිදුවුණා. සමහර වෙලාවට පිටපතේ වචන දැක්කම මට ඔළුව රිදුණා කොහොමද මම මේවා කියන්නේ කියලා. චිත්‍රපටය රෑගත කළේ කොළඹින් පිට කැලෑබද ප්‍රදේශයක. හරිම සුන්දරයි.
ආදරය ගැන මොකද හිතන්නේ?
ආදරය එක එක්කෙනාට බලපාන විදිහක් තියෙනවා. වෙලාවකට සුන්දර වගේම තවත් වෙලාවකට අසුන්දර වෙන්නත් පුළුවන්. කොහොමත් ආදරය සුන්දර දෙයක් විදිහටයි මම දකින්නේ. මමත් ආදරය ලබන්න ගොඩක් කැමතියි. ආදරය නිසා විඳවන්න නම් කොහෙත්ම කැමති නෑ.
ඔබ විවාහකයි?
ඔව්
ඔබ රඟපානවට ඔහුගේ කැමැත්තක් නැද්ද?
කොහොමත් ඕනෑම පිරිමියෙක් කැමති නැහැනෙ තමන්ගේ වයිෆ්ට වැරුද්දක් වෙනවට. ඒ නිසා මේ ක්ෂේත්රයේ වැඩ කරද්දි තෝරා බේරාගෙන නිර්මාණවලට දායක වෙමින් බොහොම පරිස්සමින් වැඩ කරන්න කියලා තමයි එයා කියන්නේ.
දවසක රඟපෑම නවත්වලා ඔබට ඔහු ළඟට එන්න කිව්වොත්?
ඒක ප්‍රශ්නයක් නෑ. මට මොකද සතුට තියෙන්නේ රඟපෑමෙම නෙමෙයි. පවුල් ජීවිතය ගොඩක් වටිනවා
ඒ කියන්නේ නදීෂා ඉක්මනින්ම ඕස්ට්‍රේලියාව බලා පිටත්වෙයි කියන එකද?
මම මගේ ප්‍රේක්ෂකයන් අමතක කරලා අතරමඟ දාලා නම් යන්නේ නෑ. තව ඉදිරියටත් මෙම නිර්මාණ කිහිපයක්ම භාර අරගෙන තියෙනවා.
විලාසිතා ගැන මොකද හිතන්නේ?
විලාසිතා කියන්නේ ඇඳුම් විතරක්ම නෙමෙයි. අපි පාවිච්චි කරන ආභරණ, මේකප්, ෂූස්, වොච් මේ හැම දේකම හොඳ ගැළපීමක් තියෙන්න ඕනෙ. මම හැමවිටම තෝරාගන්නේ මම ගැළපෙන විලාසිතා විතරයි.
ව්‍යාපාර පැත්තටත් යොමුවෙන්න අදහසක් තියෙනවාද?
ඔව්. පුංචි කාලෙ ඉඳලම ෆැෂන් ඩිසයින් පැත්තෙන් ඉදිරියට යන්නට මගෙ බලාපොරොත්තුවක් තිබුණා. මේ වෙද්දි කොස්ටියුම් හා ෂූස් සම්බන්ධ ව්‍යාපාරයක් කරගෙන යනවා.
අනාගත බලාපොරොත්තු?
අනාගතේ ඉෂ්ඨකරගන්න ලොකු බලාපොරොත්තුවක් තියෙනවා. ඒක දැන්ම කියන්න බෑ. ඒ නිසා පොඩ්ඩක් සටහන් කරලා තියමු. ඒක තමයි මගෙ හීනෙ මගේ හැමදේම.
කුමී
සේයාරූ - සුමුදු හේවාපතිරණ
