අපේ හැසිරීම අනුව තමයි මේ දේ හොඳ හෝ නරක වෙන්නේ
මියසි සන්දීපනී
මියසි සන්දීපනි යනු පුංචි තිරයට එක්වූ නවක රංගන ශිල්පිනියකි. මියුසික් වීඩියෝ සහ වෙළෙඳ දැන්වීම් හරහා ක්ෂේත්‍රයට ප්‍රවිෂ්ට වූ ඇයගේ සිහිනය නිරූපණයෙන් හෝ රංගනයෙන් ඉදිරියට යාමට නොවේ. වෘත්තීමය වශයෙන් මෘදුකාංග ඉංජිනේරුවරියක වීමට සිහින දකින ඇයගේ වැඩකටයුතු පිළිබඳව කළ කතාබහකි මේ.
මේ දිනවල හරි කාර්යබහුලයි නේද?
ඇත්තටම කිව්වොත් ටිකක් කාර්යබහුල වෙලා. මොකද නාට්‍ය වැඩකටයුතු, මියුසික් වීඩියෝ සහ වෙළෙඳ දැන්වීම නිසා තමයි කාර්යබහුලකමක් ඇවිත් තියෙන්නේ.
කොහොමද ක්ෂේත්‍රයට පිවිසෙන්නේ?
මම ක්ෂේත්‍රයට එන්න අවස්ථාව ලැබුණේ FB එකේ මගේ ඡායාරූප දැකලයි. ඉන් පස්සෙ කතා කරලා ස්ක්‍රීන් ටෙස්ට් එකකට ගිහිල්ලා ඊට පස්සෙ මාව වැඩේට තෝරාගෙන තමයි කටයුතු කළේ. විශේෂයෙන් කියන්න ඕන දෙයක් තමයි මම මුලින්ම වැඩ කළේ මියුසික් වීඩියෝවකයි. දැනට මම ක්ෂේත්‍රයට ඇවිල්ලා අවුරුදු එකහමාරක කාලයක් වෙනවා. ඇත්තටම කිව්වොත් මම වෘත්තීය වශයෙන් ක්ෂේත්‍රයෙ නියැළෙන්නේ නැහැ. මම උසස් පෙළ කරලා විශ්වවිද්‍යාලයට තේරී පත්වුණත් ගියෙ නැහැ. නමුත් දැනට Business Management and Human Resource උපාධියක් කරන ගමන් තමයි ඉන්නේ. ඒ අතරේ ඉස්සරහට සොෆ්ට්වෙයාර් ඉන්ජිනියර් කෙනෙක් වෙන්න සිහිනයක් තියෙනවා. ඒකනිසා වෘත්තීය වශයෙන් සොෆ්ට්වෙයාර් ඉන්ජිනියර් කෙනෙක් ලෙස වෘත්තීයේ යෙදෙන්න බලාපොරොත්තු වෙනවා. නිරූපණයේ සහ රංගනයේ යෙදෙන්නේ විනෝදාංශයක් වශයෙන්. නමුත් ඉගෙන ගැනීමේ කටයුතු මේ දවස් ටිකේ නම් ටිකක් නතර කරලා තියෙන්නේ. මොකද වෙලාවක් නැතිකම හින්දා. ඉස්සරහට ඒක ඉක්මනට නැවත පටන් ගන්න හිතන් ඉන්නවා.
දායක වූ වැඩකටයුතු පිළිබඳව පැවසුවොත්?
ක්ෂේත්‍රයේ වැඩකටයුතු බොහොමයක් සඳහා දායක වෙලා තියෙනවා. ටෙලිනාට්‍ය සඳහා අලුතින් තමා දායක වුණේ. ඒ සඳහා දැනට මාස දෙකක් විතර වෙනවා. දැනට මම රංගනයෙන් දායක වූ ටෙලිනාට්‍ය දෙකක් විකාශනය වෙනවා. තව තුනක රූගත කිරීම් යනවා. ඒවගේම මියුසික් වීඩියෝ සහ වෙළෙඳ දැන්වීම් සඳහා දායක වෙලා තියෙනවා.
එම ටෙලිනාට්‍ය ගැන සඳහන් කළොත්?
හිරු ටීවී ඔස්සේ විකාශනය වන "වස්සානේ ප්‍රේමය", ස්වර්ණවාහිනියේ විකාශනය වන "සමනලුන් පියාඹයි" කියන නාට්‍යය දෙකයි. මෙහි එක නාට්‍යයක් තුළ මම කරන්නේ නපුරු චරිතයක්. මේ නාට්‍ය දෙක සඳහා දැනට දායක වෙලා තියෙන්නේ. තව නාට්‍ය තුනක් එන්න තියෙනවා.
ක්ෂේත්‍රය පිළිබඳව යම්කිසි හැදෑරීමක් තියෙනවාද?
මම ඇත්තටම ක්ෂේත්‍රයට ආව මුල් කාලයේ මහේන්ද්‍ර පෙරේරාගේ පන්ති සඳහා දායක වුණා. මේ පිළිබඳව යම් හැදෑරීමක් කරලා තමයි ක්ෂේත්‍රයට පැමිණියේ.
ඒ කියන්නේ ක්ෂේත්‍රයට එන්න යම්කිසි හැදෑරීමක් කරන්න ඕනේ කියන එකද?
මේ පිළිබඳව හැදෑරීමක් කරලා ආවොතින් වඩාත් හොඳයි කියලා හිතෙනවා. එතකොට මේ ක්ෂේත්‍රය පිළිබඳව යම්කිසි දැනුමක් තියෙනවානේ. නමුත් හැදෑරීමක් නැතුව ආවා කියලත් කිසිදු ප්‍රශ්නයක් නම් ඇති වෙන්නේ නැහැ.
නවක තරුණියන්ට මේ ක්ෂේත්‍රයට උචිතද?
ඔව්, මේ ක්ෂේත්‍රය තුළ කිසිදු වරදක් නැහැ. අපි දැනගන්න ඕනා හරියට ඉන්න. අපේ හැසිරීම අනුව තමයි මේ දේ හොඳ හෝ නරක වෙන්නේ. අපි හොඳට වැඩ කළොත් හොඳට ඉන්න පුළුවන්. නරකට හිටියොත් හොඳක් වෙන්නේ නැහැ. මට මේ ක්ෂේත්‍රය පිළිබඳව කිසිම වරදක් දකින්න ලැබෙන්නේ නැහැ.
සහයෝගය දැක්වූ අය ගැන කතාකළොත්?
මම බොහෝමත්ම ස්තූති කරන්නේ මගේ පවුලේ කට්ටියට. මගේ හැම වැඩකටයුත්තක් සඳහාම යන්න එන්නේ මගේ තාත්තා හරි මගේ අයියා හරි. ඒවගේම මගේ අම්මා, අක්කා මේ හැමෝගෙන්ම ගොඩක් සහයෝගයක් ලැබෙනවා. මගේ අම්මා ලංකාවේ නැහැ. නමුත් එහෙම නැහැ කියලා මට දැනෙන්නෙ නැහැ ඒ තරමටම එයාගෙන් ලැබෙන සහයෝගය උපරිමයි. ඒ නිසා මගේ පවුලේ හැමදෙනාටම බෙහෙවින් ස්තූතිවන්ත වෙනවා. ඩිලාන් ක්‍රිෂාන්ත
Dilan Chryshantha
ඡායාරූප - Wedding Ring
