අද නිරූපණය ගොඩක් හොඳ තැනක තිබෙනවා
රූ රැජිණි තරඟාවලි කිහිපයකින්ම ජයග්‍රහණයන් ලැබූ නිරූපණ ශිල්පිනියක් තමයි මිතුනිකා ප්‍රනාන්දු කියන්නේ. මේ වනවිට වෙළඳ දැන්වීම් සහ ගීත රූප රචනා කිහිපයකටම මිතුනිකා දායක වී තිබෙනවා. ඊට අමතරව ඇය බ්‍රයිඩ්ල් ෂූට්වලටද දායකත්වය ලබා දී තිබෙනවා. නිරූපණ ක්ෂේත්‍රයෙන් දිගු ගමනක් යාමට බලාපොරොත්තු වෙන මිතුනිකා සාරවිටට සම්බන්ධ වුණේ මේ විදිහටයි.
ඔබ ගැන හඳුන්වා දුන්නොත්?
මගේ නම මිතුනිකා ප්‍රනාන්දු. මම දැනට නිරූපණ ශිල්පිනියක් ලෙස නිරත වෙනවා. මම වැඩියෙන්ම දායක වෙන්නේ බ්‍රයිඩ්ල් පැත්තට තමයි.
නිරූපණයට සම්බන්ධ වෙන්නේ කොහොමද?
දැනට ක්ෂේත්‍රයට සම්බන්ධ වෙලා අවුරුදු අටකට පමණ ආසන්න කාලයක් වෙනවා. මම දෙරණ, හිරු, සිරස අවුරුදු කුමරි තරඟාවලිවලට සහභාගී වෙලා ජයග්‍රහණයන් ලබා තිබෙනවා. බ්‍රයිඩ්ල් වලට සම්බන්ධ වෙන්න පටන් ගත්තේ 2015 වසරේදී වගේ තමයි.
වෙළඳ දැන්වම්වලට හෝ ගීත රූප රචනාවලට සම්බන්ධ වෙලා නැද්ද?
කිහිපයකටම සම්බන්ධ වුණා.
රංගනයට ආරාධනාවන් ලැබිලා නැද්ද?
රංගනයට නම් ආරාධනා රැසක්ම ලැබී තිබෙනවා. නමුත් මට දැන්ම ඒ පැත්තට යොමු වෙන්න අදහසක් නැහැ. නමුත් ඉදිරියේදී බලාපොරොත්තු වෙනවා රංගනයට එකතු වෙන්න.
නිරූපණයට අමතරව වෙනත් දෙයක් කරනවාද?
නැහැ. දැනට වෘත්තීමය වශයෙන් නිරූපණයේ තමයි නිරත වෙන්නේ.
වර්තමානයේ නිරූපණ ක්ෂේත්‍රය ගැන මොකද හිතන්නේ?
අද නම් නිරූපණය ගොඩක් හොඳ තැනක තිබෙනවා. හොඳ විදිහට වැඩක් කරගෙන හොඳ අනාගතයක් හදාගන්න පුළුවන් ක්ෂේත්‍රයක්.
ගෙදරින් ලැබෙන සහයෝගය කොහොමද?
ගෙදරින් තමයි ඇත්තටම මට හැමදේටම සහයෝගය දෙන්නේ. අම්මා හැමතිස්සෙම මගේ පස්සෙන් ඉන්නවා.
ඉදිරි වැඩකටයුතු ගැන කිව්වොත්?
ඉදිරියටත් නිරූපණය කරන්න බලාපොරොත්තු වෙනවා. ඊට අමතරව ඉදිරියේදි මටම කියලා දෙයක් කරගන්න බලාපොරොත්තු වෙනවා. හැමදාම නිරූපණයම කරන්න බැහැනේ.
මේ ගමනේදී සහය වුණු අය ගැන කිව්වොත්?
මට ගෙදරින් තමයි ගොඩක්ම සහයෝගය ලැබුණේ. ශීලා ප්‍රනාන්දු මහත්මියව මතක් කරන්න ඕනේ. එයා තමයි මාව මුලින්ම බ්‍රයිඩ්ල් පැත්තට යොමු කළේ.
සාකච්ඡා - කැළුම් දේවින්ද / ඡායාරූප - කවීත් මිලින්ද
