රඟපාන්න කැමති 'තරු'
මීට වසර කිහිපයකට පෙර නිරූපිකාවක ලෙස කටයුතු කරමින් රසික අවධානය දිනාගත් තරු බෝගොඩ මේ වනවිට රංගන ශිල්පිනියක ලෙස දිගු ගමනක් යාමට අපේක්‍ෂාවෙන් සිටින්නීය. දැනට ගීත රූප රචනා, වෙළෙඳ දැන්වීම්, ටෙලිනාට්‍යය හා චිත්‍රපට කිහිපයකටම සිය දායකත්වය සපයා ඇති තරු %සාරවිට^ තරු කතාබහට අපේ ආලින්දයට මෙලෙසින් ගොඩවූවාය.
නිරූපිකාවක් විදිහට ක්ෂේත්‍රයට ආවේ?
මීට අවුරුදු 3කට කලින්. 2013 වසරේදී විතර. ඒ අවුරුද්දේ තිබුණ 'බෙස්ට් මොඩල් ඔෆ් ද වර්ල්ඩ්' තරගයට ඉදිරිපත් වුණා. ඊට පස්සෙ තමයි නිරූපිකාවක් විදිහට වැඩ කරන්න පටන් ගත්තේ. දැනට අවුරුදු 3ක කාලයක් තිස්සෙ මම මේ ක්ෂේත්‍රය තුළ කටයුතු කරනවා. මේ ක්ෂේත්‍රයේ මේතරම් දුරක් ආවේ මගේ හැකියාවෙන් හා දක්ෂතාවයෙන්.
ඔබ කාලයක් විදෙස් ගත වුණා?
ඔව්, නිරූපණ ක්ෂේත්‍රය අත්හැරලා මම විදෙස් ගත වුණා ආයේ ලංකාවට නොයෙන්නම. නමුත්, කාලයක් එක්ක මට ආයෙත් හිතුණා ලංකාවට ඇවිල්ලා නිරූපණ වැඩවලට සම්බන්ධ වෙන්න. වසරක කාලයත් විතර මම විදෙස් ගත වෙලා හිටියා.
තරු පුංචි කාලේ හීන දැක්කේ වෙනත් වෘත්තියකට?
ඔව්, පුංචි කාලෙ මගේ හීනේ වෙලා තිබුණේ ගුවන් සේවිකාවක් වෙන්න. නමුත්, ඒ හීනේ සැබෑ කරගන්න මට බැරිවුණා. ඒත්, එක්කම මට නිරූපිකාවක වෙන්නත් ලොකු කැමැත්තක් සහ උවමනාවක් තිබුණා.
රංගනය පැත්තට යොමු වුණේ?
ගීත රූප රචනාවකට පෙනී ඉන්න කොට රුචික කියලා මගේ මිතුරෙක් මට මුණගැහුණා. ඔහු තමයි ස්වාධීන රූපවාහිනියේ විකාශය වුණ %ආදර වැස්ස^ ටෙලි නාට්‍යයට සම්බන්ධ වෙන්න කියලා මට ආරාධනා කළේ. එහි මම සුළු චරිතයක් රඟපෑවා.
ගීත රූප රචනා, වෙළෙඳ දැන්වීම්, ටෙලිනාට්‍යය හා චිත්‍රපටවලත් ඔබ රඟපෑවා?
දැනට ගීත රූප රචනා 6කට විතර දායක වෙලා තියෙනවා. ඒ අතර කසුන් කල්හාරගේ 'අම්මා' කියන ගීතයේ රූප රචනාව බොහෝ දෙනෙකු අතර ජනප්‍රිය වුණා. ඊට අමතරව මා දායක වුණ වෙළෙඳ දැන්වීම් අතරින් 'කොත්මලේ කිරි' කියන දැන්වීම් බොහෝ දෙනෙක් කතාබහ කළ වෙළෙඳ දැන්වීමක්. 'ආදර වැස්ස' හා ජාතික රූපවාහිනියේ විකාශය වුණ 'සීතල ගිනිදැල්' කියන නාට්‍ය දෙක ඇතුළුව තවත් ටෙලිනාට්‍යය කිහිපයක මම රඟපෑවා. ලකී ඩයස් මහත්මයාගේ 'බ්‍රේකින් නිවුස්' කියලා ඉදිරියට එන්න තියෙන චිත්‍රපටයකත් මම රඟපානවා.
ඕනෑම ක්ෂේත්‍රයක රැඳෙන්න නම් ඒ පිළිබඳව හැදෑරීමක් අවශ්‍යයි?
ඔව්, නිරූපිකාවක් විදිහට ක්ෂේත්‍රයට එන්න කලින් මම වාසනා දන්තනාරයන මහත්මිය යටතේ නිරූපණය පිළිබඳව හැදෑරීම් කළා. රංගනය පැත්තෙනුත් එවැනි හැදෑරීමක් කරන්න අවශ්‍යයි කියලා මට හිතෙනවා. ඉතින් ඉදිරි කාලයේදී මහේන්ද්‍ර පෙරේරා මහත්මයා ළඟ රංගනය පිළිබඳව කරන වැඩමුළු හා අභ්‍යාසවලට එකතු වෙන්න අදහස් කරමින් ඉන්නවා.
බුද්ධික සේනාධීර / ඡායාරූප - ඒෂාන් ප්‍රනාන්දු
