විදෙස් ප්‍රසංගවලට ගියාට මම තවම ලංකාවේ ප්‍රසංගවල ගීත ගයලා නැහැ
සමාජ මාධ්‍යයන් හරහා අතිශය ජනප්‍රිය වුණ යොවුන් දක්ෂ ගායිකාවක් තමයි අංජලි බණ්ඩාර කියන්නේ. ඇය තවත් නොබෝ දිනකින් ඉන්දියානු සංචාරයක නිරත වෙනවා. ඒ ප්‍රසංග කිහිපයක් සඳහා සහභාගි වීමට. සාරවිට අප ඇයගෙන් ඒ බව මෙසේ විමසුවා.
අංජලී ඉන්දියාවේ යන්නේ ඇයි?
සංගීත ප්‍රසංගයක් සඳහා සහභාගී වෙන්න තමයි ඉන්දියාවට යන්නේ. ඊට අමතරව තවත් සංගීත වැඩසටහන් කිහිපයකටත් මම සහභාගි වෙනවා. ඒ ඉන්දියාවෙ නැගී එන ගායික ගායිකාවන් පිරිසක් සමග. මම හිතනවා මේ සංචාරය මගේ සංගීත ජිවිතේ වටිනාම කඩඉමක් වේවි කියලා.
කොහොමද මේ අවස්ථාව අංජලීට ලැබුණේ?
මෑතකදී කල බැඳී ප්‍රේමේ තරම්.. ගීතය ටික්ටොක් සහ ෆේස්බුක් සමාජ මාධ්‍යයන් ඔස්සේ ලංකාවේ වගේම ඉන්දියාවෙත් ගොඩක් ජනප්‍රිය වුණා. ඒ ඔස්සෙ තමා මේ ආරාධනාව මට ලැබුණේ.
විදෙස් ප්‍රසංග ලැබෙන්න තරම් අංජලි දැන් ජනප්‍රිය කෙනෙක්?
ජනප්‍රිය කෙනෙක් කියන එක ගැන නම් මම දන්නෙ නැහැ. නමුත් වෙනස් නිර්මාණ කිහිපයක් සිදුකල නිසා මේ අවස්ථා ලැබෙන්ක ඇති කියලා මම හිතනවා. කොහොමත් මම ජනප්‍රියද කියලා මමම තිරණය කරන ඒක සාධාරණ නැහැ. ඒක මා වටා සිටින පිරිස තමයි ඉතින් තිරණය කරන්නේ.
අලුතින් කරපු නිර්මාණ මොනවද ඔබගේ?
අලුතෙන් දේවි.. බාරි.. හා බැඳී ප්‍රේමේ.. ගීත තුනක් මගෙ යූ ටියුබ් නාලිකාවෙන් බලන්න පුළුවන්. ඒ වගේම තව අලුත් නිර්මාණ කිහිපයක් මේ දිනවල සිදු කරමින් යනවා. ඉදිරියට ඒවා රසවිඳින්නත් ඔබට පුළුවන් වේවි.
ඉන්දීය ප්‍රසංග මාලාවෙන් පස්සේ ?
සිංගප්පූරු වල සංගීත ප්‍රසංගයක් සඳහා ආරාධනා ලැබිලා තියෙනවා. විදෙස් ප්‍රසංග සඳහා සහභාගී වුණාට තවම මම ලංකාවේ සංගීත ප්‍රසංග සඳහා සම්බන්ධ වෙලා නැහැ.
අංජලි ගොඩක් ජනප්‍රිය වුණේ සමාජ මාධ්‍යයන් හරහා කිව්වොත් හරි?
ඔව් ෆේස්බුක් සහ ටික්ටොක් හරහා තමා බොහෝ පිරිසක් අතර මම ජනප්‍රිය වුණේ. අදටත් මට වැඩිපුරම රසික ප්‍රතිචාර ලැබෙන්නේ සමාජ මාධ්‍යයන් හරහා කිව්වොත් නිවැරදියි.
ඔබගේ නව නිර්මාණයක් අපිට අහන්න දකින්න තව කාලයක් යයිද?
නැහැ. ඉදිරි සති කිහිපයේ මගෙ නව නිර්මාණයක් එළිදක්වන්න සූදානම් කරලා තියෙනවා. මේ දිනවල එහි අවසන් වැඩ කටයුතු නිමා කරමින් ඉන්නවා.
බුද්ධික සේනාධීර
