රුමේෂ් කියන්නේ මම බලාපොරොත්තු වුණ විදිහේ කෙනෙක්
දෙවෙනි ඉනිම ටෙලි නාට්‍යයේ සහේලි ලෙස රංගන ක්ෂේත්‍රයට පිවිසි එමාෂා සෙනෙවිරත්න, හිතුවක්කාරී, හිත ළඟ හිනැහුණා වැනි ඉතා ජනප්‍රියත්වයට පත් වූ නිර්මාණ තුළින් ඔබ හමුවට පැමිණියා වගේම වර්තමානයේ ප්‍රාර්ථනා, මායාවි ඇතුළු ජනප්‍රිය ටෙලි නිර්මාණ කිහිපයක් ඔස්සේ ප්‍රේක්ෂක ඔබ හමුවන්නීය. පසුගිය දිනෙක එමාෂා බොහෝ උණුසුම් ප්‍රතිචාර මැද විවාහ ගිවිසගත්තා. ඇයගේ අතගනු ලැබුවේ කලා ක්ෂේත්‍රයටම සම්බන්ධ රුමේෂ් මධුසංකය.
එමාෂාට රුමේෂ් මුණ ගැහුණ තැනින් කතාව පටන් ගමු?
අපි මුලින්ම හමුවෙන්නේ ටෙලි නිර්මාණයකදී. ඒ හමුවීම ක්ෂේත්‍රයේ දෙදෙනෙකු අතර වෙන සාමාන්‍ය හමුවීමක්. අපි දෙන්නටම කිසිම විශේෂයක් තිබුණේ නැහැ. හැබැයි කාලයත් එක්ක අපි අතර හිතවත්කමක් ගොඩ නැගුණා. නොදැනුවත්ම ඒ මිතුදම ආදරයකට පෙරළුණා. වසර කිහිපයක කතාවක් මේක. රුමේෂ් කියන්නේ දැන් මට ඉන්න හොඳම යාළුවා. එයා හොඳ ඇහුම්කන් දෙන්නෙක්. මම හොයන ගතිගුණ රුමේෂ් ළඟ තියෙනවා කියන එක අපි ආශ්‍රය කරද්දි මට දැනුනා. පෙර පිනකට වෙන්න ඇති රුමේෂ් වගේ ආදරණීය කෙනෙක්ව මට මුණගැහුණා. මම හැමදාම ප්‍රාර්ථනා කළේ තේරුම් ගැනීම සහ අවංක ආදරයක්. ඒක මට රුමේෂ්ගෙන් ලැබුණා. ඒ වගේම මගෙනුත් ඔහුට ඒ ආදරේ ලැබෙනවා. ගැළපෙනම දෙන්නෙක් හමුවුණා කියන එක අපි දෙන්නටම තේරුණේ කාලයත් සමග. ඉතින් කාලයක් ආදරය කරලා එකිනෙකාව හොඳින්ම තේරුම් අරගෙන තමයි අපි විවාහ ගිවිස ගන්න තිරණය කළේ.
කවුද එතකොට ඔය දෙන්නාගෙන් මුලින්ම ආදරය ප්‍රකාශ කළේ?
එයා තමයි හැබැයි මට මුලින්ම ආදරේයි කිව්වේ. හැබැයි අපි දෙන්නට කාලයක ඉඳලා තේරිලා තිබුණා දෙන්නට දෙන්නා කෙරෙහි ආදරයක් තියෙනවා කියලා. ඒත්, අපි ඒක එකිනෙකාට වචනයෙන් කිව්වේ නැහැ. අපි දෙන්නා අපි දෙන්නාගෙන් කවදාවත් ඒ ගැන ඇහුවේ නැහැ.
මේ ආදරය විවාහයකට පෙරළුණේ කොහොමද එතකොට?
ඒක අපි දෙන්නගේම කැමැත්ත. කාලයක් ආශ්‍රය කරලා, අපි දෙන්නට දෙන්නා හොඳින් තේරුම් අරගෙන, දෙදෙනාටම බලාපොරොත්තු වෙන ආදරය, ගෞරවය, විශ්වාසය එකිනෙකාගෙන් ලැබෙන නිසාත්, එකට ලස්සන ගමනක් යන්න පුලුවන් කියලා තේරුන නිසාත්, අපි තීරණය කළා විවාහ ගිවිසගන්න. සම්බන්ධයට දෙමව්පියන්ගේ ආශිර්වාදය ලබන්නත් අපි දෙදෙනා වාසනාවන්ත වුණා.
විවාහ ගිවිසගත් දවස අද වගේ එමාෂාට මතක ඇති?
ඔව්, ඒක හැමදාටම මතක් කර කර සතුටු වෙන්න පුළුවන් ලස්සන දවසක්. මට හිතෙනවා කෙනෙකුගේ ජීවිතේ වටිනාම දවස්වලින් එකක් කියලා විවාහ ගිවිස ගන්න දවස. ඉතින් අපිටත් ඒක එහෙමයි. නීතියෙන් එයා මගේම සහ මම එයාගෙම වෙන දවසනේ ඒක. ඒක හරි ලස්සන හැඟීමක්. දෙන්නෙක් ආදරේ කරලා තීරණයකට එනවා නීත්‍යානුකූලවත් අපි අපිටම ලියාගන්න ඕනෙ කියල. ඒකනේ විවාහ ගිවිසගැනීම කියලා කරන්නේ ඇත්තටම සරලව ගත්තම. ඒක මමත් ඉතින් එදා අත්වින්දා. ඒ හැඟීම හරි සුන්දරයි. ලස්සනයි.
ක්ෂේත්‍රයේම කෙනෙක් මුණ ගැසීම ගැන එමාෂාට මොකද හිතෙන්නේ?
ඇත්තටම ලොකු පහසුවක් සහ සතුටක්. හැබැයි ක්ෂේත්‍රයේ කෙනෙක් සමඟ විවාහ වෙන්න ඕනෙ කියල අදහසක් නම් කවදාවත්ම තිබිලා නැහැ. දෙදෙනාගේ ක්ෂේත්‍රය එකම වුණ එක අහම්බයක්. ඔහු චිත්‍රපට, ටෙලිනාට්‍ය සහ රූපවාහිනී වෙළඳ දැන්වීම් සහය අධ්‍යක්ෂකවරයෙක්. මගේ රංගනයටත් ඔහුගේ අදහස් ගොඩාක් වටිනවා. ඒ වගේම ඔහුට රංගනය ගැන අමුතුවෙන් තේරුම් කරන්න දෙයක් නැහැ. ඒ ගැන මටත් වඩා හොඳ අවබෝධයක් ඔහුට තියෙනවා. රංගන ශිල්පිනියක් හැටියට මට තිබෙන දැනුමට එහා ගිය පුළුල් පරාසයක දැනුමක් ඔහුට මේ ක්ෂේත්‍රය ගැන තියෙන නිසා ඔහුගේ තේරුම් ගැනීම උපරිමයි. ඒ නිසා මගේ රංගන කටයුතු හරිම නිදහසේ කරගන්න ඔහුගෙන් ලොකු සහයෝගයක් ලැබෙනවා. ඔහු එක්ක ගෙවන ජීවිතේ හරි ලස්සනට ගලාගෙන යනවා.
බුද්ධික සේනාධීර
