දැන් අම්මට ගොඩක්ම සුවයි. ඒ තරම් සතුටක් මට තවත් නෑ
තිසුරි යුවනිකා කියන්නෙ පුංචි තිරයේ ප්‍රේක්ෂක හදවත්වල ලැගුම් ගත්ත ආදරණීය චරිතයක්. ඇය බොහෝම නිහඬ චරිතයක් වුවත් අම්මාගේ අඩිපාරේ අඩි තියමින් යන ඈ සිනමා තිරයෙනුත් ඔබව මුණගැසුණා. මේ තියෙන්නෙ ඇය සතිඅන්ත පුවත්පතක් සමඟ කළ කතාබහක්.
තිසුරි පුංචි තිරයට සමු දුන්නද ?
විවාහයෙන් පස්සෙත් මම දිගටම වැඩ කළා. මම කොහොමත් එක දිගට වැඩ භාර අරගෙන කරන කෙනෙක් නෙවෙයි. 2020 දී මට රංගනයෙන් ටිකක් ඈත් වෙන්න වුණේ අම්මගේ අසනීප තත්ත්වය එක්ක. මම අම්මා ළඟ සිටිය යුතු නිසා. මම වැඩ කළේ ම නෑ. අම්මා අසනීප වුණා කියලා ගෙදර සහායටත් කවුරුත් ගත්තෙ නෑ. සියලුම දේවල් වුණේ මගේ අත් දෙකෙන්මයි. අවුරුදු දෙකකට ආසන්න කාලයක් මම කලා කටයුතුවලට දායක වුණේ ම නෑ. රඟපෑමට නැවතීමේ තිත තියලා නෑ. පොඩි විවේකයක් ගන්න ඕනෑ කියලා හිතුණා.
කොහොමද දැන් අම්මාගේ අසනීප තත්ත්වය ?
දැන් අම්මට ගොඩක්ම සුවයි. අම්මා වෛද්‍ය උපදෙස් අනුව ප්‍රතිකාරවලට යොමුවෙනවා. පරීක්ෂණ කරනවා. අම්මා නීරෝගිව ඉන්නවා. ඒ තරම් සතුටක් මට තවත් නෑ. ඒ තරම් සතුටක් මට තවත් නෑ. කලාවෙන් අම්මා ඈත් වෙලා නෑ. පසුගිය කාලෙත් අම්මාට ආරාධනා ලැබුණා. ඒත් කොවිඩ් ප්‍රශ්නත් එක්ක අම්මාව යවන්න මම බයවුණා. දැන් ඇය ගෙදරට වෙලා විවේකිව ඉන්නවා. හොඳ නිර්මාණයක් ලැබුණොත් භාරගනී.
දියණියක් විදිහට ඒ කටුක කාලය දැණුනේ කොහොමද ?
අම්මගේ අසනීපය දැනගන්න ලැබුණු වෙලාවේ හිතට ලොකු තිගැස්මක් ආවා. නමුත් තාත්තවත් මමවත් මගේ සැමියාවත් වැටුණේ නැහැ. අපි වැටුණා නම් අම්මත් වැටෙනවා. මම හිතාගත්තා අම්මව මොන ලෝකෙන් හරි සනීප කරගන්නවා කියලා. අම්මා මට හැමදාම කිව්වේ සැප වගේම දුකත් දෝත බඳලා බාරගන්න වෙනවා කියලා.
නදීශා අතුකෝරළ
