අදටත් මම ක්‍රිකට් ක්‍රීඩකයෙක් විදිහට ක්‍රීඩා කරනවා
බොහෝ පිරිසක් ආදරයෙන් නරඹන 'කියා දෙන්න ආදරේ තරම්' ටෙලි නාට්‍යයේ නිර්වාන් ලෙස මේ දිනවල ඔබ දකින සචින් ලියනගේට අපි සාරවිට තුළින් මෙවර ඉඩක් වෙන් කළා. රංගන ශිල්පියෙක් මෙන්ම හඬකැවිම් ශිල්පියෙකු ලෙසද වර්තමානයේ කටයුතු කරන සචින් තවත් කලා නිර්මාණ බොහෝමයකින් ප්‍රේක්ෂක ඔබ හමුවට නුදුරේම පැමිණිමට සූදානමින් සිටියි.
සචින් කියන්නේ මේ දවස්වල බොහෝ දෙනෙකු ආදරය කරන ටෙලි තරුවක්?
මමත් හිතනවා. මේ දිනවල සිරසේ විකාශය වෙන කියා දෙන්න ආදරේ තරම් ටෙලි නාට්‍යයේ නිර්වාන්ට ගොඩක් හොඳ ප්‍රතිචාර ලැබෙනවා. තරුණ බාල වැඩිහිටි මේ හැම කෙනෙකුගෙන්ම එක හා සමාන ප්‍රතිචාර නිර්වාන් කියන චරිතයට ලැබෙනවා.
කියා දෙන්න ආදරේ තරම් ටෙලි නාට්‍යයේ විතරද මේ දිනවල වැඩ කරන්නේ ඔබ?
දැනට මාව දකින්න ලැබෙන්නේ ඔය නිර්මාණය හරහා විතරයි. ඊට අමතරව ජාතික රූපවාහිනියේ විකාශය වෙන රුවැති සිතැත්ති කොරියානු ටෙලි නාට්‍යයට හඬකැවිම් ශිල්පියෙක් විදිහට සම්බන්ධ වෙලා වැඩ කරනවා. ඒ වගේම මේ දිනවල තවත් අලුත් ටෙලි නාට්‍යය කිහිපයකම වැඩ කරනවා. නුදුරේම ඒ හරහාත් ප්‍රේක්ෂකයින්ට මාව දැකගන්න පුළුවන්.
ක්‍රිකට් ක්‍රීඩකයෙක් වෙන්න හීන දැකපු සචින් මොකද මේ කලාව පැත්තට සම්බන්ධ වුණේ?
ඒක අහම්බෙන් වුණ සිදුවීමක්. මගේ ඥති අයියා කෙනෙක් ඉන්නවා රසාංග කියලා. ඔහු ගායකයෙක්. දවසක් මම ඔහු සමග ගියා හිරු එකට ඔහුගේ ගීතයක් භාර දෙන්න. එහිදි දැනඇඳුනුම් කමක් හරහා තමයි කලාවට සම්බන්ධ වුණේ. ඊට පස්සේ ගීත රූප රචනා වලට වගේම අවුරුදු කුමරා තරගවලටත් සම්බන්ධ වෙලා කලාව හරහා ඉදිරියට ආවා.
ක්‍රිකට් ක්‍රීඩාවට තිබුණ කැමැත්ත දැන් නැද්ද?
අදටත් ඒ හීනේ නම් මගෙන් අත්හැරෙන්නේ නැහැ. දැනටත් මම වත්තල ඇන්තෝනියන්ස් ක්‍රිකට් සමාජයට ක්‍රීඩා කරනවා. කලාවට සම්බන්ධ වෙන්න නැතුව ක්‍රිකට්වලින් ඉදිරියට ගියා නම් අද මම ජාතික මට්ටමේ ක්‍රීඩකයෙක් වෙනවා කියලා මම දන්නවා.
කලාවට අකමැත්තක් තියෙනවාද ඔබේ?
නැහැ. කලාව නිසා අද මාව බොහෝ දෙනෙක් දන්නවා. ඒ වගේම කියන්න ඕනා මගේ හැංගිලා තිබුණ දක්ෂතාවයක් කලාවට සම්බන්ධ වුණාත් එක්කම එළියට ඇවිල්ලා තියෙනවා. මම දැන් තිර රචනයටත් යොමු වෙලා තියෙනවා. මා විසින් ලියපු ටෙලි නාට්‍යයක් මගේ යූ ටියුබ් නාලිකාව හරහා තවත් නොබෝ දවසකින් එළිදක්වන්න සූදානම් කරලා තියෙනවා.
නිර්වාන් කියන චරිතය ඔබේ රංගන දිවියේ හැරවුම් ලක්ෂයද?
ඔව් මම හිතනවා. රසිකයෝ ගොඩක් මාව අඳුන ගත්තේ මේ චරිතය හරහා. අදටත් විශාල පිරිසක් නිර්වාන්ට ආදරය කරනවා. ඒ වගේම කියන්න ඕනා ඉදිරියේදී විකාශය වීමට නියමිත ටෙලි නාට්‍යයක මම සහස් කියලා තවත් චරිතයක් කරනවා. මම හිතනවා ඒ චරිතයටත් නිර්වාන් තරමට ප්‍රේක්ෂකයෝ ආදරය කරයි කියලා.
සචින් කියන්නේ දැන් ජනප්‍රිය නළුවෙක්ද?
මම එහෙම කියනවට වඩා මට ආදරය කරන ප්‍රේක්ෂකයෝ තමයි තිරණය කරන්න ඕනා සචින් කියන නළුවා ජනප්‍රියද නැද්ද කියලා. දෙයක් කියන්න ඕනා මේ ගමන එන්න ගොඩක් මම දුක්විදපු කෙනෙක්. මල් ඇති පාරක මම මේ ගමන ආවේ නැහැ. ගොඩක් ගල් බෙරලු කටු පදුරු තිබුණ පාරක ඇවිල්ලා තමයි අද මේ තැනට ආවේ. සචින් ජනප්‍රියද කියන එකට උත්තරයක් මෙවර සුමති ටෙලි සම්මාන උළලේදී ලැබිලා තියෙනවා. මම ජනප්‍රිය නළුවන් දසදෙනා අතර ඉන්නවා. මේක අවස්ථාවක් කරගන්නවා මට සහය දැක්වූ සැමට ස්තුති කරන්න.
බුද්ධික සේනාධීර
