Rotterdam (IFFR) ජාත්‍යන්තර සිනමා වේදිකාවේ, සම්මානයෙන් පිදුම් ලද අපේ සිනමාව
අපේ රටේ සිනමාව වරින් වර ජාත්‍යන්තරය නියෝජයන කළ අවස්ථා ගැන මීට පෙර අපි කතා කර තිබෙනවා. මේ කතාවත් එහෙම ජාත්‍යන්තර වේදිකාවක ඇගයීමට පාත්‍ර වුණු අපේ සිනමා නිර්මාණ ද්විත්වයක් ගැනයි. ලෝකයේ ප්‍රධානතම සිනමා උළෙලක් වන Rotterdam - IFFR සිනමා සම්මාන උළෙලේදීයි මෙලෙස අපේ නිර්මාණ ද්විත්වයක් වෙනුවෙනුත් සම්මාන හිමිවූයේ. ඒ විසාකේස චන්ද්‍රසේකරම්ගේ 'Munnel' සහ ජගත් මනුවර්ණයන්ගේ 'රහස් කියන කඳු ' ( Whispering Mountains ) සිනමා නිර්මාණ වෙනුවෙන්.
ඒ අනුව විශේෂ ජූරි සම්මානයක් Munnel සිනමා සිත්තම වෙනුවෙන් විසාකේස චන්ද්‍රසේකරම් විසින් දිනාගනු ලැබුවා. Munnel පළමු අන්තර්ජාතික ප්‍රදර්ශනය වඩාත් විශේෂිත වූයේ එහිදී විසාකේස චන්ද්‍රසේකරම් විසින් සෙල්ලපුල්ලේ මහේන්ද්‍රන්ට සහ වසන්ත මුදලිගේ ගැන කතා කිරීමට ඉඩක් වෙන්කිරීම හේතුවෙන්...
"මම Munnel පළමු අන්තර්ජාතික ප්‍රදර්ශනය සෙල්ලපුල්ලේ මහේන්ද්‍රන්ට සහ වසන්ත මුදලිගේට කැප කළා. කුරිරු ත්‍රස්තවාදය වැළැක්වීමේ පනත යටතේ අත්අඩංගුවට ගත් සෙල්ලපුල්ලේ ව්‍යාජ පාපොච්චාරණ සාක්ෂි මත වරදකරු වූ අතර සිර දඬුවම් කාලය තුළදී ඛේදජනක ලෙස බන්ධනාගාරය තුළදී මිය ගියේය. එම නීතිය යටතේම වසන්ත මුදලිගේ අත්අඩංගුවට ගෙන ඇති අතර, කිසිදු චෝදනාවක් නොමැතිව සිරගත කර ඇත...." යනුවෙන් ඔහු අදහස් දක්වා තිබුණා.
සම්මාන දිනාගැනීමත් සමඟ සිය ෆේස්බුක් ගිණුම තුළ සටහනක් තැබූ ඔහු,
"අපේ අදහස් ප්‍රකාශ කිරීමේ නිදහසට ජයග්‍රහණයක් IFFR... Munnel ජූරි සම්මානය දිනාගත් අතර Whispering Mountains Netpack සම්මානය දිනා ගත්තේය. Munnelහි මගේ ගමනේ කොටසක් වීම ගැන මගේ නළු නිළියන්ට සහ කාර්ය මණ්ඩලයට ස්තූතියි..." යනුවෙන් පවසා සිටියා.
Rotterdam සම්මාන උළෙලේ ප්‍රධානතම තරගකාරී අංශය ලෙසින් සැලකෙන Tiger Competition අංශය නියෝජනය කිරීමේ දුර්ලභ අවස්ථාවයි විසාකේස චන්ද්‍රසේකරම් විසින් මෙලෙස හිමිකරගනු ලැබුවේ.
රංගන ශිල්පී සහ අධ්‍යක්ෂක ජගත් මනුවර්නගේ කුලුඳුල් සිනමා නිර්මාණය මෙහිදී ඇගයීමට පාත්‍රවීමත් සුවිශේෂී කරුණක් වනවා.
ඒ අනුව ඔහුගේ Whispering Mountains (රහස් කියන කඳු) චිත්‍රපටය NETPAC (Network for the Promotion of Asian Cinema) සම්මානයෙන් පිදුම් ලැබුවා.
ලාංකේය නාමය ජාත්‍යන්තරයට රැගෙන ගිය, ඔබ දෙපළට අපෙන් උණුසුම් සුබපැතුම් !!
පහතින් දැක්වෙන්නේ IFFR 2023 සිනමා සම්මාන උළෙලේදී සම්මානයට පාත්‍ර වූ නිර්මාණයි.
IFFR winners 2023
Tiger Competition Award
Le Spectre De Boko Haram
Dir: Cyrielle Raingou
Special Jury Award
Munnel
Dir: Visakesa Chandrasekaram
New Strains
Dirs. Artemis Shaw, Prashanth Kamalakanthan
VPRO Big Screen Award
Endless Borders
Dir; Abbas Amini
Fipresci Award
La Palisiada
Dir. Philip Sotnychenko
NETPAC (Network for the Promotion of Asian Cinema) Award
Whispering Mountains
Dir: Jagath Manuwarna
