සිනමාවෙන් ’’ සිලෝන්’’ නාමය ලෝකයට රැගෙන ගිය රවී
කන්දක් සේ මා නූපා සේම ප්‍රේමණීය පෙම්බරා මේ දවස්වල කැනඩාවේ ප්‍රේක්ෂකාගාරයන්හි හදගැස්මක් වී හිඳී. ඒ හදගැස්මෙන් එරට ප්‍රේක්ෂකාගාර සංවේදී කළ සොඳුරු සිතැත්තා මා අභිමුව හිඳ කළ දිගු කතාබහක අකුරු වියමනයි මේ. ඔහු කවුද? ඔබ දන්නවාද? සිලෝන් එන්ටර්ටේන්මන්ට් කැනඩා නිර්මාතෘවරයා ලෙස නිර්මාණශීලී වින්දනීය ව්‍යවසායකත්වයකින් ලාංකික සිනමාව වෙනුවෙන් එදත් අදත් ප්‍රශංසනීය මෙහෙවරක් ඉටුකළ සහ ඉටුකරන ඔහු රවී සේනාධිපතිය. එමෙන්ම සිංහල චිත්‍රපට ප්‍රධාන ධාරාවන්ට සම්බන්ධ කිරීමේ පළමු ප්‍රසංශනීය ගෞරවය සිලෝන් එන්ටර්ටේන්මන්ට් කැනඩා නිර්මාතෘ රවී සේනාධිපතිට හිමිවිය යුතු වග මා ලියා තබන්නේ ද ගෞරව පූර්වක හැඟීමෙනි. 2022 දී කතුරු මිතුරු චිත්‍රපටය කැනඩාවේ තිරගත කරමින් ඒ ගෞරවයේ සමාරම්භය සිලෝන් එන්ටර්ටේන්මන්ට් කැනඩා නිර්මාතෘ රවී සේනාධිපති සනිටුහන් කළේය.
Q ජන්මලාභය ලද බිම හැරදා නික්ම ගියත් ඔබ හැමදාමත් ශ්‍රී ලාංකිකත්වයට, ශ්‍රී ලාංකික කලාවට සහ සිනමාවට ආධ්‍යාත්මිකව ප්‍රේම කළ ශ්‍රී ලාංකිකයෙක්. මම ඔබ හඳුනා ගන්නේත්, දකින්නේත්, කියවන්නේත් එහෙමයි. ඔබ ගැන මගේ චිත්‍රය නිවැරදිද මට කියන්න?
කැනඩාවේ වසර ගණනාවක් ජීවත් වුණත් මම අදටත් මම ඉපදුණු ශ්‍රී ලංකාව කියන රටට, ඒ මහ පොළොවට, ඒ මහ පොළොවෙ උපන් ශ්‍රී ලාංකිකත්වයේ අක්මුල් විහිදුණු හැමදේටම හරි ආදරෙයි. සිනමාවට කලාවට වගේම මට දැනෙන ශ්‍රී ලාංකික හදගැස්මටත් මම ආදරෙයි සහ සංවේදීයි. කැනඩාවේ වසර ගණනාවක් ජීවත් වුණත් මට කවදාවත් මගේ මව් භාෂාව වන සිංහල භාෂාව අමතක නොවුණෙත්, මම මේ තරම් ලස්සනට සිංහල කතා කරන්නෙත් ඒ ආදරය නිසාම වෙන්න ඇති. මම හිතන්නෙ මා ගැන ඔබේ චිත්‍රයේ හැඩතල සහ වර්ණය නිවැරදියි.
Q ප්‍රසංග කලාව ඔස්සේ ශ්‍රී ලාංකික කලාව වෙනුවෙන් කැනඩාවේ දොරටු විවර කරමින් ඔබ සලකුණු කළ දිගු ගමනේ සමාරම්භය ගැන දැන් ඉතින් අපි කතා කරමු?
අපේ ශ්‍රී ලාංකික චිත්‍රපට බලන්න, අපේ ගීත රසවිඳින්න මගේ තිබුණු ආසාව කවදාවත් මගෙන් මඟහැරුණේ නෑ. ලංකාවේ ඉද්දි විධායක ශ්‍රේණියේ බැංකු නිලධාරියෙක් ලෙස කටයුතු කළත් වෘත්තියෙන් ඔබ්බට මගේ ආදරය ගැටගැහුණේ සිනමාව, කලාව, ගීතය සහ සෞන්දර්ය යන මාතෘකාත් එක්ක. මට හරි ආසාවක් තිබුණා ශ්‍රී ලාංකික උරුමය සමඟ ප්‍රසංග කැනඩාවට ගේන්න. කැනඩාවේ වෙසෙන ශ්‍රී ලාංකිකයන්ට මොහොතකට ඔවුන් ජීවත් වෙන්නෙ කැනඩාවේ කියන එක මානසිකව අමතක කරන්න ඒ ප්‍රසංග ලස්සන ආධාරකයක් කර ගන්න මට ඕනෑ වුණා. 2017 දි තමයි ඇත්තටම මම ප්‍රසංග කලාවට ඒ විදිහට සම්බන්ධ වුණේ. ඒ සමාරම්භය ඇත්තටම දිගු ශක්තිමත් ගමනක මුල් අඩිතාලම වුණා කිව්වොත් නිවැරදියි.
Q සිලෝන් එන්ටර්ටේන්මන්ට් කැනඩා ඒ ආ ගමනේ අපූරු සංධිස්ථානයක්. කියන්න ඒ ගැන?
ඇත්තටම එය සුන්දරම සහ ශක්තිමත්ම සංධිස්ථානයක්. 2019 දි තමයි මම එය ආරම්භ කළේ. කැනඩාවේ විතරක් නෙවෙයි ඇමෙරිකාවෙත් අපි සිංහල චිත්‍රපට ප්‍රදර්ශනය සම්බන්ධයෙන් එම ආයතනය ඔස්සේ බලපත්‍ර හිමිකර ගත්තා.
Q මව්බිම හැරදා විදේශයක පදිංචියට යන ශ්‍රී ලාංකිකයන්ට ලාංකික කලාව, ගීතය, සිනමාව රසවිඳින්න දැනෙන වුවමනාව ඔබම නිදසුනක් ලෙස ගෙන විවරණය කළොත් කොහොමද ඒ හැඟීම් ඔබ මට විස්තර කරන්නෙ?
නොයෙක් සාධාරණ හේතු මත පුද්ගලයෙක්ට තමන් උපත ලද භූමියෙන් නික්ම එන්න සිද්ධවෙන්න පුළුවන්. එහෙත් එසේ නික්ම ආ පමණින් ඒ පොළොවත් සමඟ, ඒ සංස්කෘතිය සහ කලාව, සෞන්දර්ය, සොබාදහම සමඟ ඇති බැඳීම අත්හැරෙන්නෙ නෑ. මට කැනඩාවට ආවට පස්සෙ එය රසවිඳීමේ වුවමනාව තදින්ම දැනුණා. නොයෙක් සංගම් සහ ආගමික සිද්ධස්ථාන මූලිකව ප්‍රසංගමය දේවල් පැවැත්වුවත් මට හිතුණා මේ සියල්ල ඊට වඩා වෙනස් තලයකට ගේන්න පුළුවන් නම් හොඳයි කියලා. මම හිතුව දේ තමයි ලාංකිකයෙක් විදිහට කොහොමද කැනඩාවේ මම මටම අනන්‍ය නියෝජනයක් හදාගන්නෙ කියන එක. විශේෂයෙන්ම සිනමාවට තිබුණු මගේ ළැදියාවත් එක්ක අපේ සිනමාව මේ රටේ මිනිස්සුත් එක්ක බද්ධ කරන්නෙ කොහොමද කියන එක මම කල්පනා කළා. මම විඳින්න කැමතියි මම දකින්න කැමතියි අපේ දේ. ඒ හේතුව මෙවැනි ආස්වාදනීය දේවල් පසුපස හඹා යන්නට ප්‍රබලවම මගේ හිත පෙළඹුවා.
Q සිලෝන් එන්ටර්ටේන්මන්ට් මේ වන විට කැනඩාවේ ප්‍රසංග කොපමණ සංඛ්‍යාවක් පවත්වා ශ්‍රී ලාංකික ප්‍රාසාංගික අත්දැකීම් එහි වෙසෙන ශ්‍රී ලාංකිකයන්ට ලබා දුන්නද?
දැනට සංගීත ප්‍රසංග තුනක් පවත්වා තිබෙනවා. තවත් ප්‍රසංගයක් පවත්වන්නට කටයුතු සූදානම් කරමින් ඉන්නවා.
Q හෙළවුඩයේ සිනමා පට කොපමණ සංඛ්‍යාවක් කැනඩාවේ තිරයක් මත දිගහරින්න සිලෝන් එන්ටර්ටේන්මන්ට් ඔස්සේ ඔබට හැකි වුණාද?
මම හිතන්නෙ පහළොවක් විතර චිත්‍රපට මම එහෙට ගෙනාවා. ටොරොන්ටෝ ඇතුළු කැනඩාවේ ප්‍රධාන නගර කිහිපයක අපි එම චිත්‍රපට ප්‍රදර්ශනය කළා.
Q ලාංකික චිත්‍රපට කැනේඩියානු තිර මත දිගහරින්න ඔබ කළේ එක්තරා තරගයක්. එක්තරා සටනක්. නොසැලෙන පෞරුෂත්වයක් සමඟ ඔබ කළ ඒ තරගය සහ සටන ගැන අපි කතා කළ යුතුමයි?
කැනඩාවේ බොහෝ විට තිරගත වෙන්නෙ හොලිවුඩ් චිත්‍රපටයි. ප්‍රධාන ධාරාවේ හොලිවුඩ් ඇතුළු චිත්‍රපට සමඟ අපට ඉඩක් වෙන්කර ගන්න ලොකු තරගයක් දෙන්න මට සිද්ධ වුණා. ඇත්තටම ඒ ප්‍රධාන ධාරාවට ආසියානු චිත්‍රපටයක්, විශේෂයෙන් අපේ සිංහල චිත්‍රපටයක් රිංගවන්න හරි අමාරුයි. අවුරුදු තුනක් මම අදාළ සමාගම් සමඟ ඔවුන්ට අපි ගැන විශ්වාසයක් ඇතිවන පරිදි කතා කරලා තමයි මෙය ගොඩනැගුවේ. ඇත්තටම එය දුෂ්කර වෑයමක්. අද වෙද්දි සිංහල සිනමාවත් කැනඩාවේ ප්‍රධාන සිනමා ධාරාවන් ඇතුළට එකතු වීම මට පුදුමාකාර සතුටක්. මට ඇත්තටම ලොකු වෙහෙසක් ගන්න වුණා ඒ අයට ඒත්තු ගන්වන්න අපිට ශ්‍රී ලාංකික සිනමාවක් තියෙනවා, ඒ වගේම අපිට පුළුල් ප්‍රේක්ෂකාගාරයක් තියෙනවා කියන එක.
Q ඇත්තටම ශ්‍රී ලාංකික සිනමාවට වෙළෙඳපොළක් ඇති බව ඔප්පු කර පෙන්වීම වෙනුවෙන් ඔබ යොදාගත් සාක්ෂි මොනවද?
ඇත්තටම ඔවුන් මගෙන් අහපු මුල්ම ප්‍රශ්නයක් තමයි ලංකාවේ සිනමා කර්මාන්තයක් තියෙනවද කියන එක. ඒ ප්‍රශ්නයට මම දුන්න උත්තරයත් එක්ක ඒගොල්ලො මට කියපු දේ තමයි අපි මෙයාටත් අවස්ථාවක් දෙමු කියන එක.
Q හොලිවුඩ්, බොලිවුඩ් වැනි ප්‍රධාන ධාරාවේ චිත්‍රපට අතරට සිංහල සිනමාව ගෙන එන විවරණය ලෙස නිත්‍යනුකූල බලපත්‍රයක් අතට හම්බවෙච්ච දවසේ ඔබේ හිතට දැනුණේ කොහොම හැඟීම්ද?
මට හිතුණා ඒ ප්‍රධාන ධාරාවේ චිත්‍රපට කර්මාන්ත මෙහෙයවූ දැවැන්තයන් අතරේ අපිත් දැන් ඉන්නවා නේද කියලා. මට ඇත්තටම පැය ගාණක් ගියා මට මේ බලපත්‍රය හිමිවුණා නේද කියන එක සත්‍යයක් කියන හැඟීම විඳගන්න. මම ලාංකිකයෙක් විදිහට කැනඩාවෙදි ලබපු විශිෂ්ට ජයග්‍රහණයක් ලෙස ඒ බලපත්‍රය හිමිකර ගැනීම හඳුන්වන්න කැමතියි. බලපත්‍රය හිමිවුණාම ඇත්තටම මම ගොඩක් දේවල් සැලසුම් කළා. ඒ ආපු ගමනෙදි උදව් කරපු අය වගේම ඇතැම්විට නොයෙක් සංගම් ඔස්සේ උදව් ඉල්ලද්දි උදව් නොකරපු සහ ඒ ගැන තැකීමක් නොකරපු අයත් හිටියා. ඇතැම් ලාංකික සමාගම් කිව්වා සිලෝන් එන්ටර්ටේන්මන්ට් කියන්නෙ වෙළෙඳ ව්‍යාපාරයක් කියලා. ගොඩක් අය මට උදව් කරද්දි ඍණාත්මකව ඒ දිහා බලපු අයත් හිටියා. කැල්ගරි සහ සරේ නගරය ඇතුළු නගරවල විශේෂ සහායක් දක්වපු පිරිසක් හිටියා. අපේ ප්‍රසංගයක් පවත්වන්න කටයුතු කරපු ගමන් මුලින්ම ''හවුස් ෆුල්'' වෙන්නෙ ඒ නගර දෙකේ. ඇත්තටම ඒ නගරවල ඉන්න විශේෂයෙන් තරුණ පිරිස් දෙන සහයෝගය මත තමයි මේ සියල්ල ඉදිරියට යන්නෙ.
Q ලාංකික සිනමාව තවමත් කර්මාන්තයක් ලෙස ස්ථාවර නොවුණු පසුබිමක ලාංකික චිත්‍රපටවලට විදේශීය ප්‍රදර්ශන සඳහා වෙළෙඳපොළක් නිර්මාණය කිරීම ඇත්තටම ඉතා වටිනා මෙහෙවරක්. එහි වටිනාකම ශ්‍රී ලාංකික සිනමාවේදීන් තේරුම් අරගෙන ඉන්නෙ කොයි විදිහටද?
අද ශ්‍රී ලංකාවේ හුඟක් චිත්‍රපට හැදෙන්නෙ කැනඩාව, ඔස්ට්‍රේලියාව, නවසීලන්තය, ඇමෙරිකාව වගේ රටවලට ප්‍රදර්ශනයට ගෙන ඒමේ අරමුණින් වීමේ සම්භාවිතාවය ඉහළ මට්ටමකින් පැවතීම තෘප්තිමත් කාරණයක්. එම රටවල ප්‍රේක්ෂකාගාරයන් උදෙසා ගැලපෙන ප්‍රස්තුතයන් ඔවුන් තේරුම් ගෙන සිටීම වැදගත්. සිනමාව කියන්නෙ ගැඹුරු, ආස්වාදනීය කියවීමක් සහිත මාධ්‍යයක්. භාෂාව නොතේරුණත් වර්ණ, රෑප සහ සංගීතය ඔස්සේ සිනමාව විශ්වීය වන්නේ ඒ නිසා. දැන් ලාංකික චිත්‍රපට ජාත්‍යන්තරය තේරුම් ගත් මනසකින් නිර්මාණය වීම ඊට කදිම ජාත්‍යන්තර වෙළෙඳපොළක් නිර්මාණය වීම විෂයෙහි ප්‍රබල හේතුවක්. සිකුරාදා, සෙනසුරාදා, ඉරිදා වගේ දවස්වල හවස හතරෙන් පසු හවස හය හත වැනි වෙලාවල් අපිට ප්‍රදර්ශනය සඳහා හිමිවීම කියන්නෙම හොඳ වෙළෙඳපොළක් නිර්මාණය වීමට අවශ්‍ය සාධකයක්. මාවල් ප්‍රදර්ශනය වෙද්දි ඊට සමගාමීව අපි තරග කළේ ගජමෑන් චිත්‍රපටයත් එක්ක. අපිට පුළුවන් වුණා කරට කර තරගයක් එතෙන්දි දෙන්න. ඇත්තටම මේ චිත්‍රපට ප්‍රදර්ශනය ව්‍යාපාරයක් තමයි. කැනඩාවේ සිංහල සිනමාව වෙනුවෙන් නොතිබුණු ව්‍යාපාරයක් තමයි අපි එහෙම ගොඩනැගුවෙ. ඒ නිසා කැනඩාවේ ඉන්න සිනමා ප්‍රේක්ෂකයන්ගෙන් අපි ඉල්ලන්නෙ ඒ ව්‍යාපාරය තවත් ගොඩනගන්න අපිට උදව් කරන්න කියලා.
Q සිංහල චිත්‍රපටයක් ප්‍රදර්ශනය වෙද්දි එය නැරඹීමට එන ප්‍රේක්ෂකාගාරය සමන්විත වෙන්නෙ ශ්‍රී ලාංකික සිංහල මිනිසුන්ගෙන් විතරද?
නැහැ. කැනඩාවේ සිටින දමිළ සහ වෙනත් විදේශිකයන් සිංහල චිත්‍රපට නැරඹීමට පැමිණීමේ ප්‍රවණතාව මේ වෙද්දි හුඟක් ඉහළයි. එය ඉතා සුබවාදී සහ පෞද්ගලිකව මට විශාල තෘප්තියක් ගෙන දෙන කාරණයක් වෙන්නෙ මම මෙම ව්‍යාපාරය ගොඩනගන්න සෑහෙන කැපවීමක් සහ මහන්සියක් ගත්ත නිසා. අද එය සොඳුරු වෙහෙසක් බවට පරිවර්තනය වී හමාරයි. ඉංග්‍රීසි උපසිරුසි කැනඩාවේ චිත්‍රපටයක් ප්‍රදර්ශනය කරද්දි අත්‍යවශ්‍යයි. එහෙ ඉන්න නව පරම්පරාවල සිංහල දරුවන්ට හුඟක් වෙලාවට සිංහල තේරෙන්නෙත් නැහැ. ඒ අය චිත්‍රපටය තේරුම් ගන්නෙ උපසිරුසි කියවලා. ආදරණීය ප්‍රාර්ථනා තිරගත කිරීම් 66ක් අපි කළා. මම හිතන්නෙ වැඩිම ආදායම් එහිදි උපයා ගත්තෙ ආදරණීය ප්‍රාර්ථනා චිත්‍රපටය. දෙවැනියට ගජමෑන්. ගාඩි, තට්ටු දෙකේ ඉස්කෝලෙ, කතුරු මිතුරු යනාදී වශයෙන් ගෙන්වපු චිත්‍රපට පහළොවම වගේ ඉතා හොඳ ප්‍රේක්ෂකාගාරයක් හිමිකර ගත්තා. දාන දාන හැම ෂෝ එකක්ම %හවුස් ෆුල්^ කරන්න අපිට පුළුවන් වුණා. ඉදිරියේදි 800, විසල් ආදරය වගේ චිත්‍රපට ගෙන්වන්න තියෙනවා.
Q සිංහල චිත්‍රපට ගෙන්වා ගැනීමේදී එම චිත්‍රපටවල ප්‍රස්තුතය සම්බන්ධයෙන් පවතින යම් නිර්ණායක තිබෙනවද?
ඔව්. අපි නිර්මාණය කරගත් ප්‍රේක්ෂකාගාරය අපි ඒ අයුරින්ම පවත්වාගත යුතුයි. එසේ පවත්වා ගැනීමට නම් ප්‍රේක්ෂකයන් ඉල්ලන රසය සහ ඔවුන්ගේ වින්දනීය පරාසයන් අප තේරුම්ගත යුතුයි. මිනිස්සු තමන් හරිහම්බ කරන දෙයින් ඩොලර් ගණනක් වියදම් කරලා ප්‍රවේශ පත්‍රයක් අරගෙන තමන්ගෙ කාලය මිඩංගු කරගෙන චිත්‍රපටයක් බලන්න එන්නෙ අඬන්න, විඳවන්න හෝ දුක්බර මානසිකත්වයකින් පිටව යන්න නෙවෙයි. සුන්දර සියුම් මනෝභාවයන්, ප්‍රස්තුතයන් වින්දනීය මානසිකත්වයකින් විඳලා සතුටින් නික්ම යන්න. එම නිසා එවැනි ප්‍රස්තුත කේන්ද්‍ර කරගත් සිනමා පට තමා අපි ගෙන්වන්නෙ. මොකද යම් තැනකදි ප්‍රේක්ෂක විශ්වාසය සහ ප්‍රේක්ෂකාගාරය බිඳවැටුණොත් එය නැවත ගොඩනංවා ගැනීම අසීරු කර්තව්‍යයක්.
Q ප්‍රේක්ෂක ආකර්ෂණය සහ විශ්වාසය දිනාගැනීම මෙන්ම පවත්වා ගැනීමත් එක සේ වැදගත්... කොහොමද එදා සේම අදත් එකම අයුරින් ඔබ ඒ ප්‍රේක්ෂකාගාරය ඔබ වෙත රදවාගෙන තියෙන්නේ?
කිසිම දවසක මම කෙනෙක්ට බල කරන්නෙ නෑ ටිකට් එකක් අරගෙන චිත්‍රපටයක් බලන්න, ප්‍රසංගයක් බලන්න එන්න කියලා. ප්‍රේක්ෂකාගාරයක් එහෙම බලකිරීම මත නිර්මාණය කරගෙන වැඩක් නැහැ. අපි චිත්‍රපට තිරගත කරන සිනමා ශාලාවන්හි සුව පහසු අසුනේ සිට සුඛෝපභෝගී සිනමාමය අත්දැකීමක් විඳින්න අවශ්‍ය සියල්ල තියෙනවා. මට ඇත්තටම අවශ්‍ය වුණේ මිනිසුන්ට නිදහසේ ඇවිත් සුවදායී සිනමාමය අත්දැකීමක් විඳින්න අවශ්‍ය පසුබිම නිර්මාණය කරන්න. ප්‍රසංගයක් පවත්වද්දී වුණත් ලබාදෙන්නේ ඒ සුවදායි අත්දැකීමමයි.
Q සිලෝන් කියන නාමය ඓතිහාසික වටිනාකම් එක්ක ගැටගැහුණු නාමයක්. ඔබ ඔබේ සිනමාමය ව්‍යාපාරය, නැත්නම් ආයතනය, තවත් වෙසෙකින් මෙහෙවර සඳහා යොදාගන්නෙ සිලෝන් කියන ඒ ඓතිහාසික සාරයක් මුහුවෙච්ච ශ්‍රී ලාංකික නාමයයි. ඇයි රවී සේනාධිපති සිලෝන් කියන නාමයට ඔබ ආදරය කළේ?
අද මම කැනේඩියානුවෙක් වුණත් උපතින් ශ්‍රී ලාංකිකයෙක්. මගේ හදවතේ සම්, මස්, ලේ, නහර, ඇට මිඳුළු විනිවිද ශ්‍රී ලාංකික අක්මුල්වල සුවඳ විහිද පැතිර ඇති බව මම දන්නවා. මට දැනෙනවා. සිලෝන් කියන නාමය ලෝකෙට ගෙනියනකොට මට දැනෙන්න ඇති ඒක මගේ රටේ අභිමානයට හේතුවක් බව. ඇත්තටම ඒ නමට මම ආසයි සහ ආදරෙයි. ශ්‍රී ලංකාව කියන්නෙ ආසියාවෙ වෙන රටක්. සිංහල කියන්නෙ වෙනම භාෂාවක් කියන අභිමානය මම හැමවිටම කතා කරපු දෙයක්. සිලෝන් එන්ටර්ටේන්මන්ට් අපිත් එක්ක තරගයේ තවත් ප්‍රධාන ජාත්‍යන්තර සමාගම් හතරක් ඉන්නවා. ඒ සමාගම්වලට අපි නිවැරදිව ආමන්ත්‍රණය නොකළොත් ඔවුන් අපිව පිළිගන්නෙ නෑ. ගාඩි චිත්‍රපටය බලලා කැනේඩියානුවන් පවා ප්‍රතිචාර දක්වද්දි මට දැනුණු ආඩම්බරය පිටුපස ඇත්තටම සිලෝන් එන්ටර්ටේන්මන්ට් නිර්මාතෘවරයා වීමේ සතුටත් තිබුණා. www.ceylonentertainment.ca වෙබ් අඩවිය ඔස්සේ ඔබට ඉල්ලීමක් ඉදිරිපත් කිරීමෙන් සිංහල චිත්‍රපට කැනඩාවේ ප්‍රදර්ශනය වෙනුවෙන් අවස්ථාව සලසා ගතහැකියි. ඒ වගේම ප්‍රදර්ශන මට්ටමට අවශ්‍ය සුදුසුකම් සපුරා ඇති චිත්‍රපට ප්‍රදර්ශනය සඳහා නිර්දේශ කරන බවද සඳහන් කළ යුතුයි.
Q ආ ගමන් මඟ මල් සේම ගල් හමුවෙන්න ඇති නොවැරදීම. ආයෙත් හැරෙමු මොහොතකට ජීවිතයේ ඇවිද ආ ඒ ගමන් මගේ මතක වෙත. මට කියන්න ඔබ ඒ ගමනේදී සෙවණැල්ලක් සේ ළඟින් හිඳි අය ගැනත් වචනයක්?
ජීවිතයේ වැටුණු යම් තැනක් ඉඳහිටක හෝ තිබුණා නම් මගේ ආදරණීය බිරිඳ, මගේ අම්මා, තාත්තා, සහෝදරිය මගේ හයියට හිටියා හැමදාමත්. ඒ වගේම මගේ ළගම මිතුරන් මගේ හයියට හිටියා හැමදාමත්. මගේ බිරිඳ චමරි ජයසිංහ සිලෝන් එන්ටර්ටේන්මන්ට් කැනඩා ආයතනයේ සම අධ්‍යක්ෂිකාවයි. මා නිවන සනසන ඇගේ සහයෝගය සහ ආදරය මම සිහිපත් කරන්නෙ හරි කෘතවේදීත්වයකින්. ඒ වගේම ලාංකීය සම්බන්ධීකරණ කටයුතු සිදුකරන මාධවී කල්දේරාත් වචනයෙන් හෝ දිරියක් දුන් සැම දෙනාමත් ආදරයෙන් සිහිපත් කරනවා.
සංජීවිකා සමරතුංග / සේයාරූ I නිසල් බදුගේ
