මේ දිනවල නිතර ඇසෙන මතකයෙන් මා
මේ දිනවල ජනප්‍රිය අලුත් ගීත රූප රචනාවක් කෙරෙහි අපගේ අවධානය මෙවර යොමු විය. ඒ තරුණ ගායන ශිල්පියෙකු වූ සමන්ත බණ්ඩාර ගයන මතකයෙන් මා.. ගීතය හා රූප රචනාව කෙරෙහිය. මේ දිනවල නිතර අසන්නටත්, දකින්නටත් ලැබෙන මේ ගීතය සමන්ත බණ්ඩාරගේ දෙවැනි ගීතය වීම විශේෂත්වයකි. ආදරය විරහාව කැටි වුණ මෙම ගීතය පද රචනා කර ඇත්තේ ජනප්‍රියම ගීත කිහිපයක් ලියූ රාජාංගනේ පොඩි හාමුදුරුවෝ අතිනි.
සමන්ත බණ්ඩාරට මා විසින් ලියු දෙවැනි ගීතය මෙයයි. මීට පෙර ඔහුට මා එගොඩ කැළණි විහාරය.. නමින් ගීතයක් ලිව්වා. මේ වගේ ගීතයක් ලියලා දෙන්න කිව්වේ ඔහුගේ ඉල්ලීම මත. තවත් ගීත කිහිපයක් මා විසින් ඔහුට ලියා තිබෙනවා. ඉදිරියේදී ඒවා නිකුත් කරන්න අපි සූදානම් වෙලා ඉන්නවා. ගීතය ගැන අදහස් දක්වමින් ගී පද රචක රාජාංගනේ පොඩි හාමුදුරුවෝ අපිට පැවසුවේ එවැනි අදහසකි.
සමන්ත බණ්ඩාර ගයන මතකයෙන් මා.. ගීතයේ ගී තනුව හා සංගීතය නිර්මාණය කර ඇත්තේ ගිහින් නිශාන් විසිනි. ඔහුගේම මියුසික් විලේජ් ආයතනය මඟින් මෙහි ගීත රෑප රචනාව නිර්මාණය කර තිබෙයි. වර්තමානයේ අප කාගෙත් ආදරය දිනූ ජනප්‍රිය රංගන ශිල්පින් යුවළක් වන විරාජ් පෙරේරා හා ශෂි ඇන්ජලීනා මෙහි රංගනයෙන් දායක වෙයි.
මේ ගීතය දැන් නිකුත් කරලා සති කිහිපයක් වෙනවා. නමුත්, රසික ප්‍රතිචාර අදටත් නොඅඩුව මට ලැබෙනවා. මම ටිකක් ආදරය විරහාව පැත්තට බර ගීත ගයන්න කැමතියි. ඒ නිසාම තමයි රාජාංගනේ පොඩි හාමුදුරුවන්ට මේ වගේ ගීතයක් ලියලා දෙන්න කියලා මම ඉල්ලීම් කළේ. නුදුරේම තවත් ගීත කිහිපයක්ම තියෙනවා මගේ නිකුත් වෙන්න. මම බලාපොරොත්තු වෙනවා. ඒ ගීතවලටත් මේ වගේම හොඳ රසික ප්‍රතිචාර ලැබෙයි කියලා. සිය ගීතය ගැන හඬ අවදි කරමින් සමන්ත බණ්ඩාර අපිට පැවසුවේ එවැන්නකි.
බුද්ධික සේනාධීර
