'Predator' එක්ක එළියට එන නිළිය
මෙම වසර හොලිවුඩ් සිනමාව තුළ විශාල පෙරළියක් සිදුවෙමින් පවතින වසරක් බව මේ වනවිට පෙනෙන්නට තිබේ. 1987 වසරේදී මුලින්ම තිරගත වීම ඇරඹි Predator චිත්‍රපට මාලාවේ 06 වැන්න එළඹෙන සැප්තැම්බර් 14 වැනිදා එළිදැක්වීමේ පුවත ඒ සඳහා හොඳම නිදසුන් සපයයි.
සාමාන්‍යයෙන් චිත්‍රපටයක් පිළිබඳ අවධානය යොමුවන්නේ එහි පූර්ව ප්‍රචාරක පට එළිදැක්වීමෙන් අනතුරුව වුවද, මෙම චිත්‍රපටයට රසික අවධානය යොමුව ඇත්තේ එහි ප්‍රධාන රංගන ශිල්පිනිය නිසාවෙනි. Yvonne Strahovski නම් මෙම රංගන ශිල්පිනිය එහි රූගත කිරීම්වල ඡායාරූප කිහිපයක් තම ඉන්ස්ටර්ග්‍රෑම් ගිණුමට එක් කිරීමත් සමග අදාළ චිත්‍රපටය පිළිබඳ කතාබහ මතුව තිබේ. මේ සටහන ඇය පිළිබඳවය.
Yvonne Strahovski ඔස්ට්‍රේලියානු ජාතික රංගන ශිල්පිනියකි. 2004 වසරේදී තිරගත වූ Double the Fist නම් රූපවාහිනී කතාමාලව ඔස්සේ රූපවාහිනි නිළියක ලෙස ක්ෂේත්‍රයට පිවිසි ඇය 2005 වසරේ සිට 2006 වසර දක්වා නැවතත් Head Land නම් රූපවාහිනී කතා මාලාවට රංගනයෙන් දායක වී තිබේ. 2007දී විකාශය Sea Patrol නම් රූපවාහිනී කතාමාලාවෙන් පසු ඇයට සිනමාවට පිවිසීමට වරම් හිමි වන අතර, ඒ එම වසරේදීම තිරගත වූ Gone නම් චිත්‍රපටය ඔස්සේය. අනතුරුව 2008 දී The Plex චිත්‍රපටය සඳහාද, 2009 දී The Canyon සහ Persons of Interest නම් සිනමා නිර්මාණ දෙක සඳහාද රංගනයෙන් දායක වන ඇය, 2010 වසරේදී සිනමා නිර්මාණ තුනක් සඳහා රංගනයෙන් දායක වූවාය. ඒවා නම් I Love You Too, Matching Jack සහ Lego: The Adventures of Clutch Powers නම් සිනමා නිර්මාණයි. 2011දී එක් සිනමා නිර්මාණයකට දායක වන Yvonne නැවතත් 2012 රූපවාහිනී නිර්මාණයක් සඳහා දායක වෙයි. ඒ Dexter නම් රූපවාහිනි කතාමාලාවේ රංගනයෙනි. එය 2013 වසර දක්වා විකාශය විය.
ඉන්පසු 2014 වසරේදී සිනමා නිර්මාණයක් සහ රූපවාහිනී කතාමාලා දෙකක් සඳහා රංගනයෙන් දායක වන Yvonne, 2015 වසරේ විකාශය වූ The Astronaut Wives Club සහ Edge නම් කතාමාලා දෙක සඳහාද රංගනයෙන් දායක වන්නීය.
කෙසේ වුවද ඇය බොහෝ ලෙස කතාබහට ලක්වූ රංගන ශිල්පිනියක වන්නේ 2016 වසරේදී තිරගත වූ Batman : Bad Blood නම් චිත්‍රපටය හේතුවෙනි. ඊට අමතරව ඇය එම වසරේදී තවත් චිත්‍රපට 02ක් සඳහා රංගනයෙන් දායක විවූ අතර, 2017 වසරේදී තිරගත වූ He’s Out there නම් චිත්‍රපටයටද දායක වූවාය. ඒ අනුව මෙම වසරේ තිරගත වීමට නියමිත The Predator නව චිත්‍රපටය ඔස්සේද ඇය දැඩි ප්‍රේක්ෂක අවධානයට පාත්‍රවනු ඇතැයි සිතිය හැකිය. කෙසේ වුවද ඇය දැනටමත් 2019 වසරේදී නිර්මාණය වන සිනමා නිර්මාණයකට දායක වීමටද සූදානමින් සිටින්නීය.
