La La Land සිනමා පටය ' BAFTA' සම්මාන උලෙළේ නාමයෝජනා අතරද ඉදිරියෙන්...
ගෝල්ඩන් ග්ලෝබ් සම්මාන උලෙළේ දැවැන්ත ජයග්‍රාහකයකු වූ ශෘංගාරාත්මක සංගීතමය සිනමාපටය "ලා ලා ලෑන්ඩ් (La La Land)" මීළඟ මාසයේ පැවැත්වීමට නියමිත "බ්‍රිටිෂ් ඇකඩමි ඔෆ් ෆිල්ම්ස් ඇන්ඩ් ටෙලිවිෂන් ආර්ට් (BAFTA)" සම්මාන උලෙළේද සම්මාන 11ක් උදෙසා නාමයෝජනා වෙමින් එම සම්මාන උලෙළේ සම්මාන අතර ඉදිරියෙන් සිටින බව පසුගියදා ප්‍රකාශයට පත් වී ඇත.
එසේම විද්‍යා ප්‍රබන්ධමය සිනමාපටයක් වන "අරයිවල් (Arrival)" සහ මෝස්තර නිර්මාණ ශිල්පී "ටොම් ෆෝර්ඩ්" නාට්‍යමය සිනමාපටයක් වන "නොක්ටර්නල් ඇනිමල්ස් (Nocturnal Animal)" සිනමාපටයද මෙම සම්මාන උලෙළේ සම්මාන 9 බැගින් නම් යෝජනා වී ඇති අතර, "මැනිචෙස්ටර් බයි ද සී (Manchester by the Sea)" සිනමාපටය සම්මාන 6ක් සඳහා නාමයෝජනා වී ඇති බවද වාර්තා වෙයි.
"ලා ලා ලෑන්ඩ්" හි ප්‍රධාන නළු නිළි යුවළ වන රයන් ගොස්ලින් සහ එමා ස්ටෝන් ද හොඳම නළුනිළි යුවළ වෙනුවෙන් නම් යෝජනා වී තිබීමද සුවිශේෂත්වයකි. පියානෝ වාදකයකු සහ හොලිවුඩ් නිළියක අතර ආදර අන්දරයක්ද දැක්වෙන කතා තේමාවකින් යුත් මෙම ලා ලා ලෑන්ඩ් සිනමාපටය හොඳම සිනමාපටය, හොඳම සංගීතය, හොඳම සංස්කරණය, හොඳම සිනාමාරූපණය, හොඳම ශබ්දරසය, හොඳම නිෂ්පාදන නිර්මාණය සහ හොඳම වේශ නිරූපණය යන සම්මාන උදෙසා නම යෝජනා වී ඇත. ගෝල්ඩන් ග්ලෝබ් සම්මාන උලෙළේද සම්මාන 7ක්ම දිනා ගනිමින් මේ දිනවල හොලිවුඩයේ දැවැන්ත ජයග්‍රාහකයෙක් බවට පත්වී සිටින ලා ලා ලෑන්ඩ් සිනමාපටය පෙබරවාරි 12 දිනයේද දැවැන්ත ජයග්‍රහණයක් ලබයිද යන්න නිර්මාණකරුවන්ගේ කුතුහලය දනවන බලාපොරොත්තුව වී ඇත.
- අනුෂි දන්තනාරායන
