සුප්‍රකට නිළි සාසා ගේබර් මිය යයි
හංගේරියානු - ඇමෙරිකානු නිළි සා සා ගේබර් පසුගිය ඉරිදා ඇයගේ ලොස්ඇන්ජලිස්හි පිහිටි නිවසේදී මිය ගොස් ඇති බව ඇයගේ නීති ලේඛකයා වන "එඩ්වර්ඩ් ලෝසි" ප්‍රකාශයට පත් කොට තිබෙනවා. මිය යනවිට 99 වියෙහි පසු වූ ඇය වසර ගණනාවක් තිස්සේ රෝගාතුරව සිට ඇති අතර, මියගොස් ඇත්තේ හෘදය අකර්මණ්‍ය වීමකින් බවද ලෝසි පවසා තිබෙනවා.
1950, 60 සහ 70 දශකවල ඇමෙරිකාවේ අතිශය ජනප්‍රියත්වයට පත්ව සිටි සුරූපී නිළියක වූ ඇය සිය රංගන කර්තව්‍යයට අමතරව පමණ ඉක්මවා ගිය හොලිවුඩ් ජීවන ශෛලිය, දුටුවන් වශී කරවන පෞරුෂත්වය මෙන්ම ඇයගේ විවාහයන් හේතුවෙන් නිරන්තරයෙන් මාධ්‍ය තුළ පුවත් මවන්නියක්ද විය. ඇය නව වතාවක් විවාහ වී 07 වතාවක් දික්කසාද වි තිබේ.
1917 පෙබරවාරි 06 වැනිදා හංගේරියාවේ බුඩාපෙස්ට් ප්‍රදේශයේදී උපත ලැබූ ගේබර් 1936 වර්ෂයේදී හංගේරියානු රූපරාජිනී කිරුළ දිනාගැනීමට සමත් වූවාය. ඒ අනුව 1941 වර්ෂයේදී ඇමරිකාවෙහි පදිංචියට එන ඇය සිය ප්‍රථම චිත්‍රපට රංගනය "Lovely to Look At." සිනමාපටයේ අතිරේක රංගන දායකත්වයකින් අරඹන අතර, "Moulin Rouge", "Touch of Evil", "The Story of Three Loves" වැනි සිනමාපට ගණනාවක රංගන දායකත්වය ලබාදෙමින් සිනමා ක්ෂේත්‍රයට රංගනයෙන් මනා දායකත්වයක් ලබා දුන්නාය.
- අනුෂි දන්තනාරායන
