ස්පයිඩර් මෑන්ගේ නව පෙම්වතිය 'Zendaya'
"ස්පයිඩර් මෑන් "හෝම් කමින් චිත්‍රපටය එළඹෙන ජූලි මාසයේ තිරගත වීමට නියමිතය. මෙහි ප්‍රචාරක කටයුතු මේ වන විටත් අරඹා ඇති හෙයින් මේ පිළිබඳව බොහෝදෙනෙකුගේ අවධානය යොමු වී තිබේ. ඒ අතරින් සුවිශේෂී අවධානයක් යොමුව ඇත්තේ මෙහි ප්‍රධාන චරිතයක් රඟන සුරූපී යොවුන් නිළියක් වන සෙන්ඩයා පිළිබඳවයි. බොහෝදෙනෙක්ට එම නාමය හුරුපුරුදු නොවන්නේ ඇය චිත්‍රපට ක්ෂේත්‍රයට ආධුනික නිළියක බැවිනි. ගායිකාවක්, නර්තන ශිල්පිනියක් මෙන්ම නිරූපණ ශිල්පිනියක් ලෙස කටයුතු කර ඇති සෙන්ඩයාගේ පළමු චිත්‍රපට දායකත්වය මෙය වෙයි.
සිනමා ක්ෂේත්‍රයට ප්‍රවිශ්ට වීමට පෙර ඇය පුංචි තිරයේ රංගන ශිල්පිනියක ලෙස කටයුතු කර තිබේ. එහිදී ඇය පළමුවෙන් දායක වූයේ 2010 වසරේ සිට 2013 වසර දක්වා විකාශය වූ Shake It Up රූපවාහිනී කතාමාලාව සඳහාය. ඉන්පසු ඇය 2011 වර්ෂයේදී කතාමාලාවන් තුනක් සඳහා දායක විය. ඒ Good Luck Charlie, PrankStars, Pixie Hollow Games ය. ඇය නැවත 2012 වසරේදී A.N.T. Farm නම් වූ රූපවාහිනී කතාමාලාවට සහ Frenemies කතාමාලාව සඳහා දායක විය. ඒ ආකාරයෙන් ඇය රූපවාහිනී ක්ෂේත්‍රය තුළ කැපී පෙනෙන චරිතයක් විය.
ඉන්පසුව ඇය Dancing with the Stars 16 වැනි අදියර සඳහා දායක වූ අතර, එම තරගය සමග ඇය වසරක කාලයක් ගත කරන ලදී. එයින් ඇයට ජයග්‍රහණය කිරීමට හැකියාව නොලැබුණු අතර ඉන් පසුව නැවතත් ඇය රූපවාහිනී කතාමාලාවන් සඳහා යොමු විය. ඒ ආකාරයෙන් ඇය 2014 වසරේ සිට 2017 දක්වා රූපවාහිනී කතාමාලාවන් තුනක් සඳහා දායක විය.
Spider-Man: Homecoming චිත්‍රපටයෙන් අනතුරුව සෙන්ඩයාට මෙම වර්ෂයේදී තවත් චිත්‍රපටයක් සඳහා රංගනයෙන් දායක වීමට අවස්ථාව ලැබී තිබේ. ඒ දෙසැම්බර් මාසයේ එළිදැක්වීමට නියමිත The Greatest Showman චිත්‍රපටයයි.
මේ කාරණා වලට වඩා ඇය පිළිබඳව අවධානය යොමුවන තවත් සුවිශේෂී කාරණාවක් තිබේ. ඒ ඇය විසින් මිලදී ගත් නිවසක් හේතුවෙනි. වෘත්තීය නිළියක ලෙස ප්‍රවීණත්වයට පත්වන්නටත් පෙර මේ හුරුබුහුටි දැරිය සුඛෝපභෝගී නිවසක හිමිකාරියක් වූයේ කෙසේද යන්න පිළිබඳ බොහෝදෙනාගේ අවධානය යොමුව තිබේ. වර්ග අඩි 4,155ක වපසරියක විහිදී ඇති මෙම දෙමහල් නිවසෙහි නිදන කාමර 5ක් සහ නාන කාමර 5ක් ඇති බව විදෙස් මාධ්‍ය පෙන්වා දෙයි. සෙන්ඩයාගේ මෙම නව නිවසෙහි වටිනාකම ඇමරිකානු ඩොලර් මිලියන 1.4කි. එය පිහිටා ඇත්තේ ලොස් ඇන්ජලීස් නුවරයි. මේ සුපිරි නිවසෙහි කිරිගරු‍ඬෙන් තැනූ නාන කාමර මෙන්ම සුපිරි නාන තටාක ඇතුළු තවත් අංග රැසක් ඇති බවයි හොලිවුඩ් මාධ්‍ය ප්‍රකාශ කරන‍්නේ. මේ වන විට 20 වැනි වියෙහි පසුවන සෙන්ඩයා වයසින් ළාබාල වුවත් තම ජීවිතයේ ඉහළ මට්ටමකට පැමිණ ඇති බවයි බොහෝදෙනා පවසන්නේ.
Dilan Chryshantha
