ස්ටුඩන්ට්ස් ඔෆ් ද ඉයර් ළඟදීම
ආලියා භාත්, වරුන් ධාවාන් සහ සිධාර්ත් මල්හෝත‍්‍රා බොලිවුඞ් පුරයට පිවිසියේ කරන් ජෝහාර් නිර්මාණය කළ ස්ටුඩන්ට් ඔෆ් ද ඉයර් චිත‍්‍රපටිය හරහාය. එය ඔවුන්ට ලබා දුන් ජනපි‍්‍රයත්වයේ තරම පෙනෙන්නේ ඔවුන් තිදෙනාම අද කාර්යබහුල නළුනිළියන් වී සිටීම තුළිනි.
මෙහි දෙවන කොටසක් නිෂ්පාදනය කරන්නට කරන් ජෝහාර් අදහස් කළේ එය ද පළමු නිර්මාණය මෙන්ම ජනපි‍්‍රය වෙනවා ඇතැයි බලාපොරොත්තුව ඇතිවය. මැයි 10 දා සිට තිරගත වෙන්නට නියමිත ස්ටුඩන්ට් ඔෆ් ද ඉයර් 2 චිත‍්‍රපටියේ දෙවන කොටසේ ර`ග පාන්නේ ටයිගර් ෂ්රොෆ්, අනන්‍යා පාණ්ඬේ සහ තාරා සුතාරියාය. ටයිගර් ෂ්රොෆ් මෙහි ර`ග පාන්නේ රොහාන් නම් වන, ශක්තිමත් දේහයක් සහිත මලල කී‍්‍රඩකයෙකුගේ චරිතයකි. ඔහු කිසිම අභියෝගයකට බිය නැත.
‘‘චිත‍්‍රපටිය තිරගත වෙනකම් අපිත් බලාගෙන ඉන්නෙ හරි ආසාවෙන්.. සමහර විට අපිත් ඒ අය එක්කම ආපහු ඉස්කෝලේ යන්න බැරි නෑ..’’
සිධාර්ත් මල්හෝත‍්‍රා එසේ පැවසුවේ ඔවුන් ද දර්ශන දෙක තුනක පෙනී සිටින්නට නියමිත බැව් නොකියා කියමිනි.
‘‘ඇත්තටම මෙච්චර ඉක්මනට මේ චිත‍්‍රපටියෙ දෙවෙනි කොටසක් එයි කියලා අපි හිතුවෙ නෑ.. කොහොම වුණත් ඒ හරහා ජනපි‍්‍රය වුණ නළුනිළියන් විදියට අපි තුන් දෙනාම හු`ගාක් සතුටු වෙනවා.. ඒ වගේම ආඩම්බර වෙනවා තවත් චිත‍්‍රපටියක් හදන්න තරම් පළමු එක සාර්ථක වීම ගැන... ටයිගර්, අනන්‍යා තමන්ගෙ කොටස හරියටම කරයි කියලා අපි විශ්වාස කරනවා..’’
වරුන් ධාවාන් පවසයි. මේ දිනවල ඔහු සිටින්නේ ආලියා භාත්, සෝනාක්ෂි සිංහ, ආදිත්‍ය රෝයි කපුර් සම`ග ර`ග පාන කලන්ක් චිත‍්‍රපටියේ ප‍්‍රචාරක කටයුතු ස`දහා වෙහෙසෙමිනි.
