ෂාරුක් ඛාන් මියගිය පුවතට ෂාරුක් ඛාන්ගේ අප්‍රසාදය
ෂාරුක් ඛාන් ගුවන් අනතුරකින් මියගිය බවට කටකතාවක් පසුගිය දිනක යුරෝපීය ප‍්‍රවෘත්ති ජාලයකින් ප‍්‍රචාරය වූයේය. මේ පිළිබඳව ඔහුගේ රසිකයෝ බොහෝ සෙයින් කම්පාවට පත් වූහ. මේ කටකතාවේ උපත ගැන ෂාරුක් ඛාන් සිය ට්විටර් අඩවියේ සඳහන් කර තිබුණේය.
ආනන්ද එල්. රායිගේ තවමත් නමක් යොදා නැති චිත‍්‍රපටියේ දර්ශන තලයකදී ගොඩනැගිල්ලක සිවිලිමෙන් කොටසක් කඩා වැටුණේය. ඉන් දෙදෙනකුට තුවාල සිදු වුණත් ෂාරුක් ඛාන්ට සීරීමක්වත් වූයේ නැත. එහෙත් කතාව ප‍්‍රචාරය වී තිබුණේ ඔහු තවත් සත් දෙනකු සමඟ ගුවන් අනතුරකින් මියගිය බවය. මුම්බායි පොලිසියට ඇමතුම් පිට ඇමතුම් එන්නට පටන් ගත්තේ මේ කටකතාව අන්තර්ජාලයේ දිස්වී විනාඩි ගණනාවක් ගත වෙන්නටත් පෙරය. එහි ඇත්ත නැත්ත දැන ගන්නට ෂාරුක් ඛාන්ගේ කාර්ය මණ්ඩලයට දුරකතන ඇමතුමක් දෙන්නට මුම්බායි පොලිස් කොමසාරිස්වරයාට සිදු වූවේය. කාර්ය මණ්ඩලය සිටියේ ද දවස පුරාම දුරකතන ඇමතුම්වලට පිළිතුරු දෙමිනි.
”ෂාරුක් ඛාන් මරුණා කියලා කටකතා පැතිරුණ පළවෙනි වතාව මේක නෙමෙයි... මේ සැරේ ඒක ටිකක් තදේට පැතිරුණා.”
ඔහුගේ කාර්ය මණ්ඩලයේ අයකු පැවැසුවේය.
